ବ୍ରହ୍ମପୁର ସହରରେ ଦିନକୁ ଦିନ ବଢୁଛି ଜନସଂଖ୍ୟା । ଏଥିସହ ବଢ଼ି ଚାଲିଛି ଅପରାଧିକ କାର୍ଯ୍ୟକଳାପ, ବିଗୁଡୁଛି ଆଇନଶୃଙ୍ଖଳା ପରିସ୍ଥିତି। ଏଥପାଇଁ ଅଧିକ ମାନବ ସମ୍ବଳ ଆବଶ୍ୟକ ହେଉଥିବାବେଳେ ବ୍ରହ୍ମପୁରରେ କମିଶନରେଟ୍ ପୋଲିସ ବ୍ୟବସ୍ଥା ଲାଗୁ ପାଇଁ ଦୀର୍ଘ ବର୍ଷ ହେଲା ଦାବି ହୋଇଆସୁଛି । ୨୦୧୪ ମସିହାରେ ଏହି ବ୍ୟବସ୍ଥା ଲାଗୁ ପାଇଁ ଘୋଷଣା କରିଥିଲେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେ ସମୟରେ କମିଶନରେଟ୍ ପୋଲିସ ବ୍ୟବସ୍ଥା ପାଇଁ ଭିତ୍ତିଭୂମି ସମ୍ପର୍କିତ ବିସ୍ତୃତ ରିପୋର୍ଟ ପୋଲିସ ମୁଖ୍ୟାଳୟକୁ ପଠାଯାଇଥିଲା ।

ଆବଶ୍ୟକ ଅଫିସର୍, କର୍ମଚାରୀ ସହ ନୂତନ ଥାନା ପ୍ରତିଷ୍ଠା ସହ ଥାନା ଗୁଡ଼ିକର ସୀମା ନିର୍ଦ୍ଧାରଣ କରାଯିବ ବୋଲି ପ୍ରସ୍ତାବ ଦିଆଯାଇଥିଲା । ହେଲେ ଘୋଷଣାକୁ ୧୭ ବିତିଯାଇଥିଲେ ହେଁ ସବୁକିଛି ପ୍ରସ୍ତାବରେ ହିଁ ରହିଗଲା । ନିକଟରେ ବ୍ରହ୍ମପୁର ବିଧାୟକ କେ.ଅନୀଲ କୁମାର ବିଧାନସଭାରେ ଏ ନେଇ ପ୍ରଶ୍ନ କରିଥିଲେ । ଏହା ସରକାରଙ୍କ ନିକଟରେ ବିଚାରଧୀନ ଥିବା ଉତ୍ତରରେ କହିଥିଲେ ମୁଖ୍ୟମନ୍ତ୍ରୀ ।

ବ୍ରହ୍ମପୁର କମିଶନରେଟ୍ ପୋଲିସ ବ୍ୟବସ୍ଥାରେ ଜଣେ ଡିସିପି ରହିବା ସହ ତିନୋଟି ସବ୍‌ଡିଭିଜନ୍‌ରେ ଜଣେ ଲେଖାଏଁ ଏସିପି ଦାୟିତ୍ଵରେ ରହିବେ ବୋଲି ପ୍ରସ୍ତାବ ରଖାଯାଇଥିଲା । ଜଣେ ଲେଖାଏଁ ଏସିପିଙ୍କ ଅଧୀନରେ ୫ଟି ଥାନା ରହିବ ବୋଲି ପ୍ରସ୍ତାବ ରହିଥିଲା । କମିଶନରେଟ୍ ପୋଲିସ ବ୍ୟବସ୍ଥା ଲାଗୁ ଦିଗରେ ବ୍ରହ୍ମପୁର ସମସ୍ତ ମାନଦଣ୍ଡ ପୂରଣ କରୁଛି । ଏଣୁ ଏ ଦିଗରେ ରାଜ୍ୟ ସରକାର ବିଚାର କରିବାକୁ ବିଭିନ୍ନ ମହଲରେ ଦାବି ହୋଇଛି । ଘୋଷଣା କରି ଗତ ବିଜେଡି ସରକାର ତ ଠକି ଦେଇଗଲା । ଏବେ ବ୍ରହ୍ମପୁରବାସୀଙ୍କ ଆଶା, ବିଜେପି ସରକାର ଅମଳରେ ବ୍ରହ୍ମପୁରରେ ଲାଗୁ ହେବ କମିସେନେରେଟ ବ୍ୟବସ୍ଥା ।

Argus News | argus news | Odisha Latest News, Breaking News, Trending News, Live TV