ଆମନିଆ ସେବକଙ୍କ ଯୋଗୁଁ ଶ୍ରୀଅଙ୍ଗ ସ୍ପର୍ଶ କଲେ ସଂଖ୍ୟାଧିକ ଶ୍ରଦ୍ଧାଳୁ ଓ ଅଣସେବକ । ସ୍ନାନ ପୂର୍ଣ୍ଣିମା ମାର୍ଗ ଦର୍ଶିକାକୁ କିଛି ସେବକ କଲେ ବେଖାତିର। ଶ୍ରୀଅଙ୍ଗ ସ୍ପର୍ଶ ନକରିବାକୁ ୧୪ ବର୍ଷ ତଳୁ ଜାରି ହୋଇଛି ମାର୍ଗ ଦର୍ଶିକା । ହେଲେ କିଛି ଅମାନିଆ ସେବାୟତ ନିୟମିତ ଭାବେ କରିଆସୁଛନ୍ତି ନିୟମ ଉଲ୍ଲଂଘନ । ଚଳିତ ଥର ସ୍ନାନଯାତ୍ରା ନୀତି ଶୃଙ୍ଖଳିତ ଭାବେ ଶେଷ ହୋଇଥିଲେ ହେଁ ଭକ୍ତଙ୍କୁ ଶ୍ରୀଅଙ୍ଗ ସ୍ପର୍ଶ କରାଇବାରେ ସହଯୋଗ କରି କିଛି ସେବକ ବ୍ୟବସ୍ଥାବଳୀ ଅନୂପାଳନରେ ଦାଗ ଲଗାଇଛନ୍ତି । ଭିଡିଓ ଫୁଟେଜ ଦେଖି ପଦକ୍ଷେପ ନେବୁ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି। ଏସପି କହିଛନ୍ତି ସଠିକ୍ ଯାଞ୍ଚ ପରେ କାର୍ଯ୍ୟାନୁଷ୍ଠାନ ନିଆଯିବ।

ସ୍ନାନ ମଣ୍ଡପରେ ଦେଖିବାକୁ ମିଳିଲା ଅଲୋଡ଼ା ଦୃଶ୍ୟ । ଶ୍ରଦ୍ଧାଳୁଙ୍କୁ ମହାପ୍ରଭୁଙ୍କ ଶ୍ରୀଅଙ୍ଗ ସ୍ପର୍ଶ ପାଇଁ ସହଯୋଗ କରିଛନ୍ତି ସେବକ । ଶହ ଶହ ସଂଖ୍ୟାରେ ଶ୍ରଦ୍ଧାଳୁ ମହାପ୍ରଭୁଙ୍କୁ ସ୍ନାନ ବେଦୀରେ ସ୍ପର୍ଶ କରିଛନ୍ତି । କଟକଣାକୁ ମାନିନାହାନ୍ତି । ଉପସ୍ଥିତ ସୁରକ୍ଷା କର୍ମୀ ବି ଚୁପ୍ । ସୁରୁଖୁରୁରେ, ଶାନ୍ତି ଶୃଙ୍ଖଳାରେ ଶେଷ ହୋଇଥିବା ସ୍ନାନଯାତ୍ରାରେ କିଛି ଅମାନିଆ ସେବକଙ୍କ ଯୋଗୁଁ ଏପରି ଘଟଣା ଘଟିଛି । ଭିଡିଓ ଫୁଟେଜରେ ଦେଖାଯାଇଛି ଠେଲାପେଲା ହୋଇ ଅନେକ ଶ୍ରଦ୍ଧାଳୁ ମହାପ୍ରଭୁଙ୍କ ଶ୍ରୀଅଙ୍ଗ ସ୍ପର୍ଶ କରିଛନ୍ତି । ସେବକମାନେ ନିଜ ଯାତ୍ରୀମାନଙ୍କୁ ଏଭଳି କରିବାକୁ ସୁଯୋଗ ଦେଇଛନ୍ତି । ସେତେବେଳେ ଉପସ୍ଥିତ ଅଧିକାରୀମାନେ ବି ଚୁପ ଥିଲେ । ଏହି ଘଟଣାରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ସେବକ ଓ ବୁଦ୍ଧିଜୀବୀ ।

୨୦୧୪ ମସିହାରୁ ମହାପ୍ରଭୁଙ୍କ ଶ୍ରୀଅଙ୍ଗ ଲାଗି ସେବକ ନିଯୋଗ ମାନଙ୍କ ବ୍ୟତୀତ ଅନ୍ୟ କେହି ଶ୍ରୀଅଙ୍ଗ ସ୍ପର୍ଶ ନକରିବାକୁ ଏସଓପି ହୋଇଛି । ହେଲେ ପ୍ରତି ବର୍ଷ ଏହାର ବ୍ୟତିକ୍ରମ ଘଟୁଛି । ଶ୍ରୀଅଙ୍ଗ ସ୍ପର୍ଶ କରିବାକୁ ଯାତ୍ରୀଙ୍କୁ ସହଯୋଗ କରୁଛନ୍ତି ସେବକ । ଚଳିତ ଥର ଏହି ନିୟମ ବିଷୟରେ ସେମାନଙ୍କୁ ଚେତାଇ ଦିଆଯିବା ସହ ବୈଠକ ମଧ୍ୟ କରାଯାଇଥିଲା । ଏସଓପି ଆଧାରରେ ସବୁକିଛି କରିବାକୁ ପରାମର୍ଶ ଦେଇଥିଲେ ଶ୍ରୀମନ୍ଦିର ମୁଖ୍ୟ ପ୍ରଶାସକ । କିନ୍ତୁ ଏହାର ଅନୁପାଳନରେ କିଛି ଟା ବ୍ୟତିକ୍ରମ ଦେଖାଦେଇଛି । ସଠିକ୍ ଯାଞ୍ଚ ଓ ଭିଡିଓ ଫୁଟେଜ ଦେଖିବା ପରେ ପଦକ୍ଷେପ ନିଆଯିବ ବୋଲି କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ପୁରୀ ଏସପି।