Argus News - ମଦର ଅନଲାଇନ ହୋମ୍ ଡେଲିଭରୀ ଉପରେ ବି ଲାଗିଲା ରୋକ୍

ଆଜି ବିଧାନସଭାରେ ନୂଆ ଅବକାରୀ ନୀତି ଉପସ୍ଥାପନ କରିଛନ୍ତି ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ । ନୂତନ ଅବକାରୀ ନୀତିରେ ଅନେକ ସଂଶୋଧନ ସହ ଆସିଛି ସଂସ୍କାର । ଆଉ ଖୋଲିବନି ନୂଆ ମଦ ଦୋକାନ । ମଦ ଅନଲାଇନ ହୋମ୍ ଡେଲିଭରୀ ଉପରେ ବି ଲାଗିଲା ରୋକ୍ । ପୁରୀ ଶ୍ରୀମନ୍ଦିର ଚାରିପାଖେ ଓ ବଡ଼ଦାଣ୍ଡରେ ମିଳିବନି ମଦ।

ଆଜି ବିଧାନସଭାରେ ନୂଆ ଅବକାରୀ ନୀତି ଉପସ୍ଥାପନ କରିଛନ୍ତି ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ । ନୂତନ ଅବକାରୀ ନୀତିରେ ଅନେକ ସଂଶୋଧନ ସହ ଆସିଛି ସଂସ୍କାର । ତେବେ ସବୁଠାରୁ ଗୁରୁତ୍ବପୂର୍ଣ୍ଣ ସଂଶୋଧନ ଭାବେ Minimum Guaranteed Quantity ବା MGQ ବଳଦରେ Minimum Guaranteed Excise Revenue ଲାଗୁ କରାଯାଇଛି । ଏହାଦ୍ବାରା ସରକାରୀ ରାଜସ୍ବ ସୁରକ୍ଷିତ କରିବାକୁ ଲକ୍ଷ୍ୟ ରଖିଛନ୍ତି ସରକାର ।

MGER ଅନୂଯାୟୀ ବ୍ୟବସାୟୀମାନେ ଆବଶ୍ୟକ ଅନୁସାରେ ଷ୍ଟକ ଉଠାଇବେ । ଯାହାଦ୍ବାରା "କୁଚିଆ" ବିକ୍ରୟ ପ୍ରଥା ବନ୍ଦ ହୋଇପାରିବ ବୋଲି ସରକାର ଆଶା ରଖିଛନ୍ତି ସରକାର । ଏହାସହ ଅବକାରୀ ଶୁଳ୍କ ଉପରେ ୦.୫% ଡି-ଆଡିକ୍ସନ ସେସ ପ୍ରବର୍ତ୍ତନ କରାଯାଇଛି । ଏହି ସେସ୍‌ରୁ ଆସୁଥିବା ଆୟକୁ ଖର୍ଚ୍ଚ କରି ରାଜ୍ୟର ବିଭିନ୍ନ ଅଞ୍ଚଳରେ ମଡେଲ ଡି-ଆଡିକ୍ସନ କେନ୍ଦ୍ର ସ୍ଥାପନ ଓ ସୁଦୃଢ଼ କରାଯିବ ।

ବିଭିନ୍ନ ଅବକାରୀ ଲାଇସେକ୍ସ ପାଇଁ ଆବେଦନ ଶୁଳ୍କ ୧୦% ବଢ଼ାଯିବ ଏବଂ ଲାଇସେକ୍ସ ଶୁଳ୍କ ପ୍ରତି ବର୍ଷ ୧୦ ରୁ ୨୦% ପର୍ଯ୍ୟନ୍ତ ବୃଦ୍ଧି ପାଇବ । ବିଦେଶୀ ଓ ଦେଶୀ ମଦ ଉପରେ ଅବକାରୀ ଶୁଳ୍କ ମଧ୍ୟ ବଢ଼ାଯାଇଛି । ଗ୍ରାମାଞ୍ଚଳରେ ଖୋଲିବନି ନୂଆ ଠିପି ଖୋଲା ମଦ ଦୋକାନ । କେବଳ ଶିଳ୍ପାଞ୍ଚଳରେ ଥିବା ୩-ତାରକା ଓ ତାହା ଠାରୁ ଉପର ହୋଟେଲ୍‌ ଓ କ୍ଲବ୍‌ ଏଥିରୁ ଛାଡ଼ ରହିବେ ।

ତେବେ ପ୍ରତି ମଦ ଉତ୍ପାଦନ ୟୁନିଟ୍ ଓ ଦୋକାନ ଗୁଡ଼ିକ ସିସିଟିଭି ନିରୀକ୍ଷଣରେ ରହିବ । ପ୍ରତି ଅବକାରୀ କମିଶନରଙ୍କ କାର୍ଯ୍ୟାଳୟ ଓ ଜିଲ୍ଲା କାର୍ଯ୍ୟାଳୟ ମାନେ ସିସି ଟିଭି ମାଧ୍ୟମରେ ନଜର ରଖିବେ । ଉନ୍ନତମାନର ପ୍ୟାକେଜିଂ ସହ ୧୮୦ ml ମଦ ଟେଟ୍ରା ପ୍ୟାକରେ ବିକ୍ରି ହେବ ।

ତେବେ ନୂଆ ଅବକାରୀ ନୀତିକୁ ମଦ ବ୍ୟବସାୟୀଙ୍କ ପକ୍ଷରୁ ସ୍ୱାଗତ କରାଯାଇଛି । ଅନ୍ୟପଟେ ନୂଆ ଅବକାରୀ ନୀତି ଆସିବା ପରେ ତେଜିଛି ରାଜନୀତି । ବିଜେଡି ଓ କଂଗ୍ରେସ ଏହି ନୀତିକୁ କଡା ସମାଲୋଚନା କରିଛନ୍ତି । ନୀତିରେ ଆଉ ଥରେ ସଂଶୋଧନ ପାଇଁ ଦାବି କରିଛନ୍ତି ବିରୋଧୀ । ନୂଆ ଦୋକାନ ତ ଖୋଲିବନି । କିନ୍ତୁ ଯେଉଁମାନେ ଲଟେରି ମାଧ୍ୟମରେ ମଦ ଦୋକାନ ପାଇଛନ୍ତି, ସେମାନଙ୍କ ଅବଧି ସରିବା ପରେ ନବୀକରଣ କେମିତି ହେବ ବୋଲି ପ୍ରଶ୍ନ ଉଠିଛି ।