କେବଳ ଶ୍ରୀକ୍ଷେତ୍ର ପୁରୀ ନୁହଁ ରାଜ୍ୟର ବିଭିନ୍ନ ସ୍ଥାନରେ ବାହୁଡ଼ା ଯାତ୍ରା ଅନୁଷ୍ଠିତ ହେଉଛି । କିଛି କିଛି ସ୍ଥାନରେ ମହାପ୍ରଭୁଙ୍କ ସୁନାବେଶ ବି ଅନୁଷ୍ଠିତ ହୋଇଛି । ବାରିପଦା, ରେମୁଣା, ଚିଲିକା, ନୂଆପଡ଼ାର ଖଡ଼ିଆଳ ଭଳି ସ୍ଥାନରେ ବାହୁଡ଼ିଛନ୍ତି ମହାବାହୁ । ଦ୍ବିତୀୟ ଶ୍ରୀକ୍ଷେତ୍ର ବାରିପଦାର ମାଉସୀ-ମା ମନ୍ଦିରରେ 'ସୁନାବେଶ'ରେ ଦର୍ଶନ ଦେଉଛନ୍ତି ଚତୁର୍ଦ୍ଧା ମୁରତି । ଦିଅଁମାନଙ୍କୁ ଗୋଟି ପହଣ୍ଡିରେ ବାହୁଡା ରଥକୁ ନିଆଯିବ । ଆସନ୍ତାକାଲି ଏବଂ ତହିଁ ପରଦିନ ୨ ଦିନ ଧରି ବାହୁଡା ରଥଟଣା କାର୍ଯ୍ୟ କରାଯିବ । ସେହିପରି ବାଲେଶ୍ବର ଜିଲ୍ଲା ରେମୁଣା ନୂଆପାଢ଼ୀ ସ୍ଥିତ ଫକୀରମୋହନ ବିଶ୍ବବିଦ୍ୟାଳୟ ପରିସରରେ ବାହୁଡ଼ା ଯାତ୍ରା ପାଳିତ ହୋଇଯାଇଛି । ବିଶ୍ବବିଦ୍ୟାଳୟର କୁଳପତି ସନ୍ତୋଷ କୁମାର ତ୍ରିପାଠୀ ତିନି ଠାକୁରଙ୍କୁ ଗୋଟି ପହଣ୍ଡି ବିଧିରେ ରଥ ଉପରେ ବିଜେ କରାଇଥିଲେ ।

ବିଶ୍ବବିଦ୍ୟାଳୟର ଅଧ୍ୟାପକ, ଅଧ୍ୟାପିକା, କର୍ମଚାରୀ ଓ ଛାତ୍ରଛାତ୍ରୀମାନେ ରଥ ଟାଣିଥିଲେ । ସେହିପରି ଜଗତର ନାଥ ଜଗନ୍ନାଥଙ୍କ ବାହୁଡ଼ା ଯାତ୍ରା ଚିଲିକାର ନୀଳ ଜଳରାଶିରେ ଅନୁଷ୍ଠିତ ହୋଇଛି । ସାରା ବିଶ୍ବରେ ସବୁଠି ସ୍ଥଳ ପଥରେ ରଥଯାତ୍ରା ଅନୁଷ୍ଠିତ ହେଉଥିବା ବେଳେ ଏଠି କିନ୍ତୁ ଜଳପଥରେ ଅନୁଷ୍ଠିତ ହୋଇଥିଲା ରଥଯାତ୍ରା । ଚିଲିକା ବ୍ଲକ ଅଧିନସ୍ଥ ନଈରୀ ଗାଁର ଚିଲିକା ମଧ୍ୟରେ ଥିବା ଏକ କୁଦରେ ରହିଛି ଜଗନ୍ନାଥଙ୍କ ଲୀଳାକ୍ଷେତ୍ର ଭାବେ ପରିଚିତ "କାଙ୍କଣ ଶିଖରୀ" ଧାମ ।

ଚିଲିକାର ନୀଳ ଜଳରାଶି ହୋଇଥାଏ ବଡ଼ଦାଣ୍ଡ ଏବଂ ଚିଲିକା ଢେଉରେ ମହାପ୍ରଭୁଙ୍କ ଅନୁଷ୍ଠିତ ହୋଇଥାଏ ବିରଳ ବାହୁଡା ଯାତ୍ରା । ସେପଟେ ନୂଆପଡ଼ା ଜିଲ୍ଲା ସିନାପାଲି ସୀମାନ୍ତ ସହରରେ ହଜାର ହଜାର ଭକ୍ତଙ୍କ ଭିଡ଼ରେ ବାହୁଡ଼ା ଯାତ୍ରା ଅନୁଷ୍ଠିତ ହୋଇଛି । ଜିଲ୍ଲାପାଳ ମଧୁସୂଦନ ଦାସ ବାହୁଡା଼ ଯାତ୍ରା ରେ ସାମିଲ ହୋଇ ଚତୁର୍ଦ୍ଧାମୂର୍ତ୍ତିଙ୍କ ଦର୍ଶନ ଲାଭ କରିଥିଲେ । ଏହି ଯାତ୍ରାରେ ସୀମାନ୍ତ ଛତିଶଗଡ଼, ପଡ଼ୋଶୀ ଜିଲ୍ଲାରୁ ଶହ ଶହ ଶ୍ରଦ୍ଧାଳୁଙ୍କ ସୁଅ ଛୁଟିଥିଲା ଏଠାକୁ ।