ସେଦିନ ବି ଥିଲା ଶନିବାର । ହେଲେ ତାହା ଥିଲା ସକାଳ ୮ଟା ୩୦ ମିନିଟ୍ । ଭାର୍ଗବୀ ନଦୀବନ୍ଧ ତଳୁ ଅର୍ଧଦଗ୍ଧ ଅବସ୍ଥାରେ ଧାଇଁଥିଲେ ଜଣେ ଝିଅ । ପାଖରେ ଥିବା ଘରେ ପହଁଚି ବଞ୍ଚିବାକୁ ଭିକ୍ଷା ମାଗିଥିଲେ । ଆଉ କହିଥିଲେ ମୋତେ ତିନି ଦୁର୍ବୁତ୍ତ କିରୋସିନ୍ ଢାଳି ଜାଳିଦେଲେ । ବାସ୍ ତାପରେ ହୁଲୁସ୍ତୁଲ ସାରା ରାଜ୍ୟ ।

ପୋଲିସ ଡିଜିପିଙ୍କ ଠାରୁ କ୍ରାଇମବ୍ରାଞ୍ଚ । ସମସ୍ତେ ପଇଁତରା ମାରିଥିଲେ ସେହି ବଳଙ୍ଗାରେ । ଭୁବନେଶ୍ୱର ଏମ୍ସରୁ ଦିଲ୍ଲୀ ଏମ୍ସକୁ ସ୍ୱତନ୍ତ୍ର ଫ୍ଲାଇଟ ଯୋଗେ ସରକାର ପଠାଇଥିଲେ । ଚିକିତ୍ସା ପାଇଁ ଗଠନ ହୋଇଥିଲା ସ୍ୱତନ୍ତ୍ର ଡାକ୍ତରୀ ଟିମ୍ । ଆଉ ଏପଟେ ଭିଜିଲାନ୍ସର ଦୁଇ ଜଣିଆ ଟିମ୍ ଦିଲ୍ଲୀରେ ପହଁଚି ପୀଡିତାଙ୍କ ତିନିଥର ବୟାନ ରେକର୍ଡ କରିଥିଲେ । ୧୪ ଦିନପରେ ହଠାତ ଖବର ଆସିଲା । ବିଗିଡୁଛି ନାବାଳିକାଙ୍କ ସ୍ୱାସ୍ଥ୍ୟବସ୍ଥା । ଆଉ କିଛି ସମୟ ପରେ ବଳଙ୍ଗା ପୀଡିତା ମୃତ ବୋଲି ଘୋଷଣା କରିଥିଲା ଦିଲ୍ଲା ଏମ୍ସ । ଶୋକବ୍ୟକ୍ତ କରିଥିଲେ ମୁଖ୍ୟମନ୍ତ୍ରୀ ମୋହନ ମାଝୀ ।

ନିମାପଡ଼ା ନିର୍ବାଚନ ମଣ୍ଡଳୀର ବଳଙ୍ଗା ବାୟାବର ଅଞ୍ଚଳରେ ଘଟିଥିଲା ଏଭଳି ଜଘନ୍ୟ କାଣ୍ଡ । ଜୁଲାଇ ୧୯ ତାରିଖ ସକାଳ ୮.୩୦ରେ ଚହଳ ପଡ଼ିଥିଲା । ଯେତେବେଳେ ଜଳନ୍ତା ଅବସ୍ଥାରେ ନାବାଳିକା ଝିଅ ଜୀବନ ଭିକ୍ଷା କରୁଥିଲା । ରାଜ୍ୟ ରାଜନୀତି ମଧ୍ୟ ଉଠିଥିଲା ପଡିଥିଲା । ପ୍ରଥମେ ଘଟଣା ବିଷୟରେ କହିଥିଲେ ପିଡାତୀଙ୍କୁ ଉଦ୍ଧାର କରିଥିବା ଗ୍ରାମବାସୀ । ଆଉ ସେହି ଆଧାରରେ ପୋଲିସଠୁ କ୍ରାଇମବ୍ରାଞ୍ଚ ସମସ୍ତେ ଘଟଣାର ଛାନଭିନ ଆରମ୍ଭ କରିଥିଲେ ।

ସୁନା ଦୋକାନଠୁ ଗ୍ୟାରେଜ । ପୀଡିତାଙ୍କ ସମ୍ପର୍କୀୟଙ୍କଠୁ ସାଙ୍ଗସାଥୀ ସମସ୍ତଙ୍କ ବୟାନ ରେକର୍ଡ କରିଥିଲା ପୋଲିସ । କିନ୍ତୁ ଜଣାପଡିଥିଲା ପୀଡିତାଙ୍କ ବୟାନରେ ରହୁନଥିଲା ତାଳମେଳ । ଚାରି ଚାରି ଥର ନାବାଳିକାଙ୍କ ବୟାନ ରେକର୍ଡ କରାଯାଇଥିଲେ ସୁଦ୍ଧା ବୟାନରେ ତାଳମେଳ ରହିନଥିଲା । ଆଉ ଏପଟେ ପୋଲିସ ମଧ୍ୟ ତଦନ୍ତର ଶେଷ ସୋପାନରେ ପହଁଚି ପାରିନଥିଲା । ଘଟଣାକୁ ଦୁଇ ସପ୍ତାହ ବିତିଥିଲେ ସୁଦ୍ଧା ଏବେ ଯାଏଁ ହାତ ଖାଲି କରି ବସିଛି ପୋଲିସ । ଆଉ ଏପଟେ ପୀଡିତାଙ୍କ ମୃତ୍ୟୁ ଖବର ସମସ୍ତଙ୍କୁ ସ୍ତବ୍ଧ କରିଦେଇଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more