ଅର୍ଗସ ବ୍ୟୁରୋ: ପୂର୍ବତନ ମନ୍ତ୍ରୀ ନବ ଦାସ । ଦିନ ଦ୍ବିପ୍ରହରେ ତାଙ୍କୁ ହତ୍ୟା କରାଗଲା । ନବଙ୍କ ପରେ ଝିଅ ଦୀପାଲି ଦାସ ତାଙ୍କ ଆସନରୁ ହେଲେ ବିଧାୟିକା । କିନ୍ତୁ ଦୀର୍ଘ ଦୁଇ ବର୍ଷ ଧରି ଶାସକ ଦଳର ବିଧାୟିକା ହୋଇ ବି ବାପାଙ୍କ ହତ୍ୟା ନେଇ ଚୁପ୍ ରହିଲେ ଦୀପାଲି । କିଛି ଦିନ ତଳେ ପୋଲିସ ଜରିଆରେ ବାପାଙ୍କୁ ହତ୍ୟା କରାଯାଇଥିବା ଦୀପାଲି କହିବା ପରଠାରୁ ସୃଷ୍ଟି ହୋଇଛି ହଇଚଇ । ଦୁଇ ଦିନ ତଳେ ସିବିଆଇ ତଦନ୍ତ ଦାବି ଉଠାଇ ଦୀପାଳି କହିଥିଲେ ମୁଖ୍ୟମନ୍ତ୍ରୀ ଡାକିଲେ ପରିବାର ଭେଟିବାକୁ ଯିବେ। ଏବେ ସେହି ଦୀପାଳି ପୁଣି ବଦଳାଇଛନ୍ତି ସ୍ବର । କହିଛନ୍ତି ବାପାଙ୍କ ହତ୍ୟାର ସିବିଆଇ ତଦନ୍ତ ପାଇଁ ଲିଖିତ ଭାବେ ଜଣାଇବେ । ପରିବାର ବର୍ଗ ଚାହିଁଲେ ରାଜ୍ୟ ସରକାର ସିବିଆଇ ତଦନ୍ତ କଥା ନିଷ୍ପତ୍ତି ନେଇପାରନ୍ତି ବୋଲି କହିଛନ୍ତି ଆଇନ ମନ୍ତ୍ରୀ ।

ସେପଟେ ନବ ହତ୍ୟାକୁ ନେଇ ବିସ୍ଫୋରକ ବୟାନ ଦେଇଛନ୍ତି ବରଗଡ଼ ସାଂସଦ ପ୍ରଦୀପ ପୁରୋହିତ । କହିଛନ୍ତି ନବୀନ ପଟ୍ଟନାୟକଙ୍କ ପରେ ଯିଏ ଓଡ଼ିଶାର ମୁଖ୍ୟମନ୍ତ୍ରୀ ହେବାକୁ ସ୍ବପ୍ନ ଦେଖୁଥିଲେ ସିଏ ନବ ଦାସ ହତ୍ୟାକାଣ୍ଡର ମୁଖ୍ୟ ଷଡ଼ଯନ୍ତ୍ରକାରୀ । ଆଜି ତାହା ପ୍ରମାଣିତ ହେବାକୁ ଯାଉଛି । ଏଥିସହ ନବଙ୍କ ପରିବାରକୁ ବି ଟାର୍ଗେଟ୍ କରିଛନ୍ତି ପ୍ରଦୀପ। ସିବିଆଇ ତଦନ୍ତ ହେଲେ ପ୍ରକୃତ ସତ ସାମ୍ନାକୁ ଆସିବ ବୋଲି କହିଛନ୍ତି ବିଜେଡି ନେତା ଭୂପିନ୍ଦର ସିଂ ଓ କଂଗ୍ରେସ ନେତା ସନ୍ତୋଷ ସିଂ ସାଲୁଜା ।

ଗୋଟିଏ ପଟେ ସିବିଆଇ ତଦନ୍ତ ଦାବି, ଅନ୍ୟପଟେ ଗତ କିଛି ଦିନ ଭିତରେ ଘଟଣାକୁ ନେଇ ହୋଇଥିବା ଗୋଟିଏ ପରେ ଗୋଟିଏ ଖୁଲାସା ସୃଷ୍ଟି କରିଛି ବଡ଼ ପ୍ରଶ୍ନ । ଗାଏବ ହୋଇଯାଇଛି ନବ ଦାସଙ୍କ ରକ୍ତ ଜୁଡୁବୁଜୁ ସାର୍ଟ ଓ ରକ୍ତ ଛିଟା ଲାଗିଥିବା ଟାଓଏଲ୍ । ପୁଣି ନବ ଦାସଙ୍କ ପଛରେ ଥିବା ଗାଡିରେ 5 ଗନ ସର୍ଟ ହୋଲ୍ ଠାବ ହୋଇଛି । ଏବେ ପ୍ରଶ୍ନ ପ୍ରକୃତରେ ନବଙ୍କୁ ଗୁଳି ମାରିଥିଲା କିଏ ? ଗୋପାଳ ଛଡ଼ା ହତ୍ୟାକାଣ୍ଡରେ ଆଉ କିଏ ଥିଲେ ସାମିଲ ? ନବ ହତ୍ୟାରେ ସାମ୍ନାକୁ ଆସିଛି ସାଂଘାତିକ ଷଡ଼ଯନ୍ତ୍ରର ଦିଗ । ହତ୍ୟା ପଛରେ କେବଳ ହତ୍ୟାକାରୀ ନୁହେଁ ଷଡ଼ଯନ୍ତ୍ରକାରୀ ଥିବା ନେଇ ବଢୁଛି ଚର୍ଚ୍ଚା। ଷଡ଼ଯନ୍ତ୍ରକାରୀ ବିଜେଡି ଭିତରର ବୋଲି କଥା ଉଠୁଥିବାବେଳେ, ସିବିଆଇ ତଦନ୍ତରେ ଷଡ଼ଯନ୍ତ୍ରକାରୀଙ୍କର ମୁଖା ଖୋଲିବ ବୋଲି ଆଶା କରାଯାଉଛି।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV