ଗଜପତି ଜିଲ୍ଲା ରାୟଗଡ ବ୍ଲକର ଗଙ୍ଗାବାଡ ପଞ୍ଚାୟତ ମହେନ୍ଦ୍ରଗିରିର ପାଦ ଦେଶରେ ଥିବା ଅଞ୍ଚଳର ମାଟି, ପାଣି ପବନ ଓଡ଼ିଶାର । କିନ୍ତୁ ଏ ଇଲାକାକୁ ନିଜ କବଜାକୁ ନେବାକୁ ଦୀର୍ଘ ଦିନ ଧରି ଚେଷ୍ଟା କରୁଛି ଆନ୍ଧ୍ର । ଏମାନଙ୍କ କିଛି ଜମି ଜେଜେବାପା ଅମଳରୁ ଆନ୍ଧ୍ରପ୍ରଦେଶ ଅଧିନରେ ରହିଛି । ଯେଉଁଥିପାଇଁ ଗାଁର କିଛି ଲୋକ ଆନ୍ଧ୍ରର ଷଡ଼ଯନ୍ତ୍ରରେ ସାମିଲ ହେବାକୁ ବାଧ୍ୟ ହେଉଛନ୍ତି । ଆଉ କିଛି ଓଡ଼ିଶା ସପକ୍ଷରେ ବାହାରି ପ୍ରତିବାଦ କରୁଛନ୍ତି । ପ୍ରତ୍ୟେକ ସପ୍ତାହରେ ଦୁଇ ଥର ଆନ୍ଧ୍ର ପ୍ରଦେଶର ଅଧିକାରୀମାନେ ଗାଁକୁ ଆସି ଗ୍ରାମବାସୀଙ୍କୁ ପ୍ରଲୋଭନ ଦେଉଛନ୍ତି । ଆନ୍ଧ୍ରରେ ମିଶିଗଲେ ପିଲାଙ୍କ ପାଠପଢା ପାଇଁ ୧୫ ହଜାର ଟଙ୍କା, ଭିନ୍ନକ୍ଷମ ଭତ୍ତା ୪ ହଜାର ଟଙ୍କା, ବର୍ଷକୁ ରୋଷେଇ ପାଇଁ ୩ଟି ମାଗଣା ଗ୍ୟାସ, ଚାଷୀଙ୍କ ପାଇଁ ଟଙ୍କା, ମାଗଣା ବସ୍ ସେବା ଯୋଗାଇ ଦେବାକୁ କହୁଛନ୍ତି । ପ୍ରଲୋଭନର ଲମ୍ବା ତାଲିକା ଥିବା ଲିଫଲେଟ ବି ବାଣ୍ଟୁଛନ୍ତି ।

ଗଙ୍ଗାବାଡ ପଞ୍ଚାୟତର ଅମାରିଙ୍ଗି ଗାଁ । ଏହି ଗାଁକୁ ମଧ୍ୟ ଆନ୍ଧ୍ର ଅଧିକାରୀ ଆସି ଏହି ସବୁ ସ୍ଥାନ ଆନ୍ଧ୍ରର ବୋଲି କହିବା ସହ ଶୀଘ୍ର ଖାଲି କରିବା ପାଇଁ କହୁଛନ୍ତି । ନଚେତ୍ ସବୁ ଭାଙ୍ଗି ଦେବାକୁ ଧମକ ଦେଉଥିବା କହିଛନ୍ତି ଗ୍ରାମବାସୀ ।

ସେହିପରି ଏ ହେଉଛି ମାଣିକପାଟଣା ଗାଁ । କିଛି ବର୍ଷ ପୂର୍ବେ ପ୍ରଦେଶର ଜଣେ ମନ୍ତ୍ରୀ ଆସି ଓଡ଼ିଶାର ଅଙ୍ଗନବାଡି କେନ୍ଦ୍ରକୁ ଭାଙ୍ଗି ଦେଇ ମାଟିରେ ମିଶାଇ ଦେବାକୁ ଧମକ ଦେଇଥିଲେ । ତାହା ପୁଣି ଜଣେ ଓଡ଼ିଆ ଅତିରିକ୍ତ ଜିଲ୍ଲାପାଳଙ୍କୁ । ତା ପରଠାରୁ ବିଭିନ୍ନ ସମୟରେ ଅନୁପ୍ରବେଶ କରି ଗ୍ରାମବାସୀଙ୍କୁ ପ୍ରଲୋଭିତ କରିବା ସହ ଆନ୍ଧ୍ରପ୍ରଦେଶରେ ମିଶାଇବା ପାଇଁ ଷଡ଼ଯନ୍ତ୍ର କରୁଛି ଆନ୍ଧ୍ର । ଆନ୍ଧ୍ର ପକ୍ଷରୁ ଓଡ଼ିଶା ଗାଁରେ ସର୍ଭେ ହେଉଥିବା ଖବର ପାଇବା ତତ୍ପର ହୋଇଉଠିଛି ଗଜପତି ଜିଲ୍ଲା ପ୍ରଶାସନ । ଯଦି ଆନ୍ଧ୍ର ଏଭଳି କାର୍ଯ୍ୟ ଜାରି ରଖେ, ତା ହେଲେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ଉପଜିଲ୍ଲାପାଳ ।

ଏହି ଅଞ୍ଚଳର ଲୋକଙ୍କୁ ପ୍ରଲୋଭିତ କରି ନିଜ ଆଡକୁ ଆକୃଷ୍ଟ କରିବା‌ ପାଇଁ ବାରମ୍ବାର ପ୍ରୟାସ ଜାରି ରଖିଛି ଆନ୍ଧ୍ର ।‌ ତେଣୁ ଏହାର ଉଚିତ ଜବାବ ଦେବା ଦିଗରେ ସରକାର ପଦକ୍ଷେପ ଗ୍ରହଣ କରିବା ଜରୁରୀ ହୋଇପଡିଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more