୨୪ବର୍ଷରେ ବିଜେଡି ସରକାର ପାରିଲାନି, ଏବେ ଅଣ୍ଟା ଭିଡିଲେ ବିଜେପି ସରକାର । ଦଶନ୍ଧି ଦଶନ୍ଧିର ଦାବିରେ ପଡିବ ପୂର୍ଣ୍ଣଛେଦ । ଋଷିକୁଲ୍ୟା - ମହାନଦୀର ସଂଯୋଗୀକରଣ ଆଶା ସଂଚାର ହେଲା । ନୟାଗଡ ବରମୁଲରେ ହେବ ବଡ଼ଡ୍ୟାମ । ବନ୍ୟାଜଳ ସଂରକ୍ଷିତ ରହିବ । ବଡ଼ କେନାଲ ଦ୍ୱାରା ଋଷିକୂଲ୍ୟାକୁ ଆସିବ ମହାନଦୀ ଜଳ । ଏ ନେଇ ଗଞ୍ଜାମ ଜନ ପ୍ରତିନିଧି ମୁଖ୍ୟମନ୍ତ୍ରୀଙ୍କୁ ଦେଇଛନ୍ତି ପ୍ରସ୍ତାବ । ପ୍ରସ୍ତାବକୁ ଆଗେଇ ନେବା ପାଇଁ ମୁଖ୍ୟମନ୍ତ୍ରୀ ଆଗଭର ହୋଇଥିବା କହିଛନ୍ତି ବିଧାୟକ।

ବିଧାୟକମାନଙ୍କ ପ୍ରସ୍ତାବ ଅନୁସାରେ ଏହି ପ୍ରକଳ୍ପ ଦ୍ୱାରା ପ୍ରାୟ ୨ଲକ୍ଷ ହଜାର ହେକ୍ଟର ଜ‌ମି ଜଳସେଚିତ ହେବ । ଶିଳ୍ପାନୁଷ୍ଠାନକୁ ମଧ୍ୟ ପାଣି ଯୋଗାଣ ସମ୍ଭବ ହୋଇପାରିବ । ସେହିପରି ମତ୍ସ୍ୟଚାଷ କ୍ଷେତ୍ରରେ ମଧ୍ୟ ଏହି ପ୍ରକଳ୍ପ ବେଶ ଉପ‌ଯୋଗୀ ସାବ୍ୟସ୍ତ ହେବ । ବିଧାୟକଙ୍କ ଏହି ପ୍ରସ୍ତାବକୁ ଜିଲ୍ଲାବାସୀ ସ୍ୱାଗତ କରିଛନ୍ତି।

ଗଞ୍ଜାମ ଜିଲ୍ଲାବାସୀ ପାନୀୟ ଜଳ ଓ ଚାଷ କାର୍ଯ୍ୟ ପାଇଁ ଋଷିକୁଲ୍ୟା ନଦୀ ଉପରେ ନିର୍ଭର କରନ୍ତି । ହେଲେ ଏହି ନଦୀର ପ୍ରାୟ ୮୦ ପ୍ରତିଶତ ପାଣି ସମୁଦ୍ରକୁ ବୋହି ଯାଉଛି। ବର୍ଷକୁ ପ୍ରାୟ ୭/୮ ମାସ ନଦୀ ଶଯ୍ୟା ଶୁଖିଲା ରହୁଛି । ଏଣୁ ନଦୀ ଅବବାହିକାରେ ରହୁଥିବା ଲୋକମାନେ ପାଣି ପାଇ ପାରୁନାହାନ୍ତି। ଚାଷୀ ପାଇଁ ପାଣି ନିଅଣ୍ଟ ପଡୁଛି । ପାନୀୟ ଜଳ ସମସ୍ୟା ମଧ୍ୟ ରହିଛି । ଏଣୁ ଋଷିକୁଲ୍ୟାକୁ ବଞ୍ଚାଇବା ପାଇଁ ୨ହଜାର ମସିହାରୁ ସଂଯୋଗୀକରଣ ପ୍ରସ୍ତାବ ତତ୍କାଳୀନ ରାଜ୍ୟ ସରକାରଙ୍କୁ ଦେଇଥିଲେ ପୂର୍ବତନ ଉପ ବାଚସ୍ପତି ରାମଚନ୍ଦ୍ର ପଣ୍ଡା ।

ଆନ୍ତରିକତା ଅଭାବରୁ ଏହା ଆଗେଇପାରିଲାନି । କିଛିଦିନ ତଳେ ବ୍ରହ୍ମପୁର ସାଂସଦ ଡ.ପ୍ରଦୀପ କୁମାର ପାଣିଗ୍ରାହୀ ମଧ୍ୟ ମୁଖ୍ୟମନ୍ତ୍ରୀଙ୍କ ଜରିଆରେ ପ୍ରଧାନମନ୍ତ୍ରୀଙ୍କୁ ଚିଠି ଲେଖି ଏ ଦିଗରେ ବିଚାର କରିବାକୁ ଅନୁରୋଧ କରିଥିଲେ । ଏବେ ବିଜେପି ସରକାର ବିଧାୟକଙ୍କ ପ୍ରସ୍ତାବକୁ ଆଗେଇ ନେବା ପାଇଁ ଉଦ୍ୟମ ଆରମ୍ଭ କରିଛନ୍ତି ।