ଚରମ ଅବହେଳାର ଶିକାର ଓଡ଼ିଆ ମଞ୍ଚ ନାଟକର ଅନ୍ତୁଡ଼ିଶାଳ ଅନ୍ନପୂର୍ଣ୍ଣା ରଙ୍ଗମଞ୍ଚ । ଏଠାରେ ଆଉ ଶୁଭୁନି କଳାକାରଙ୍କ କୋଳାହଳ । କାନ୍ଦୁଛି କଳାର ମଞ୍ଚ, ବିଶ୍ଵନାଟ୍ୟ ଦିବସରେ ଝୁରିଲେ କଳାକାର । ମୁଖଶାଳାରେ ରଙ୍ଗ ବୋଳିଦେଇ ଚୁପ୍ ବସିଯାଇଥିଲେ ତତ୍କାଳୀନ ସରକାର । ଗତକାଲି ମାର୍ଚ୍ଚ ୨୭ ତାରିଖରେ ପାଳିତ ହୋଇଥିଲା ବିଶ୍ୱ ନାଟ୍ୟ ଦିବସ । ବିଭିନ୍ନ ସ୍ଥାନରେ ମଞ୍ଚ ନାଟକର ହୋଇଥିଲା ଜୟଜୟକାର। ନାଟକକୁ ପୁନର୍ଜୀବିତ କରିବା ପାଇଁ ବିଭିନ୍ନ ପ୍ରୟାସ ଦଖିବାକୁ ମିଳିଥିଲା। କହିବକୁ ଗଲେ ନାଟ୍ୟପ୍ରେମୀ ଓ କଳାକାରଙ୍କ ପାଇଁ ଥିଲା ଖୁସିର ଦିନଟିଏ । ହେଲେ ଏହି ଦିନ ଗୁମୁରି ଗୁମୁରି କାନ୍ଦୁଥିଲା ଓଡ଼ିଆ ମଞ୍ଚ ନାଟକର ଅନ୍ତୁଡ଼ିଶାଳ ପୁରୀର ଅନ୍ନପୂର୍ଣ୍ଣା ଥିଏଟର ।

୧୯୪୪ ମସିହାରୁ ସ୍ଥାପିତ ଏହି ରଙ୍ଗମଞ୍ଚ ୯୧ ବର୍ଷରେ ପାଦଦେଲାଣି । ଯାହାକୁ ଐତିହ୍ୟ ଭାବେ ଯତ୍ନର ସହିତ ସାଇତି ରଖି ତାର ଆହୁରି ଶ୍ରୀବୃଦ୍ଧି କରାଯିବା କଥା ସେହି ମଞ୍ଚ ଏବେ ଖୋଜୁଛି ନିଜର ଅସ୍ତିତ୍ୱ । ପୂର୍ବ ସରକାର ବହୁ ପ୍ରତିଶ୍ରୁତି ଦେଇଥିଲେ । ହେଲେ ଅସୁରକ୍ଷିତ କୋଠାରେ ଚାଲିଥିବା ଏହି ରଙ୍ଗମଞ୍ଚର ପୁନଃରୁଦ୍ଧାର ହୋଇପାରିଲା ନାହିଁ । ପରିକ୍ରମା ପ୍ରକଳ୍ପ ନିର୍ମାଣ ସମୟରେ ଏହାର ମୁଖଶାଳାରେ ରଙ୍ଗ ବୋଳିଦେଇ କାମ ସାରିଦେଇଥିଲେ ତତ୍କାଳୀନ ସରକାର । କଳା, ସଂସ୍କୃତିର ସହରରେ ରଙ୍ଗମଞ୍ଚ ପ୍ରତି ଏ ଅବହେଳା କଳାପ୍ରେମୀଙ୍କୁ କ୍ଷୁବ୍ଧ କରିଛି।

ଅନ୍ନପୂର୍ଣ୍ଣା ମଞ୍ଚ ସୃଷ୍ଟି କରିଥିଲା ଦୁଃଖୀରାମ ସ୍ୱାଇଁ, ଭାନୁମତି ଦେବୀ, ମାଷ୍ଟର ମାଣିଆ, ବ୍ୟୋମକେଶ ତ୍ରିପାଠୀ, ରାମଚନ୍ଦ୍ର ପ୍ରତିହାରୀଙ୍କ ଭଳି ପ୍ରତିଭାବାନ ତଥା ଲୋକପ୍ରିୟ କଳାକାରଙ୍କୁ । ଦିନେ ନିଜ ମୁଣ୍ଡରେ ମାଟି ବୋହି ଏହି ମଞ୍ଚକୁ ଗଢି ତୋଳିଥିଲେ କଳାକାର । ଏବେ କଳାକାରର ଛାତିରେ ଛାତିଏ କୋହ। ଏହି ମଞ୍ଚକୁ ନୂଆ ରୂପ ଦେବା ପାଇଁ ଯୋଜନା ଦୀର୍ଘ ଦଶନ୍ଧି ଧରି ଫେଲ୍ ମାରିଛି । ଅସୁରକ୍ଷିତ କୋଠାକୁ ରକ୍ଷଣା ବେକ୍ଷଣ ନକରି ଏହି ଥିଏଟରକୁ ଉପେକ୍ଷିତ କରାଯାଇଛି । ବିଗତ ବର୍ଷରେ ଏହାକୁ ୪ ତାଲା ବିଶିଷ୍ଟ କରି ଲାଇବ୍ରେରୀ, ରିହରସାଲ ରୁମ୍ ଆଦି ତୋଳିବାକୁ ଚିନ୍ତା କରାଯାଇଥିଲା। ହେଲେ ସରକାରୀ ଉଦାସୀନତା ଯୋଗୁଁ ତାହା ସାକାର ହୋଇପାରିନଥିଲା। ଏବେ ନୂଆ ସରକାରରେ ନାଟକର ଏହି ଅନ୍ତୁଡ଼ିଶାଳକୁ ନୂଆ ରୂପ ଦେବାପାଇଁ ଦାବି ହୋଇଛି ।

ଦୀର୍ଘ ତିନି ଦଶନ୍ଧି ଧରି ଅବହେଳାର ଶିକାର ହୋଇଆସିଛି ଏହି ପ୍ରସିଦ୍ଧ ରଙ୍ଗମଞ୍ଚ। ମାଟିରେ ମିଶିବା ପୂର୍ବରୁ ଏହାକୁ ନୂଆ ରୂପ ଦେଇ ପୂର୍ବ ଗୌରବ ଫେରାଇ ଆଣିବାକୁ ପ୍ରୟାସ ଆରମ୍ଭ କରିବେ କି ଡବଲ ଇଞ୍ଜିନ ସରକାର ?