ଧୋଇଗଲା ପ୍ରଶ୍ନକାଳ...ଚାଲି ପାରିଲାନି ମୌଖିକ ପ୍ରଶ୍ନ-ଉତ୍ତର ଆଲୋଚନା...ଶୂନ୍ୟକାଳ ଆଲୋଚନା ବି ଭଣ୍ଡୁର କରିଦେଲେ ବିରୋଧୀ । ମୁଲତବୀ ଆଲୋଚନା ବି ହୋଇପାରିଲା ନାହିଁ । ବିଧାନସଭାର ପ୍ରଥମାର୍ଦ୍ଧରେ ପୁରା ଅଚଳ ରହିଲା ଗୃହ । ବଜେଟ ଅଧିବେଶନର ଦ୍ଵିତୀୟ ଦିନରେ କିଛି ଏଭଳି ସ୍ଥିତି ଉପୁଜିଥିଲା । ବିଜେଡି ଚାଷୀଙ୍କ ପ୍ରସଙ୍ଗ ଏବଂ କଂଗ୍ରେସ ଆଇନଶୃଙ୍ଖଳା ପ୍ରସଙ୍ଗକୁ ନେଇ କରିଥିଲେ ଜୋରଦାର ହଟ୍ଟଗୋଳ । ପ୍ରଶ୍ନକାଳ ଆରମ୍ଭରୁ ହିଁ ଗୃହ ମଧ୍ୟ ଭାଗକୁ ଆସି ବାଚସ୍ପତିଙ୍କ ପୋଡିୟମ ତଳେ ନାରାବାଜି କରିଥିଲେ ବିଜେଡି ଓ କଂଗ୍ରେସ ସଦସ୍ୟ । ବାଚସ୍ପତିଙ୍କ ବରମ୍ବାର ଅପିଲ୍ ସତ୍ତ୍ଵେ ଶୁଣିନଥିଲେ ବିରୋଧୀ । ଫଳରେ ବାଧ୍ୟ ହୋଇ ପ୍ରଥମେ ଦିନ ୧୨ଟା ଯାଏଁ ଏବଂ ତାପରେ ଅପରାହ୍ନ ୪ଟା ଯାଏଁ ଗୃହକୁ ମୁଲତବୀ କରିଥିଲେ ବାଚସ୍ପତି ।

ଧାନ କଟନୀ ଛଟନୀ, ଚାଷୀଙ୍କୁ କ୍ଷତିପୂରଣ ନମିଳିବା ସହ ଚାଷୀ ଆତ୍ମହତ୍ୟା ଭଳି ଅଭିଯୋଗ ଆଣିଥିଲା ବିଜେଡି । ହେଲେ କଂଗ୍ରେସ ପକ୍ଷରୁ ଚାଷୀଙ୍କ ପ୍ରସଙ୍ଗରେ ମୁଲତବୀ ପ୍ରସ୍ତାବ ଦେଇଥିଲେ ବି ବିଜେଡିର ହଟ୍ଟଗୋଳ ପାଇଁ ଆଲୋଚନା ହୋଇପାରିଲା ନାହିଁ । ଯାହାକୁ ନେଇ ବିଜେଡି ଉପରେ ବର୍ଷିଛି କଂଗ୍ରେସ ।

ସେପଟେ ବିରୋଧୀଙ୍କ ହଟ୍ଟଗୋଳକୁ ନେଇ କଡା ଜବାବ ରଖିଛି ଶାସକ ଦଳ । ବିଜେପି ବିଧାୟକ ଇରାଶିଷ ଆଚାର୍ଯ୍ୟ କହିଛନ୍ତି, ଯେହେତୁ ପ୍ରସଙ୍ଗ ନାହିଁ, ବିରୋଧୀ ଅପ୍ରସଙ୍ଗକୁ ପ୍ରସଙ୍ଗ କରୁଛନ୍ତି । ଗଣତନ୍ତ୍ରକୁ ହତ୍ୟା କରୁଛନ୍ତି । କଂଗ୍ରେସର ମୁଲତବୀ ପ୍ରସ୍ତାବ ଉପରେ ଆଲୋଚନା ସହ ଉତ୍ତର ଦେବାକୁ ସରକାର ପ୍ରସ୍ତୁତ ଅଛନ୍ତି । ତେଣୁ ପ୍ରଶ୍ନକାଳରେ ବିକ୍ଷୋଭ କରିବାର କୌଣସି ଆବଶ୍ୟକତା ନଥିଲା । ଆଉ ବିଜେପି ବିଧାୟକ ଟଙ୍କଧର ତ୍ରିପାଠୀ ବିଜେଡିକୁ ଟାର୍ଗେଟ କରିଛନ୍ତି । କହିଛନ୍ତି, ବିରୋଧୀଙ୍କ ଭୂମିକା କେଉଁ ଭଳି ରହିବା କଥା, ବିଜେଡି ବିଧାୟକ ଟ୍ରେନିଂ ନିଅନ୍ତୁ ।

କାହିଁକି ଆଲୋଚନା ପରିବର୍ତ୍ତେ ହଟ୍ଟଗୋଳର ରାସ୍ତା ବାଛୁଛନ୍ତି ବିରୋଧୀ । ଗୃହ ଚାଲିଲେ ରାଜ୍ୟର ବିଭିନ୍ନ ସମସ୍ୟା, ଲୋକଙ୍କ ଦାବି, ବିକାଶମୂଳକ ପଦକ୍ଷେପ ଭଳି ଗୁରୁତ୍ଵପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହୋଇପାରନ୍ତା । କିନ୍ତୁ ହଟ୍ଟଗୋଳ କରି ଗୃହ ଚଳାଇନଦେବାକୁ ନେଇ ବିରୋଧୀଙ୍କ ଆଭିମୁଖ୍ୟ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more