ଖାଲି ହୋଇଗଲାଣି ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ଅରଖକୁଦା ଅଞ୍ଚଳ । ପୁରୁଷ ଶୂନ୍ୟ ହେଲାଣି ଅରଖକୁଦା ପଞ୍ଚାୟତ। ଏକ ସପ୍ତାହ ପୂର୍ବରୁ ଏକ ହଜାର ମତ୍ସ୍ୟଜୀବୀ କର୍ଣ୍ଣାଟକ ଯାଇଥିବା ବେଳେ ଗତ ୧୪ ତାରିଖରେ ପୁଣି ୩ଟି ବସରେ ୩୦୦ରୁ ଅଧିକ ମତ୍ସ୍ୟଜୀବୀ ଗାଁ ଛାଡ଼ିଛନ୍ତି । ଚିଲିକା ଅବସ୍ଥା ସଙ୍କଟଜନକ ଥିବାରୁ କୁଳବେଉସା ହରାଇଛନ୍ତି ୧୦ ହଜାର ମତ୍ସ୍ୟଜୀବୀ । ଋଣ ସୁଝିବା ଓ ପରିବାର ପତିପୋଷଣ ପାଇଁ ଦାଦନ ଖଟିବା ହିଁ ଏମାନଙ୍କ ଆଗରେ ଏକମାତ୍ର ରାସ୍ତା ।

ଗାଁ ମୁଣ୍ଡରେ ଛିଡ଼ା ହୋଇଥାଏ ବସ୍ । ଚଢୁଛନ୍ତି ଜଣେ ପରେ ଜଣ । ପୁରୁଷ ମହିଳାଙ୍କଠାରୁ ନେଇ ଯୁବକ ଏମିତିକି ନାବାଳକ। କାହା ହାତରେ ଓ କାନ୍ଧରେ ବ୍ୟାଗ, କାହା ମୁଣ୍ଡରେ ବୋଝ। ପରିବାର ପୋଷିବାର ବୋଝ ନେଇ ଭିଟାମାଟି ଛାଡ଼ି ଅନ୍ୟ ରାଜ୍ୟକୁ ଯାଉଛନ୍ତି ମତ୍ସ୍ୟଜୀବୀ । ପୁରୀ ଜିଲ୍ଲା କୃଷ୍ଣପ୍ରସାଦ ଅରଖକୁଦା ପଞ୍ଚାୟତର ଏ ଦୃଶ୍ୟ ଯେତିକି ଚିନ୍ତାଜନକ, ସେତିକି ବିପଜ୍ଜନକ। କାରଣ ଦାଦାନ ଖଟିବାକୁ ଯାଉଥିବା ଲୋକଙ୍କ ମଧ୍ୟରେ ଅଛନ୍ତି ବହୁ ସଂଖ୍ୟାରେ ନାବାଳକ। ସ୍ଥିତି ଏମିତି ଯେ ଅରଖକୁଦା ପଞ୍ଚାୟତ ପ୍ରାୟ ପୁରୁଷ ଶୂନ୍ୟ ହୋଇଗଲାଣି ।

ସପ୍ତାହେ ପୂର୍ବରୁ ଏକ ହଜାରରୁ ଅଧିକ ମତ୍ସ୍ୟଜୀବୀ ଏମିତି ବସରେ ବୋଝେଇ ହୋଇ କର୍ଣ୍ଣାଟକ ଯାଇଥିଲେ। ଆଉ ଇଏ ହେଉଛି ଗତ ୧୪ ତାରିଖର ଦୃଶ୍ୟ। ୩ଟି ବସ୍ ରେ ୩୦୦ରୁ ଅଧିକ ମତ୍ସ୍ୟଜିବୀ ଗାଁ ଛାଡିଛନ୍ତି । କାରଣ ହେଲା ଚିଲିକାର ଅବସ୍ଥା ଯୋଗୁଁ ଜୀବିକା ହରାଇଛନ୍ତି ଏ ସବୁ ମତ୍ସ୍ୟଜୀବୀ ପରିବାର । କୂଳରେ ବନ୍ଧା ହୋଇ ପଡିଛି ଲକ୍ଷ ଲକ୍ଷ ଟଙ୍କାର ଡଙ୍ଗା ଆଉ ଜାଲ। ଆଉ ବ୍ୟାଗ୍ ଧରି ବାହାର ରାଜ୍ୟକୁ ଯାଉଛନ୍ତି ମତ୍ସଜୀବୀ।

ଚିଲିକାରୁ ମତ୍ସ୍ୟ ଉତ୍ପାଦନ କମିବା ପଛରେ ରହିଛି ଅନେକ କାରଣ
ନଂ ୧- ଚିଲିକାକୁ ସଂଯୋଗ ହୋଇଥିବା ୫୨ଟି ନଦୀ ନାଳର ପଟୁ ମାଟି ଦ୍ବାରା ପୋତି ହୋଇ ପଡିଲାଣି ହ୍ରଦ
ନଂ ୨ - ସମୁଦ୍ର ଜୁଆର ପ୍ରଭାବରେ ଚିଲିକା ଓ ସମୁଦ୍ର ମୁହାଣ ପୋତି ହେଉଛି
ନଂ ୩ - ଦ୍ରୁତ ଗତିରେ ବଢ଼ିଚାଲିଛି ନଳ
ନଂ ୪ - ଚିଲିକାରେ ବ୍ୟାପକ ଜିରୋ ନେଟ୍ ଦ୍ବାରା ଚାଲିଥିବା ମାଛ ମରା
ନଂ ୫ - ମାତ୍ରାଧିକ ଯନ୍ତ୍ରଚାଳିତ ବୋଟ୍ ଚଳାଚଳ
ନା ହ୍ରଦ ଖୋଳିବାକୁ ନିଆଯାଉଛି ପଦକ୍ଷେପ ନା ବେଆଇନ ମାଛମରା ବିରୋଧରେ ହେଉଛି କାର୍ଯ୍ୟାନୁଷ୍ଠାନ। ଫଳରେ ଦକ୍ଷିଣ ପାଶ୍ବ ଚିଲିକା ଉପରେ ନିର୍ଭର କରି ବଞ୍ଚୁଥିବା ଅରଖକୁଦା ଓ ଆଖପାଖ ଅଞ୍ଚଳର ୧୦ ହଜାର ମତ୍ସ୍ୟଜୀବୀ ବେଉସା ହରାଇ ବସିଛନ୍ତି।

Argus News | argus news | Odisha Latest News, Breaking News, Trending News, Live TV