ଅର୍ଗସ ବ୍ୟୁରୋ: ଓଡ଼ିଶା ମୁହାଁ ହେବେ ନିବେଶକାରି ବା ପୁଞ୍ଜିପତି। ରାଜ୍ୟକୁ ଆସିବ ବିପୁଳ ଶିଳ୍ପ ଓ ପୁଞ୍ଜି । ସିଙ୍ଗାପୁରରୁ ଓଡ଼ିଶା ପାଇଁ ନିବେଶକାରୀଙ୍କୁ ଆକୃଷ୍ଟ କରିବା ପାଇଁ ଛଅ ଦିନିଆ ସିଙ୍ଗାପୁର ଗସ୍ତରେ ଯିବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ହଟିବ ବେକାରୀ ସମସ୍ୟା, ସୃଷ୍ଟି ହେବ ନିଯୁକ୍ତିର ଗନ୍ତାଘର। ପାରାଦୀପରୁ ରାଜ୍ୟବାସୀଙ୍କୁ ଖୁସି ଖବର ଦେଲେ ମୁଖ୍ୟମନ୍ତ୍ରୀ । ଆସନ୍ତାକାଲିଠାରୁ ସିଙ୍ଗାପୁର ଗସ୍ତରେ ବାହାରିବେ ସିଏମ୍ । ଉତ୍କର୍ଷ ଓଡ଼ିଶା ମେକ୍-ଇନ୍‌ ଓଡ଼ିଶା କାର୍ଯ୍ୟକ୍ରମ ପାଇଁ ସିଙ୍ଗାପୁରରେ ଶିଳ୍ପପତି ତଥା ପୁଞ୍ଜି ନିବେଶକାରୀଙ୍କୁ ଭେଟିବେ। ରାଜ୍ୟକୁ କେଉଁ ଭଳି ଶିଳ୍ପ ଓ ପୁଞ୍ଜି ନିବେଶକାରୀ ଓଡ଼ିଶାରେ ବିନିଯୋଗ କରିବେ, ସେନେଇ ହେବ ଆଲୋଚନା । ତା ସହ ସିଙ୍ଗାପୁରର କିଛି ଶିଳ୍ପ ଅଞ୍ଚଳ ପରିଦର୍ଶନ କରିପାରନ୍ତି ମୁଖ୍ୟମନ୍ତ୍ରୀ । ସିଙ୍ଗାପୁର ଉପ ପ୍ରଧାନମନ୍ତ୍ରୀ, ଶିଳ୍ପମନ୍ତ୍ରୀ, ବୈଦେଶିକ ବ୍ୟାପାର ମନ୍ତ୍ରୀଙ୍କ ସହ ରାଷ୍ଟ୍ରଦୂତଙ୍କୁ ବି ଭେଟିବାର କାର୍ଯ୍ୟକ୍ରମ ରହିଛି । ଏହି ଗସ୍ତ ସମୟରେ ମୁଖ୍ୟମନ୍ତ୍ରୀଙ୍କ ସହ ଶିଳ୍ପମନ୍ତ୍ରୀ ଓ ଅନ୍ୟାନ୍ୟ ମନ୍ତ୍ରୀଙ୍କ ସମତେ ବରିଷ୍ଠ ଅଧିକାରୀ ସାମିଲ ହେବେ। 

ପୂର୍ବ ନବୀନ ସରକାରରେ ଶିଳ୍ପାୟନ ପାଲଟିଥିଲା ପ୍ରତାରଣା। ମେକ ଇନ୍ ଓଡ଼ିଶା, ରୋଡ ସୋ, ବିଦେଶ ଯାତ୍ରା ସବୁ ଫେଲ୍। ପୂର୍ବ ସରକାରରେ ମେକ ଇନ ଓଡିଶା ଥିଲା ଧୂଆଁ ବାଣ । ଏବେ ବିଜେପି ସରକାର କ୍ଷମତାକୁ ଆସିବା ପରେ ପୁଞ୍ଜିନିବେଶକାରୀଙ୍କ ଆଗ୍ରହ ବଢିଛି । ଯାହା ଦେଖିବାକୁ ମିଳିଥିଲା ମୁମ୍ବାଇ ନିବେଶକ ସମ୍ମିଳନୀ ଓ ରୋଡ ସୋରେ । 300ରୁ ଅଧିକ ନିବେଶକଙ୍କ ସହ ଆଲୋଚନା କରିଥିଲେ ସିଏମ । ନିକଟରେ ଦିଲ୍ଲୀରେ ନିବେଶକ ସମ୍ମିଳନୀରେ ଭାଗ ନେଇଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । କ୍ଷମତାକୁ ଆସିବାର ପ୍ରଥମ ୧୦୦ ଦିନରେ ବିଜେପି ସରକାର ୪୫ ହଜାର କୋଟି ପୁଞ୍ଜିନିବେଶକୁ ମଞ୍ଜୁର କରିଛି । ଆଗାମୀ 5ବର୍ଷରେ 5ଲକ୍ଷ କୋଟିର ପୁଞ୍ଜି ନିବେଶ ଲକ୍ଷ୍ୟ ରହିଛି । 

ନବୀନଙ୍କ 24 ବର୍ଷ ଶାସନରେ ସମୟରେ ରାଜ୍ୟରେ ବନ୍ଦ ହୋଇଯାଇଥିଲା ୩୫ଟି ବୃହତ୍ ଶିଳ୍ପ । 15,315 ମଧ୍ୟମ, କ୍ଷୁଦ୍ର ଓ ଅଣୁ ଶିଳ୍ପରେ ବି ପଡ଼ିଛି ତାଲା । ବିଧାନସଭାରେ ଶିଳ୍ପ ମନ୍ତ୍ରୀଙ୍କ ତଥ୍ୟରୁ ସାମ୍ନାକୁ ଆସିଥିଲା ସତ । ସେହିଭଳି 4 ବର୍ଷରେ ବିଦେଶୀ ପୁଞ୍ଜିନିବେଶ ଥିଲା ମାତ୍ର 1277 କୋଟି ଟଙ୍କା, ଓଡ଼ିଶା ରହିଥିଲା 20ତମ ସ୍ଥାନରେ। କିନ୍ତୁ ବିଜେପି ସରକାର କ୍ଷମତାକୁ ଫେରିବା ପରେ ପସ୍କୋ ଫେରିଛି । ଆଗକୁ ଶିଳ୍ପାୟନର ଗତି ଆହୁରି ବଢିଚାଲିବ ବୋଲି ଆଶା ଉଦଜୀବିତ ହୋଇଛି ।