ଅର୍ଗସ ବ୍ୟୁରୋ: ଜନଜାତୀୟ ଗୌରବ ଦିବସରେ ବିଜେଡି ସରକାର ଉପରେ ବର୍ଷିଛନ୍ତି ମୁଖ୍ୟମନ୍ତ୍ରୀ । ଗତ ସରକାର ସମୟରେ ଆଦିବାସୀ ମାନଙ୍କୁ ଶିକ୍ଷା ଓ ସ୍ୱାସ୍ଥ୍ୟ ଭଳି ସବୁ କ୍ଷେତ୍ରରେ ଅବହେଳା କରାଯାଇଥିବା କହିଛନ୍ତି ମୁଖ୍ୟମନ୍ତ୍ରୀ । ଆହୁରି କହିଛନ୍ତି ଆଦିବାସୀ ମାନଙ୍କୁ ପୂର୍ବ ସରକାରରେ ସ୍ୱତନ୍ତ୍ରତା ମିଳୁ ନଥିଲା କି ମୁଖ୍ୟ ସ୍ରୋତରେ ସାମିଲ କରିବାକୁ କୌଣସି ଠୋସ ପଦକ୍ଷେପ ନିଆଯାଉ ନଥିଲା । ଆବାସିକ ହଷ୍ଟେଲ ଗୁଡିକରେ ପିଲା ଖାଇବାକୁ ପାଉନଥିଲେ । ଲୁଣ ସହ ଭାତ ଖାଉଥିଲେ । ତେଣୁ ଆମ ସରକାର ରାଜ୍ୟରେ ପେସା ଆଇନ ଲାଗୁ ଆଦିବାସୀଙ୍କ ବିକାଶ ସହ ସେମାନଙ୍କ କଳା ସଂସ୍କୃତି କୁ ମଧ୍ୟ ସୁରକ୍ଷା ଦେବ ବୋଲି କହିଛନ୍ତି ମୁଖ୍ୟମନ୍ତ୍ରୀ ।

ସେହିପରି ଜନଜାତୀୟ ଗୌରବ ଦିବସରେ ଆଦିବାସୀଙ୍କ ବିକାଶ ପାଇଁ ୧୫୩୫ କୋଟି ଟଙ୍କାର ପ୍ରକଳ୍ପ ଶିଳାନ୍ୟାସ କରିଛନ୍ତି ମୁଖ୍ୟମନ୍ତ୍ରୀ । ଯେଉଁଥିରେ ରହିଛି ଜନଜାତି ଐତିହ୍ୟ ଓ ସୁରକ୍ଷା ପାଈଁ ୧୦୦ କୋଟି ଟଙ୍କା ବ୍ୟୟରେ ନିର୍ମାଣ ହେବାକୁ ଯାଉଥିବା ଜନଜାତି ଐତିହ ଏବଂ ସ୍ୱାଭିମାନ ଭବନ । ୮୫୨ କୋଟି ଖର୍ଚ୍ଚ ରେ ନିର୍ମାଣ ହେବାକୁ ଥିବା ୪୨୬ ଆବାସିକ ସ୍କୁଲ । ୨୪୦ କୋଟି ବ୍ୟୟ ରେ ୧୬ ଆଶ୍ରମ ହାଇସ୍କୁଲ ଗୁଡିକର ଅପଗ୍ରେଡ଼ସନ । ୧୩ ଟି ହାଇସ୍କୁଲକୁ ଅପଗ୍ରେଡ଼ କରି ଯୁକ୍ତ ୨ କରିବା ପାଈଁ ୨୨ କୋଟି ଲେଖାଏଁର ବ୍ୟୟ ବରାଦ । ଭାଷା ଓ ସଂସ୍କୃତି ପ୍ରତିଷ୍ଠାନ ପାଈଁ ୫୦ କୋଟି ଟଙ୍କାର ବିନିଯୋଗ ପାଇଁ ମୁଖ୍ୟମନ୍ତ୍ରୀ ଆଜି ଘୋଷଣା କରିବା ସହ ଶିଳାନ୍ୟାସ କରିଛନ୍ତି ।

କଣ ଏହି ପେସା ଆଇନ । ଅନୁସୂଚିତ ଅଞ୍ଚଳର ବିକାଶ ଏବଂ ଜନଜାତିଙ୍କ ସଶକ୍ତି କରଣ ପାଇଁ ୧୯୯୬ ମସିହା ଡିସେମ୍ବର ୨୪ରେ ଭାରତ ସରକାର ‘ପଞ୍ଚାୟତ ସଂପ୍ରସାରଣ ଅଧିନିୟମ ବା ପେସା ଆଇନ୍ ପ୍ରଣୟନ କରିଥିଲେ । ଏହି ଆଇନରେ ଗ୍ରାମସଭାକୁ ସର୍ବାଧିକ କ୍ଷମତା ପ୍ରଦାନ କରାଯାଇଛି । ଯାହାଦ୍ୱାରା ଅନୂସୂଚିତ ଅଞ୍ଚଳର ବିକାଶ ସହ ଗ୍ରାମ ସଭା ଜରିଆରେ ଜନଜାତିଙ୍କ ବିକାଶ ହୋଇପାରିବ । ଏଥିସହିତ ରାଜନୈତିକ, ସାମାଜିକ ଏବଂ ସାସ୍କୃତିକ ବ୍ୟବସ୍ଥାରେ ମଧ୍ୟ ଅନୁସୂଚିତ ଜାତି ତଥା ଆଦିବାସୀମାନେ ସକ୍ରିୟ ଅଂଶଗ୍ରହଣ କରିପାରିବେ । ସହଜ ଭାଷା ରେ କହିବାକୁ ଗଲେ ଏହି ଆଇନରେ ଜଳ, ଜଙ୍ଗଲ, ଜମି ଆଦି ତିନି କ୍ଷେତ୍ରରେ ଆଦିବାସୀ ମାନଙ୍କୁ ସ୍ୱତନ୍ତ୍ରତା ଦେବ । ପେସା ଆଇନ ଦେଶର ୬ ଟି ଆଦିବାସୀ ବହୁଳ ରାଜ୍ୟରେ ଲାଗୁ ହୋଇ ସାରିଛି । ପଡୋଶୀ ଆନ୍ଧ୍ରପ୍ରଦେଶ ଓ ଛତିଶଗଡ଼ ରେ ଏହି ପେସା ଆଇନ ଲାଗୁ ହେବା ଦ୍ୱାରା ଆଦିବାସୀଙ୍କ ବିକାଶ ଦିଗରେ ଏହା ଅତ୍ୟନ୍ତ ସହାୟକ ହେଉଥିବା ଦେଖିବାକୁ ମିଳୁଛି । କିନ୍ତୁ ଓଡ଼ିଶା ରେ ବର୍ତ୍ତମାନ ସୁଦ୍ଧା ଏହାକୁ ଲାଗୁ କରାଯାଇ ନଥିବାରୁ ପୂର୍ବ ସରକାରକୁ ଟାର୍ଗେଟ କରିଛନ୍ତି ବିଭାଗୀୟ ମନ୍ତ୍ରୀ । ଯାହାର ଜବାବ ରଖିଛି ବିଜେଡି ।

ରାଜ୍ୟରେ ମୋଟ୍ ଜନସଂଖ୍ୟାର ୨୨.୮୫ ପ୍ରତିଶତ ଜନଜାତି ଥିବାବେଳେ ସେମାନେ ରାଜ୍ୟର ୪୫% ଅଞ୍ଚଳରେ ବାସ କରୁଛନ୍ତି । ୧୩ଟି ଜିଲ୍ଲାର ୧୧୯ଟି ବ୍ଲକରେ ଆଦିବାସୀ ରହୁଥିବାବେଳେ ସେମାନେ ୭୪ ପ୍ରକାରର ଉପଭାଷାରେ କଥା ହେଉଛନ୍ତି । ତେଣୁ ଏହି ପେସା ଆଇନ ଲାଗୁ ହେବା ଦ୍ୱାରା ରାଜ୍ୟର ମୂଳ ଅଧିବାସୀ ତଥା ଆଦିବାସୀ ମାନଙ୍କ ସାମାଜିକ ଓ ଆର୍ଥିକ ବିକାଶ ହୋଇ ପାରିବ ବୋଲି କୁହାଯାଉଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more