ଭୁବନେଶ୍ଵର: କ୍ରାଇମବ୍ରାଞ୍ଚର ନୋଟିସ ପରେ ଆସନ୍ତାକାଲି ହାଜର ହେବେ ପୂର୍ବତନ ମନ୍ତ୍ରୀ ନବ ଦାସଙ୍କ ଝିଅ ଦୀପାଳି ଓ ପୁଅ ବିଶାଳ। ତେବେ ଏହା ପୂର୍ବରୁ ବିଜେପି ସାଂସଦଙ୍କ ବୟାନ ନିଆଁରେ ଘିଅ ଢାଳିଛି । ପ୍ରଦୀପ ପ୍ରଶ୍ନ କରିଛନ୍ତି ସିବିଆଇ ତଦନ୍ତ ପାଇଁ ଗଣମାଧ୍ୟମରେ କହୁଥିବା ଦୀପାଳି ରାଜ୍ୟ ସରକାରଙ୍କ କହିବା ମୁତାବକ ଲିଖିତ ଅଭିଯୋଗ କରୁ ନାହାନ୍ତି କାହିଁକି ? ସିବିଆଇ ତଦନ୍ତ ହେଲେ ବିଜେଡିର ଦୁଇ ବଡ଼ ନେତା ଜେଲ ଯିବା ସୁନିଶ୍ଚିତ ।

ତେଣୁ ଲିଖିତ ଅଭିଯୋଗ ନକିବାକୁ ନବଙ୍କ ପରିବାର ଉପରେ ବିଜେଡି ଚାପ ସୃଷ୍ଟି କରୁଥିବା ଅଭିଯୋଗ କରିଛନ୍ତି ପ୍ରଦୀପ । ନବୀନଙ୍କ ପରେ ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖୁଥିବା ଜଣେ ଆଇଏଏସ୍ ଅଧିକାରୀ ଓ ବିଜେଡିର ଜଣେ ବଡ଼ ନେତା ନବ ଦାସ କାଳେ ମୁଖ୍ୟମନ୍ତ୍ରୀ ହୋଇଯିବେ ଭାବି ତାଙ୍କୁ ରାସ୍ତାରୁ ହଟାଇ ଦେଇଥିବା ନେଇ ପ୍ରଦୀପ ଦେଇଛନ୍ତି ବିସ୍ଫୋରକ ବୟାନ । ଗୋପାଳ ଦାସ ଜରିଆରେ ଯେଉଁମାନେ ମାରିଲେ ସେମାନଙ୍କ ବିଷୟରେ ରାଜ୍ୟବାସୀ ଜାଣିବାର ଅଧିକାର ଅଛି । ଯଦି ସିବିଆଇ ତଦନ୍ତ ହେବ ତାହେଲେ ଏହାର ପର୍ଦ୍ଦାଫାସ ହେବ ।

ପୋଲିସ ଲଗାଇ ବାପା ଙ୍କ ହତ୍ୟା କରାଯାଇଥିବା ଓ ସିବିଆଇ ତଦନ୍ତ ଚାହୁଁଥିବା କଥା ଦୀପାଳି କହିବା ପରେ ଲିଖିତ ଭାବେ ଜଣାଇବାକୁ କହିଥିଲେ ଆଇନ ମନ୍ତ୍ରୀ । ଏପରିକି ବାପାଙ୍କ ଶ୍ରାଦ୍ଧ ଦିବସ ରେ ଦୀପାଳି କହିଥିଲେ ପରିବାର ସହ ବିଚାର ବିମର୍ଷ ଚାଲିଛି ଖୁବଶୀଘ୍ର ମୁଖ୍ୟମନ୍ତ୍ରୀଙ୍କୁ ଲିଖିତ ଭାବେ ସିବିଆଇ ତଦନ୍ତ ପାଇଁ ଜଣାଇବୁ ।

କିନ୍ତୁ ମାସାଧିକ କାଳ ବିତିଥିଲେ ବି ଦୀପାଳି କାହିଁକି ଲିଖିତ ଭାବେ ଜଣାଉ ନାହାନ୍ତି ତାକୁ ପ୍ରଶ୍ନ ଉଠିଥିବା ବେଳେ ପ୍ରଦୀପ ପୁରୋହିତ ଙ୍କ ବୟାନ ଘଟଣାକୁ ଅଧିକ ରୋଚକ କରିଛି । ତେବେ ଦେଖିବାର କଥା ଆସନ୍ତାକାଲି ଦୀପାଳି ଓ ବିଶାଳ କ୍ରାଇମବ୍ରାଞ୍ଚ ସାମ୍ନାରେ ପୂର୍ବରୁ ହୋଇଥିବା ତଦନ୍ତ ନେଇ ଆପତ୍ତି ଉଠାଉଛନ୍ତି ନା ପୂର୍ବ ତଦନ୍ତରେ ହାଁ ଭରି ମାମଲା ବନ୍ଦ କରିବାର ରାସ୍ତା ଖୋଲି ଦେଉଛନ୍ତି ?