ପୁରୀ:  ବାହୁଡୁଛନ୍ତି ମହାପ୍ରଭୁ । ଧାଡି ପହଣ୍ଡିରେ ପ୍ରଥମେ ବଡ ଭାଇ ବଳଭଦ୍ର, ପରେ ଦେବୀ ସୁଭଦ୍ରା ଓ ଶେଷରେ ସାଳିଆ ସାଆନ୍ତ ରଥରେ ବିରାଜିଛନ୍ତି । ବାହୁଡା ଯାତ୍ରା ପାଇଁ ଶରଧାବାଲିରେ ଭକ୍ତଙ୍କ ଗହଳି ଲାଗିଛି । ଭକ୍ତଙ୍କ ଗହଳିରେ ଫାଟି ପଡୁଛି ବଡଦାଣ୍ଡ । ଭକ୍ତ ଆଖି ଆଜି ଛଳ ଛଳ ହୋଇପଡିଛି । 

ବାହୁଡ଼ା ପହଣ୍ଡି ଶେଷ ହେବା ପରେ ସାଢ଼େ ୨ଟାରୁ ସାଢ଼େ ୩ ମଧ୍ୟରେ ଛେରାପହଁରା ନୀତି ଅନୁଷ୍ଠିତ ହେବ ।  ଏହାପରେ ଚାରମାଳ ଫିଟିବା ଓ ଘୋଡ଼ାଲାଗି କାର୍ଯ୍ୟ ସମ୍ପନ୍ନ ହେବ । ଅପରାହ୍ନ ୪ଟାରେ ରଥଟଣା ପାଇଁ ସମୟ ଧାର୍ଯ୍ୟ ହୋଇଛି ।

ବାହୁଡା ଯାତ୍ରା ପାଇଁ ଆଇନ ଶୃଙ୍ଖଳା ବ୍ୟବସ୍ଥା କଡା କଡି କରାଯାଇଛି । ରଥମ ଉପରେ ଯେପରି ଅଣସେବାୟତ ନଚଢନ୍ତି... ରଥ ଉପରେ ମୋବାଇଲ ବ୍ୟବହାର ନହୁଏ, ସେଥିପ୍ରତି ବିଶେଷ ଦୃଷ୍ଟି ଦିଆଯାଇଛି । ଅନ୍ୟପଟେ ସେବାୟତ ବେଶରେ ଦର୍ପଦଳନ ରଥରେ ଅଣସେବକ ଚଢିଛନ୍ତି । ଏହା ଜଣାପଡିବା ପରେ ସେମାନଙ୍କୁ ରଥରୁ ଓହ୍ଲାଇଛି ପ୍ରଶାସନ । କାର୍ଯ୍ୟାନୁଷ୍ଠାନ ନିଆଯାଇପାରେ ବୋଲି କୁହାଯାଉଛି ।