ୱାକଫ୍ ସଂଶୋଧନ ପରେ ସାରା ଦେଶରେ ଖୁସିର ଲହରୀ । ରାଜ୍ୟରେ ବି ଗରିବ ମୁସଲମାନ ବି ଖୁସ୍ । ଏତିକି ବେଳେ ସାମ୍ନାକୁ ଆସିଛି ଓଡ଼ିଶାରେ ୱାକଫ୍‌ର ସାଂଘାତିକ କାରନାମା । ଓଡ଼ିଶାରେ ୱାକଫ୍ ଜମି ମାଫିଆଙ୍କ କାମ କରୁଛି । ବାଲେଶ୍ଵରରେ ୱାକଫ୍ ୧୫୦୦ ଏକର ଜମି ମାଡ଼ି ବସିଥିବା ଅଭିଯୋଗ ଆସିଛି । ତାମିଲନାଡୁ, କର୍ଣ୍ଣାଟକ, ବିହାର, ଉତ୍ତର ପ୍ରଦେଶ, କେରଳରେ ଜମି ମାଡି ବସିଥିବା ଅଭିଯୋଗ ରହିଛି ।

ବଡ଼ ଅଭିଯୋଗ ହେଲା ଓଡ଼ିଶାରେ ୱାକଫ୍ ଜମି ମାଫିଆଙ୍କ କାମ କରୁଛି । ଅଭିଯୋଗ ହୋଇଛି ବାଲେଶ୍ଵରରେ ୧୫୦୦ ଏକର ଜମି ମାଡ଼ି ବସିଛି ୱାକଫ୍ । ବାଲେଶ୍ଵର ଭୁଜା ଖିଆ ପିର ଛକରେ ଥିବା ପାଣି ପମ୍ପ ହାଉସକୁ ନେଇ ବିବାଦ । ୧୯୯୭ ପୂର୍ବରୁ ଏହି ସ୍ଥାନ ବାଲେଶ୍ଵର ମ୍ୟୁନିସିପାଲିଟି ନାଁରେ ଖତିୟାନ ରହିଥିଲା । ଖତିୟାନ ନଂ ଥିଲା ୧୧୭୯ । ୩୮୦ ନଂ ପ୍ଲଟ ବାଲେଶ୍ଵର ପୌରସଂସ୍ଥା ନାଁରେ ରହିଥିଲା ।

ଅଭିଯୋଗ ହୋଇଛି, ନିକଟରେ ରହୁଥିବା କିଛି ମୁସଲମାନ ସମ୍ପ୍ରଦାୟର ଗୋଷ୍ଠୀ ପାଣି ପମ୍ପ ହାଉସ କାମକୁ ବନ୍ଦ କରିଥିଲେ । ଉକ୍ତ ସ୍ଥାନଟି ଆମର ବା ୱାକଫ ବୋର୍ଡର ବୋଲି ସେମାନେ କହୁଛନ୍ତି । ଏମିତି କେମିତି ହେଲା ବୋଲି ପ୍ରଶ୍ନ କରିଛନ୍ତି ସ୍ଥାନୀୟ ବାସିନ୍ଦା ।

ସମାନ୍ତରାଳ ଭାବେ ବାଲେଶ୍ଵର ବଙ୍କା ଖଜୁରୀ ଛକରେ ନିର୍ମାଣ ହେଉଥିବା ମଜାରକୁ ନେଇ ମଧ୍ୟ ଉପଜିଲ୍ଲାପାଳଙ୍କ ନିକଟରେ ଅଭିଯୋଗ ହୋଇଥିଲା । ସର୍ବ ସାଧାରଣ ଜାଗା ଜଣେ ନିର୍ଦ୍ଦିଷ୍ଟ ବ୍ୟକ୍ତି ନାମରେ କେମିତି ହେଲା ବୋଲି ବିରୋଧ ହୋଇଥିଲା । ଏହା ପରେ କାମ ମଧ୍ୟ ବନ୍ଦ ହୋଇଥିଲା । ସମସ୍ତ ଜାଗାର କିସମ କିଭଳି ବଦଳିଲା ତାକୁ ନେଇ ଏବେ ପ୍ରଶ୍ନ ଉଠିଛି । ସୂଚନା ଅନୁସାରେ ଜିଲ୍ଲାରେ ୧୫ ଶହ ଏକର ଜମି ଏବେ ୱାକଫ ବୋର୍ଡରେ ରହିଛି । କେମିତି କିଭଳି ଭାବେ ଏତେ ଜମିର କିସମ ବଦଳିଲା ତାକୁ ନେଇ ସନ୍ଦେହ ସୃଷ୍ଟି ହୋଇଛି ।

