ଭୁବନେଶ୍ୱର: ଉପ ମୁଖ୍ୟମନ୍ତ୍ରୀଙ୍କ ହାତରେ ଲାଲଟହଟହ ଡ୍ରାଗନ ଫ୍ରୁଟ୍‌ । ଦୃଶ୍ୟ ଦେଖିବା ପରେ ଯେ କେହି ବି ଭାବିବେ ବୋଧହୁଏ ମନ୍ତ୍ରୀ କିଣିଛନ୍ତି ଘରକୁ ନେବେ । ହେଲେ ଯେବେ ଜାଣିବେ ଇଏ ମନ୍ତ୍ରୀଙ୍କ ନିଜ କ୍ଷେତର ଫସଲ ଆଉ ସିଏ ନିଜେ ହିଁ ଏହାକୁ ଚାଷୀ କରିଛନ୍ତି । କଥାଟା ବିଶ୍ଵାସ ଲାଗୁନଥିବ । ଭାବୁଥିବେ ଉପମୁଖ୍ୟମନ୍ତ୍ରୀଙ୍କ ଦାୟିତ୍ଵ କେତେ , ସବୁବେଳେ ସେ ବ୍ୟସ୍ତ । ଚାଷ କରିବାକୁ ତାଙ୍କ ପାଖରେ ସମୟ କାହିଁ ? ଦର୍ଶକବନ୍ଧୁ କଥାରେ ଅଛି ଚାଷ କାମ ଯାହାର କି ଆନନ୍ଦ ତାହାର । ଏ କଥାକୁ ଅକ୍ଷରେ ଅକ୍ଷରେ ବୁଝିଛନ୍ତି କୃଷିମନ୍ତ୍ରୀ । ସେଇଥି ଲାଗି ତ କରୋନା ସମୟରୁ ନିଜ କ୍ଷେତରେ ନିଜେ କରୁଛନ୍ତି ଡ୍ରାଗନ ଚାଷ । ଏବେ ଅମଳ ହେବା ପରେ ସଚିବଙ୍କୁ ସାଙ୍ଗରେ ନେଇ ୪ କ୍ଵିଣ୍ଟାଲ ଡ୍ରାଗନ ଫ୍ରୁଟ ପଠାଇଲେ ଦୁବାଇ । ଯାହା ଏବେ ପୁରା ରାଇଜଟାଜାକରେ ଚହଳ ପକାଇଲାଣି ।

ପ୍ରଥମ ବର୍ଷ ୪୦ କୁଇଣ୍ଟାଲ ଏବଂ ଧୀରେ ଧୀରେ ଚାଷ ଜମିରୁ ୬୦ କୁଇଣ୍ଟାଲ ପର୍ଯ୍ୟନ୍ତ ଏହି ଫଳ  ହୋଇଥିଲା । ଏହାକୁ ୨ ରୁ ୩ ମାସ ଧରି ଫ୍ରିଜରେ ରଖାଯାଇପାରିବ । ଉପ ମୁଖ୍ୟମନ୍ତ୍ରୀ ଏହି ଅବସରରେ କହିଥିଲେ ଚାଷ ତାଙ୍କୁ ବେଶ ଆତ୍ମସନ୍ତୋଷ ଦିଏ ।  ରାଜନୀତି ଭିତରେ ମଧ୍ୟ ଚାଷ ପାଇଁ ସମୟ କେବେ କେବେ ବହାରିଯାଏ। କିନ୍ତୁ ସମସ୍ତେ ଜୈବିକ ଉପାୟରେ ଚାଷ କରିବା ଦରକାର। ଯାହା ସେ ଇଣ୍ଟରନେଟକୁ ପାଥେୟ କରି ଏକ ସଫଳତା ପାଇଥିବା କହିଛନ୍ତି। ଆଜି ପାଖା ପାଖି ୪ କୁଇଣ୍ଟାଲ ଫଳ ଯାଇଛି ଦୁବାଇ। ଆଗକୁ ଆହୁରି ଓଡିଶାରୁ ବିଭିନ୍ନ ଚାଷୀ ଏଭଳି ଚାଷ କରି ସମୃଦ୍ଧ ହୋଇପାରିବେ । କ୍ୟାନ୍ସର ଏବଂ ଡାଇବେଟିସ ଲୋକଙ୍କ ପାଇଁ ଏହା ବେଶ ଉପକାରୀ ଫଳ ବୋଲି ସେ କହିଛନ୍ତି। 

ପ୍ରଥମ ଥର ପାଇଁ ଓଡିଶାରୁ ବିଦେଶ ଯାଇଛି ଡ୍ରାଗନ ଫ୍ରୁଟ୍ । କିନ୍ତୁ ଏହା ପୂର୍ବରୁ ଢେଙ୍କାନାଳର ଆମ୍ବ , ବିଭିନ୍ନ ପ୍ରକାର ପନିପରିବା ମଧ୍ୟ ବାହାରକୁ ଟ୍ରାନ୍ସପୋର୍ଟ ହୋଇଛି ।  ଯାହା ଓଡିଶା ଚାଷୀ ମାନଙ୍କ ପାଇଁ ଭଲ କଥା ବୋଲି କହିଛନ୍ତି ଉଦ୍ୟୋଗୀ ଅମ୍ଳାନ ପଟ୍ଟନାୟକ । ଏହା ପ୍ରଥମ ପର୍ଯ୍ୟାୟ ଆଗକୁ ଓଡ଼ିଶାର କଫି ମଧ୍ୟ ବାହାରକୁ ପଠାଇବାର ପ୍ଲାନ କରାଯାଉଛି । ସେପଟେ ମୟୂରଭଞ୍ଜ ଓ କୋରାପୁଟରୁ ଆମ୍ବ ମଧ୍ୟ ଯାଉଛି । ପୋଟଳ, କଲରା ସହ ଝୁଡ଼ଙ୍ଗ, ଭେଣ୍ଡି ମଧ୍ୟ ଦୁବାଇ, କାତାର ଓ ଇଟାଲୀ ମଧ୍ୟ ଯାଇଛି । ୨୪ ମେଟ୍ରିକ ଟନ ପରିବା ବାହାରକୁ ଯାଇଛି । 

ତେବେ ଆମ ରାଜ୍ୟରୁ ପ୍ରଥମ ଥର ଡ୍ରାଗନ ଫ୍ରୁଟ୍ ବାହାରକୁ ଟ୍ରାନ୍ସପୋର୍ଟ ହେବା ବେଶ ଭଲ କଥା । ସେପଟେ ଚାଷ ଓ ଚାଷୀଙ୍କୁ ଗୁରୁତ୍ୱ ଦେଉଥିବା ରାଜ୍ୟ ସରକାର ଆଗାମୀ ଦିନରେ ଚାଷୀଙ୍କୁ ବେଶ ଗୁରୁତ୍ୱ ଦେବେ ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ।