ଅନୁଗୁଳ: ବାପା ସାଜିଲା ସୈତାନ୍ । ଜଙ୍ଗଲକୁ ନେଇ ଛୁଆଙ୍କୁ ଦେଇ ଦେଲା ବିଷ । ପାରିବାରିକ କଳହକୁ ନେଇ ଏଭଳି କାଣ୍ଡ ଭିଆଇଛି ବାପା । ଦୁଇ ନାବାଳକ ପୁଅକୁ ନିଛାଟିଆ ଜଙ୍ଗଲରେ ବିଷ ଦେଇ ପଳାଇବାକୁ ଉଦ୍ୟମ ବେଳେ ଗ୍ରାମବାସୀଙ୍କ ହାତରେ ଧରା ପଡ଼ିଛି ବାପା । ଆଉ ଦୁଇ ଛୁଆଙ୍କୁ ନିଜେ ବିଷ ପିଆଇ ଦେଇଥିବା କଥା ବି ମାନିଛି ।

ଆଉ ସବୁଠୁ ଆଶ୍ଚର୍ଯ୍ୟର କଥା ହେଲା ଦୁଇ ଛୁଆ ଶୁକ୍ରବାର ପାଠ ପଢ଼ିବା ପାଇଁ ବିଦ୍ୟାଳୟକୁ ଯାଇଥିଲେ । ସୈତାନ୍ ବାପା ବିଦ୍ୟାଳୟରୁ ଦୁଇ ଛୁଆଙ୍କୁ ନେଇ ଆସିଥିଲା । ଆଉ ଘରଠୁ ଦୂର ବନ୍ତଳା ଥାନା ନୂଆକ୍ଷେତା ଜଙ୍ଗଲରୁ ନେଇ ଯାଇଥିଲା ।

ନିଛାଟିଆ ଜଙ୍ଗଲରେ ଦୁଇ ଛୁଆଙ୍କୁ ଏକାନ୍ତରେ ବିଷ ପିଆଇ ଦେଇଥିଲା । ବଡ଼ ପୁଅର ବୟସ ୧୨ ବର୍ଷ ହୋଇଥିବା ବେଳେ ସାନକୁ ୮ ବର୍ଷ । ସ୍ଥାନୀୟ ଲୋକ ଦୁଇ ଭାଇଙ୍କୁ ଉଦ୍ଧାର କରି ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି ।

ସୂଚନା ଅନୁସାରେ, ଜରପଡ଼ା ଥାନା ଅନ୍ତର୍ଗତ ତୁବେ ଗାଁରେ ଦୁଇ ଭାଇଙ୍କ ଘର । ପାରିବାରିକ କଳହକୁ ନେଇ ବାପା କାଳୀ ଚରଣ ଦୁଇ ପୁଅଙ୍କୁ ବିଷ ପିଆଇ ଦେଇଥିବା ଚର୍ଚ୍ଚା ହେଉଛି । ତେବେ ଦୁଇ ନାବାଳକ ପୁଅକୁ ବାପା କାହିଁକି ବିଷ ପିଆଇଲା ତାହା ସ୍ପଷ୍ଟ ହୋଇ ନାହିଁ । ତେବେ, ଏ ଘଟଣାକୁ ସମସ୍ତେ ନିନ୍ଦା କରୁଛନ୍ତି ।