ନଜର ପକାନ୍ତୁ ଦେଶର ବିଭିନ୍ନ ଭାଗରେ କିପରି ୱାକଫ୍ ଜମି ବିବାଦ ଲାଗି ରହିଛି...

୧) ତାମିଲନାଡୁର ଥିରୁଚେନ୍‌ଥୁରାଇ ଗାଁରେ ଜଣେ ବ୍ୟକ୍ତି ତାଙ୍କ ଜମିକୁ ବହୁ ଦିନ ଧରି ବିକ୍ରି କରି ପାରୁନଥିଲେ । ତାଙ୍କ ଗାଁରେ ଥିବା ସମସ୍ତ ଜମି ଉପରେ ୱାକଫ୍ ବୋର୍ଡ ଦାବି ରଖିଥିଲା । ଏଥିଯୋଗୁଁ ଝିଅ ବାହାଘର ପାଇଁ ଆଣିଥିବା ଋଣ ପରିଶୋଧ କରିବାରେ ସମସ୍ୟା ହୋଇଥିଲା ।

୨) ବିହାର ଗୋବିନ୍ଦପୁର ଗାଁର ସବୁ ଜମିକୁ ୱାକଫ୍ ବୋର୍ଡ ନିଜର ବୋଲି ଦାବି କରିଥିଲା । ଏଥିଯୋଗୁଁ ଅନେକ ଲୋକ ପ୍ରଭାବିତ ହୋଇଛନ୍ତି । ପାଟନା ହାଇକୋର୍ଟରେ ଏହି ମାମଲା ଏବେ ବିଚାରାଧୀନ ଅଛି ।

୩) କେରଳର ଏର୍ଣ୍ଣାକୁଲମ୍ ଜିଲ୍ଲାରେ ୬୦୦ ଖ୍ରୀଷ୍ଟିଆନ ପରିବାରର ସମ୍ପତ୍ତିକୁ ୱାକଫ୍ ବୋର୍ଡ ନିଜ ଅଧୀନରେ ରଖିଥିଲେ । ଜମି ଫେରାଇବାକୁ ସେମାନେ ବାରମ୍ବାର ୱାକଫ୍ ବୋର୍ଡର ଦ୍ଵାରସ୍ଥ ହୋଇଥିଲେ । ଏନେଇ ସେମାନେ ୱାକଫ୍ ଯୁଗ୍ମ ସଂସଦୀୟ କମିଟି ନିକଟରେ ଅଭିଯୋଗ କରିଥିଲେ ।

୪) କର୍ଣ୍ଣାଟକର ବିଜୟପୁରା ଅଞ୍ଚଳରେ ପ୍ରାୟ ୧୫ ହଜାର ଏକର ଜମିକୁ ୱାକଫ୍ ବୋର୍ଡ ନିଜର ଦର୍ଶାଇଥିଲା । ଏହାକୁ ନେଇ ଶହ ଶହ ଚାଷୀ ପ୍ରତିବାଦ କରିଥିଲେ ।

୫) ଉତ୍ତରପ୍ରଦେଶ ଓ୍ବାକଫ୍ ବୋର୍ଡରେ ବ୍ୟାପକ ଦୁର୍ନୀତି ଓ ଅନିୟମିତତା ହୋଇଥିବା ଅନେକ ଅଭିଯୋଗ ହୋଇଥିଲା ।