ଅନେକ ଆଶାୟୀଙ୍କ ପ୍ରେରଣା ଥିଲେ...ଯାହାଙ୍କୁ ଦେଖିଲେ ଛାତ୍ରଛାତ୍ରୀ ଅଫିସର ହେବାକୁ ସ୍ୱପ୍ନ ଦେଖୁଥିଲେ । ଏମିତି ପାଠ ପଢାଉଥିଲେ ଯେ ତାଙ୍କ କ୍ଲାସ୍ ମିସ୍ କରୁନଥିଲେ ଆଶାୟୀ । ତାଙ୍କର ପାଠ ପଢା ଟିପ୍ସ୍ ପାଇଁ ଫଲୋଅର୍ସ ସଂଖ୍ୟା ମଧ୍ୟ ଥିଲା ଢେର୍ ଅଧିକ ।

ହେଲେ ବିଡମ୍ବନାର ବିଷୟ ଯେ ସିଏ ଆଜି ଖବରର ସିରୋନାମା ପାଲଟିଛନ୍ତି । ଓଏଏସ ପାଇବା ପରେ ଦୁର୍ନୀତି ମୁକ୍ତ କରିବାକୁ ଲମ୍ବା ଚଉଡା ଭାଷଣ ଦେଉଥିବା ଏହି ବାବୁ ଆଜି ଖୋଦ ଦୁର୍ନୀତି ଜାଲରେ ଫଶି ଯାଇଛନ୍ତି । ସିଭିଲ ସର୍ଭିସ୍ ଆଶୀୟୀଙ୍କୁ ନ୍ୟୁଜ୍ ପେପର୍ ପଢିବାକୁ କହୁଥିବା ଓଏଏସ ବାବୁ ଆଜି ଖୋଦ ନିଜେ ନ୍ୟୁଜ ପାଲଟିଯାଇଛନ୍ତି ।

ଆଇଏଏସ, ଓଏଏସ ଚାକିରି କରିବା ଅନେକ ଯୁବପିଢିଙ୍କ ଡ୍ରିମ୍ । ଛୋଟ ଥିବାବେଳେ ବଡ ହେଲେ କଣ ହେବୁ କହିଲେ ପ୍ରଥମେ ସମସ୍ତଙ୍କ ପାଟିକୁ ଆସେ ଡାକ୍ତର, ଇଞ୍ଜିନିୟର ନହେଲେ ଆଇଏଏସ, ଓଏଏସ । ଏହି ଚାକିରି କରିବାକୁ ଦିନ ରାତି ଏକ କରି ପାଠ ପଢିଥାନ୍ତି ଯୁବପିଢି । ଚାକିରି ପାଇଲେ କଣ କରିବେ ..କେମିତି ରାଜ୍ୟକୁ ଦେଶକୁ ଦୁର୍ନୀତି ମୁକ୍ତ କରିବେ, କେଉଁ ଦିଗରେ କାର୍ଯ୍ୟ କରିବେ ସେନେଇ ତାଙ୍କର ଏକ ସିଦ୍ଧାନ୍ତ ଥାଏ ।

ହେଲେ ଚାକିରି ପାଇବା ପରେ ବୋଧେ ସବୁ ଭୁଲିଗଲେ ଏହି ଓଏଏସ ବାବୁ । ତେବେ ପୁରା ଘଟଣା କଣ ଥିଲା । ନଜର ପକାନ୍ତୁ...

ବାମଲା ବ୍ଲକ୍ ସଦର ମହକୁମାସ୍ଥିତ ଗୋବିନ୍ଦପୁର ଗ୍ରାମର ଭିକି ନାଏକ ଏକ ଜମି ମ୍ୟୁଟେସନ୍ ଓ କିସମ ପରିବର୍ତ୍ତନ ପାଇଁ ବାମରା ତହସିଲ ଅଫିସରେ ଆବେଦନ କରିଥିଲେ । ତେବେ ଏଥିପାଇଁ ତହସିଲଦାର ଅଶ୍ୱିନୀ ପଣ୍ଡା 20 ହଜାର ଟଙ୍କା ଲାଞ୍ଚ ଦାବି କରିଥିଲେ । ହେଲେ ମୁଲ ଚାଲ୍ 15 ହଜାର ଟଙ୍କାରେ ଛିଢି ଥିଲା । ଏହାପରେ ଭିକି ସମ୍ବଲପୁର ଭିଜିଲାନ୍ସ ପାଖରେ ଅଭିଯୋଗ କରିଥିଲେ ।
ପୂର୍ବ ପ୍ରସ୍ତୁତି ଅନୁଯାୟୀ, ଶୁକ୍ରବାର ଦିନ 11 ଟା ରେ ତହସିଲଦାରଙ୍କ ଡ୍ରାଇଭର ପ୍ରବଣୀ କୁମାର ତହସିଲଦାରଙ୍କ ନିର୍ଦ୍ଦେଶ କ୍ରମେ ଲାଞ୍ଚ ବାବଦକୁ 15 ହଜାର ଟଙ୍କା ନେଉଥିବାବେଳେ ଭିଜିଲାନ୍ସ ଟିମ୍ ମାଡି ବସିଥିଲା । ପଚରାଉଚରା ପାଇଁ ତହସିଲଦାର ଅଶ୍ୱିନୀ ପଣ୍ଡା ଓ ତାଙ୍କ ଡ୍ରାଇଭର ପ୍ରବୀଣ କୁମାରଙ୍କୁ ଭିଜିଲାନ୍ସ ସମ୍ବଲପୁର ନେଇଥିବା ଜଣାପଡିଛି ।

ଉଭୟଙ୍କୁ ଗିରଫ କରାଯାଇଥିବାବେଳେ ତହସିଲଦାରଙ୍କର ପୈତୃକ ବାସଭବନ ଓ ଭୁବନେଶ୍ୱର ମେ ଫେୟାର ରୋଡ୍ ନିକଟ ବାସଭବନରେ ମଧ୍ୟ ଚଢଉ କରାଯାଇଛି । ଭୁବନେଶ୍ୱର ବାସଭବନରୁ ନଗଦ 4.73 ଲକ୍ଷ ଟଙ୍କା ସମେତ ସୁନାଗହଣା ଜବତ କରାଯାଇଛି । ଗାଁରେ ତିନି ମହଲା କୋଠା ଘର ଥିବାବେଳେ ସେଠାରେ ତାଙ୍କ ବାପା ମା ରହୁଥିବା ଜଣାପଡିଛି ।

କଷ୍ଟ କରି ପାଠ ପଢିଲେ । ସରକାରୀ ବାବୁ ବି ହେଲେ । କିନ୍ତୁ ଟଙ୍କା ଉପରେ ଲୋଭକୁ ସମ୍ଭାଳିପାରିଲେନି । ଶେଷରେ ଓଏସ ଟପ୍ପର୍ ହେଇ ଯେଉଁ ସମ୍ମାନ ଟିକକ ପାଇଥିଲେ...ପୁରା ରାଜ୍ୟରେ ଚହଳ ସୃଷ୍ଟି କରିଥିଲେ , ଲାଞ୍ଚ ପାଇଁ ଆଜି ତାଙ୍କ ମାନ ସମ୍ମାନ ଦାଣ୍ଡରେ ପଡି ହାଟରେ ଗଡୁଛି ।

Argus News | argus news | Odisha Latest News, Breaking News, Trending News, Live TV