ଜଙ୍ଗଲ ପାଲଟିଛି ୩୦ ଲକ୍ଷ ୮୩ ହଜାର ଟଙ୍କା ବ୍ୟୟରେ ନିର୍ମିତ `ଆଦର୍ଶ ଗ୍ରାମୀଣ ପାର୍କ' । ଗେଟରେ ତାଲା ଝୁଲୁଥିବା ବେଳେ ପାର୍କଟି ଭାଙ୍ଗିରୁଜି ଗଲାଣି । ଗଛଲତା ମାଡି ଚତୁଃପାର୍ଶ୍ଵ ଶ୍ରୀହୀନ ହୋଇପଡି ରହିଛି । ହରିଚନ୍ଦନପୁର ବରେଇଗୋଡା ପଞ୍ଚାୟତ ତାଳପଦା ଗାଁରେ ଥିବା ଏହି ପାର୍କ ଗତ ୨୦୨୨-୨୩ ଆର୍ଥିକ ବର୍ଷରେ ନିର୍ମାଣ କରାଯାଇଥିଲା । ମାତ୍ର କାମ ସମ୍ପୂର୍ଣ୍ଣ ନକରି ଛୁ ମାରିଛି ଠିକାଦାର। ପାର୍କ ନିର୍ମାଣ ନାଁରେ ଡିଏମଏଫ୍ ଫଣ୍ଡରୁ ଆସିଥିବା ଟଙ୍କା ହରିଲୁଟ୍ ହୋଇଥିଲାବେଳେ ଅସମ୍ପୂର୍ଣ୍ଣ ପାର୍କ ଲୋକଙ୍କ କୌଣସି କାମରେ ଆସୁନାହିଁ ।

ସେହିପରି କଣ୍ଟାଝରି ଗାଁରେ ନାଳ ଉପରେ ପୋଲ ନିର୍ମାଣ ସହ ୧ କିମି ରାସ୍ତା ନିର୍ମାଣ ପାଇଁ ଜିଲ୍ଲା ଖଣିଜ ପାଣ୍ଠିରୁ ୪୬୮.୭୧ ଲକ୍ଷ ଟଙ୍କା ଅନୁଦାନ ଆସିଥିଲା । ଖାଲି ନାଁକୁ ସୂଚନା ଫଳକ ଲଗାଯାଇଛି । ଗତ ଫେବୃଆରୀ ମାସରେ ଅବଧି ସରିଥିଲାବେଳେ ଆଜି ପର୍ଯ୍ୟନ୍ତ ପୋଲ ନିର୍ମାଣ ଆରମ୍ଭ ହୋଇନାହିଁ । କଣ୍ଟାଝରି ଗାଁର ଏହି ନାଳରେ ବର୍ଷାଦିନେ ପ୍ରବଳ ପାଣିର ସୁଅ ଚାଲିଥାଏ । ଫଳରେ ଯାତାୟତରେ ସମସ୍ୟା ଭୋଗିଥାନ୍ତି ଗ୍ରାମବାସୀ ।

ଅର୍ଦ୍ଧ ନିର୍ମିତ ଗ୍ରାମୀଣ ପାର୍କ ଏବଂ ପୋଲ ନିର୍ମାଣ ନେଇ ଗ୍ରାମବାସୀ ଅନେକବାର ପ୍ରଶାସନ ଏବଂ ଜନ ପ୍ରତିନିଧିଙ୍କୁ ଲିଖିତ ଅଭିଯୋଗ କରିଛନ୍ତି । ମାତ୍ର ଫଳ ଶୂନ । ଏଠି ପ୍ରଶ୍ନ, ଖଣି ପ୍ରଭାବିତ ଅଞ୍ଚଳରେ ବିକାଶ ପାଇଁ କେନ୍ଦ୍ର ସରକାର ଦେଇଥିଲେ ଡିଏମଏଫ୍ ପାଣ୍ଠି । ମାତ୍ର ଗତ ସରକାରରେ ଟଙ୍କା ସଠିକ୍ ଭାବେ ବିନିଯୋଗ ହୋଇନି ଯଦି ଗଲା କୁଆଡେ ? । ଗରିବଙ୍କ ପାଇଁ ଥିବା ଟଙ୍କା ଖାଇଲା କିଏ ? ।