କନ୍ଧମାଳର ବହୁଚର୍ଚ୍ଚିତ ଯୋଡ଼ାମୁଣ୍ଡ ଶିଶୁ ଜଗାକୁ ନେଇ ଏବେ ସାମ୍ନାକୁ ଆସିଛି ଏକ ବଡ଼ ଖବର । ୨୦୧୭ରେ ଦିଲ୍ଲୀ ଏମ୍ସରେ ବିରଳ ଅସ୍ତ୍ରୋପଚାର ପରେ ଜଗା-କାଳିଆଙ୍କ ମୁଣ୍ଡ ଅଲଗା କରାଯାଇଥିଲା । କାଳିଆ ଆମ ଗହଣରେ ନାହିଁ, ଏବେ ଜଗାର ଭବିଷ୍ୟତକୁ ନେଇ ସୃଷ୍ଟି ହୋଇଛି ପ୍ରଶ୍ନବାଚୀ ।

ଜଗାର ଅପରେସନ କରିଥିବା ବିଶିଷ୍ଟ ଡାକ୍ତର ପଦ୍ମଶ୍ରୀ ଅଶୋକ ମହାପାତ୍ରଙ୍କ କହିବା ଅନୁସାରେ, ଅପରେସନର ୬ ମାସ ମଧ୍ୟରେ ଜଗା ମୁଣ୍ଡରେ କୃତ୍ରିମ ହାଡ଼ ଲାଗିବାର ଥିଲା, କିନ୍ତୁ ଏହା ମଧ୍ୟରେ ୮ ବର୍ଷ ବିତିଗଲାଣି । ଯଦି ତୁରନ୍ତ ଦ୍ୱିତୀୟ ଅପରେସନ କରାଯାଇ କୃତ୍ରିମ ହାଡ଼ ନଲଗାଯାଏ, ଜଗା ପାଇଁ ବିପଦ ବଢ଼ିପାରେ ।

ବହୁ କଷ୍ଟରେ ବଞ୍ଚିଥିଲା ଜଗାର ଜୀବନ, ଏବେ କିନ୍ତୁ ଅନିଶ୍ଚିତ ଭବିଷ୍ୟତ । କାରଣ ଜଗାର ଚିକିତ୍ସା ନେଇ ସାମ୍ନାକୁ ଆସିଛି ବଡ଼ କଥା । ୨୦୧୭ ମସିହାରେ ଏହି ବିରଳ ଅସ୍ତ୍ରୋପଚାର କରି ଜଗାର ଜୀବନ ବଞ୍ଚାଇଥିବା ଡାକ୍ତର ପଦ୍ମଶ୍ରୀ ଅଶୋକ ମହାପାତ୍ରଙ୍କ ଅନୁସାରେ ଅପରେସନର 6 ମାସ ଭିତରେ ଜଗା ମୁଣ୍ଡରେ କୃତ୍ରିମ ହାଡ଼ ଲାଗିବାର ଥିଲା I ହେଲେ ବହୁତ ଡେରି ହୋଇସାରିଛି I ତୁରନ୍ତ ହାଡ଼ ଲଗାଇବା ପକ୍ରିୟା ଆରମ୍ଭ କରିବା ଦରକାର I ନଚେତ ତା ପ୍ରତି ବିପଦ ରହିଛି I

୮ ବର୍ଷ ତଳର ଅପରେସନ ପରେ ଜଗାର ବାପା ମା କେବେ ବି ଡାକ୍ତର ମହାପାତ୍ରଙ୍କ ସହ ଯୋଗାଯୋଗ କରିନାହାନ୍ତି । ତେବେ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟର ଏକ ସ୍ୱତନ୍ତ୍ର କ୍ୟାବିନରେ ପରିବାର ସହ ରହୁଛି ଜଗା ! ଦୀର୍ଘ ୫ ବର୍ଷରୁ ଅଧିକ ସମୟ ଧରି ଏଠି ସେ ଡାକ୍ତର ମାନଙ୍କ ନିରୀକ୍ଷଣରେ ରହିଛି । ବୟସ ତାର ୧୧ ହେଲାଣି । ମେଡିକାଲରେ ଥିବାରୁ ଆଜି ଯାଏଁ ପାଠ ପଢ଼ିପାରୁନି ।

ଡାକ୍ତର ଲଗାଇଥିବା ହେଲମେଟ୍ ଏବେ ବି ମୁଣ୍ଡରେ ପିନ୍ଧିଛି ଜଗା । ତାକୁ ଏକୁଟିଆ ବାହାରକୁ ଛଡ଼ାଯାଉନି । ମୁଣ୍ଡର ଦ୍ବିତୀୟ ଅପରେସନ ହୋଇନଥିବାବେଳେ କେବେ ସେ ସମ୍ପୂର୍ଣ୍ଣ ସୁସ୍ଥ ହୋଇ ପାଠ ପଢ଼ିବ, ଏ ନେଇ ଚିନ୍ତାରେ ବାପା ମା ।

ଅନ୍ୟପଟେ କନ୍ଧମାଳ ଜିଲ୍ଲା ମୁଖ୍ୟ ଚିକିତ୍ସାଧିକାରୀ କହିଛନ୍ତି, ଜଗାର ଦ୍ବିତୀୟ ଅସ୍ତ୍ରୋପ୍ରଚାର କେବେ ହେବ ସେ ନେଇ ତାଙ୍କ ପାଖରେ କିଛି ଖବର ନାହିଁ । କଟକ SCBରୁ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆସିବା ବେଳେ ସେଠାକାର ଡାକ୍ତର ଯାହା ପରାମର୍ଶ ଦେଇଥିଲେ ସେହି ଅନୁସାରେ ତାର ଚିକିତ୍ସା ଚାଲିଛି । ଦ୍ବିତୀୟ ଅପରେସନ ନ ହେବା ଯାଏଁ ତାକୁ ସାଧାରଣ ପିଲାଙ୍କ ଭଳି ବାହାରକୁ ଛଡ଼ାଯାଇପାରିବ ନାହିଁ ।

୨୦୧୭ରେ ଦିଲ୍ଲୀ ଏମ୍‌ସରେ ଯୋଡ଼ାମୁଣ୍ଡ ଶିଶୁ ଜଗା-କାଳିଆଙ୍କ ଅସ୍ତ୍ରୋପଚାର କରାଯାଇ ମୁଣ୍ଡ ଅଲଗା କରାଯାଇଥିଲା । ପରେ ଏସ୍‌ସିବି ମେଡିକାଲ୍‌କୁ ସ୍ଥାନାନ୍ତର ହୋଇଥିଲେ ଦୁଇ ଭାଇ । ଗତବର୍ଷ ନଭେମ୍ବର ୨୫ରେ କାଳିଆର ଦେହାନ୍ତ ହୋଇଥିଲା । ତାର କିଛି ଦିନ ପରେ ଜଗା ଫୁଲବାଣୀ ମେଡିକାଲକୁ ଆସିଥିଲା ।