ନୟାଗଡ଼ ଜିଲ୍ଲା ନୂଆଗାଁ ବ୍ଲକ ଅନ୍ତର୍ଗତ ଡିହସାହି ହେଉଛି ଏମିତି ଏକ ଗାଁ ଯେଉଁଠି ଏବେବି ଅପହଞ୍ଚ ସରକାରୀ ଯୋଜନା l ଗାଁକୁ ଗମନା ଗମନ ପାଇଁ ପକ୍କା ସଡ଼କ ତ ଦୂରର କଥା କାଦୁଅ ପଚ ପଚ ରାସ୍ତାରେ ବିପଦଶଂକୁଳ ଅବସ୍ଥାରେ ଯାତାୟାତ କରୁଛନ୍ତି ଗାଁ ଲୋକେ l ସେପଟେ ପିଇବା ପାଣି ପାଇଁ ଗାଁରେ ନଳକୂପ ନଥିବା ବେଳେ ବାର୍ଦ୍ଧକ୍ୟ ଭତ୍ତା ଓ ଆବାସ ଯୋଜନା ପାଇବାରୁ ବଂଚିତ ହୋଇରହିଛନ୍ତି ଗାଁରେ ରହୁଥିବା 50 ଖଣ୍ଡ ପରିବାର l ଶିକ୍ଷା, ସ୍ୱାସ୍ଥ୍ୟ, ଗମନାଗମନ ସବୁକିଛି ଅପହଞ୍ଚ ଥିବା ଏହୀ ଗାଁରେ ଅଧିକାଂଶ ଲୋକ ଆବାସ ଘର ନପାଇ ଜରିପାଲ ତଳେ ଜୀବନ ବିତାଉଛନ୍ତି l

ପ୍ରାୟ 50 ଟି ଆଦିବାସୀ, ଦଳିତ ଓ ପଛୁଆ ବର୍ଗର ପରିବାର ରହୁଥିବା ନୟାଗଡ଼ ଜିଲ୍ଲାର ଏହି ଦୁର୍ଗମ ଗାଁରେ ଭୋଟବେଳେ ଗ୍ରାମର ବିକାଶ କଥା କହି ନେତାମାନେ ଭୋଟ ନେଉଥିବା ବେଳେ ନିର୍ବାଚନ ପରେ ନେତାଙ୍କ ଛାଇ ମାଡ଼େ ନାହିଁ ବୋଲି ଲୋକେ ଅଭିଯୋଗ କରିଛନ୍ତି l ବର୍ଷ ବର୍ଷ ଧରି ସରକାରୀ ଅବହେଳାର ଶିକାର ହେଉଥିବା ଏହି ଗାଁ ର ଲୋକେ ବାରମ୍ବାର ନିଜର ଦାବିନେଇ ପ୍ରଶାସନ, ଜିଲ୍ଲାପାଳ ଓ ସ୍ଥାନୀୟ ନେତାଙ୍କ ନିକଟରେ ଅଭିଯୋଗ କରିବାପରେ ମଧ୍ୟ କୌଣସି ସୁଫଳ ମିଳିପାରିନାହିଁ l ଯାହାକୁ ନେଇ ଗ୍ରାମବାସୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି l

ସରକାରଙ୍କ ଯୋଜନା ଅନେକ କିନ୍ତୁ ଗ୍ରାଉଣ୍ଡରେ ଲୋକ ଏହାର ଲାଭ ପାଉ ନାହନ୍ତି। ଫଳରେ ଆଜିବି ଅସୁବିଧାରେ ଜୀବନ ଯାପନ କରୁଛନ୍ତି ଉପାନ୍ତବାସୀ। କେବେ ହେଉଛି ଏହି ଅଞ୍ଚଳବାସୀଙ୍କ ମୌଳିକ ସମସ୍ୟାର ସମାଧାନ ତାହା ଦେଖିବାକୁ ବାକି ରହିଲା l