ମେସିନ ଲାଗି ସୌରାତରୁ ଉଠୁଛି ବାଲି ।ଚୋରାରେ ଉତ୍ତୋଳନ ହେଉଛି ହଜାର ହଜାର ଟ୍ରିପ୍ ବାଲି ।କଳାସାମ୍ରାଜ୍ୟ ବିସ୍ତାର କରିଛି ବାଲିମାଫିଆଙ୍କ ରାକେଟ । ମୟୂରଭଞ୍ଜ ଜିଲ୍ଲାରେ ଥିବା ୬୦ରୁ ଉର୍ଦ୍ଧ୍ବ ବାଲି ସୈରାତର । ଏହା ନିଲାମ ହୋଇନାହିଁ । ଯାହାର ଫାଇଦା ଉଠାଉଛନ୍ତି ବାଲି ମାଫିଆ । ନଦୀଘାଟ ସଂଲଗ୍ନ ଗ୍ରାମଗୁଡିକରୁ ବାଲି ଚୋରାଚାଲାଣ ବୃଦ୍ଧି ପାଇଛି ।ବୁଢାବଳଙ୍ଗ , ସୋନ, ସୁବର୍ଣ୍ଣରେଖା , ଜମ୍ଭୀରା , ଖଡଖାଇ ଆଦି ପ୍ରମୁଖ ନଦୀ ସହ ଛୋଟବଡ ନାଳରୁ ବାଲି ଚୋରାରେ ଉତ୍ତୋଳନ ହେଉଛି ।
ପ୍ରତିରୋଧ କଲେ ଆକ୍ରମଣର ଶିକାର ହେବାକୁ ପଡୁଛି ।

ନିକଟରେ ଚୋରାବାଲି ଚାଲାଣକୁ ଅଟକକାଇବାକୁ ଯାଇ ଫେରୁଥିବା ବେଳେ କପ୍ତିପଦା ତହସିଲର ଅତିରିକ୍ତ ତହସିଲଦାରଙ୍କୁ ହୋଇଥିଲା ମରଣାନ୍ତକ ଆକ୍ରମଣ। ଗାଡି ଭଙ୍ଗାରୁଜା ମଧ୍ୟ କରାଯାଇଥିଲା । ଏଙି ଘଟଣାରେ ସମସ୍ତ ଅଭିଯୁକ୍ତକୁ ଗିରଫ କରିଛି ମୟୂରଭଞ୍ଜ ପୋଲିସ । ଡିପାଳ ଗ୍ରାମରେ ଚୋରା ବାଲି ଚାଲାଣ ହେଉଥିବା ବେଳେ ମାଡି ବସିଥିଲା ଖଣି ବିଭାଗ । ହଠାତ୍ ୪୦ ରୁ ଉର୍ଦ୍ଧ ବାଲି ମାଫିଆ ପହଞ୍ଚି ଖଣି ଅଧିକାରୀ ଙ୍କୁ ଠେଲାପେଲା କରି ଛଡ଼ାଇ ନେଲେ ଚୋରା ବାଲି ବୋଝେଇ ହାଇଓ୍ବା । ଗ୍ରାମବାସୀଙ୍କ ଦାବି ବାଲିମାଫିଆଙ୍କ ଉପରେ ହେଉ କଡା କାର୍ଯ୍ୟାନୁଷ୍ଠାନ ।

ବାଲି ସୈରାତରୁ ଉତ୍ତୋଳନର ଯେଉଁ ନିୟମ ରହିଛି ତାହା କଡାକଡି ପାଳନ ହେଉନଥିବାରୁ ସରକାର କୋଟିକୋଟି ଟଙ୍କାର ରାଜସ୍ୱ ହରାଉଛନ୍ତି । ପରିବେଶବିତଙ୍କ କହିବା ହେଲା, ନିଲାମ, ବିଜ୍ଞାପନ ଓ ଏଆଇ କ୍ୟାମେରା ଦ୍ବାରା ଚୋରା ବାଲି ଚାଲାଣକୁ ରୋକି ହେବ । ଦୃଢ କାର୍ଯ୍ୟାନୁଷ୍ଠାନ ନିଆଗଲେ ସାବାଡ ହେବେ ବାଲି ମାଫିଆ । ଅନ୍ୟପଟେ ଲଘୁଖଣିଜ ଦ୍ରବ୍ୟ ଚୋରାଚାଲଣ ସହ ମାଫିଆ ଙ୍କ ଉପରେ କଡା କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇସାରିଛନ୍ତି ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ।