ବାଲେଶ୍ବର FM କଲେଜ ଛାତ୍ରୀ ଆତ୍ମହତ୍ୟା ଘଟଣାରେ ଆଉ ଦୁଇ ଛାତ୍ର ଗିରଫ । ହେଲେ ସିଗ୍ନେଚର୍ କ୍ୟାମ୍ପେନ୍ କରିଥିବା ଛାତ୍ରଛାତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ କେବେ । ସମୀର ସାହୁଙ୍କ ପାଇଁ ଓକିଲାତି କରି ଛାତ୍ରୀଙ୍କ ଚରିତ୍ରସଂହାର କରିଥିଲେ ଛାତ୍ର ଗୋଷ୍ଠୀ । ସାମ୍ନାକୁ ଆସିଲା ଛାତ୍ରୀ ଆତ୍ମାହୁତି ପୂର୍ବର ସିସିଟିଭି ଫୁଟେଜ୍ ।

ଫକୀର ମୋହନ କଲେଜ ଛାତ୍ରୀ ଆତ୍ମାହୁତି ଘଟଣାରେ ଆଉ ଦୁଇ ଜଣଙ୍କୁ ଗିରଫ କରିଛି କ୍ରାଇମବ୍ରାଞ୍ଚ । ଗିରଫ ଦୁଇ ଛାତ୍ର ହେଲେ ଶୁଭ୍ରସମ୍ବିତ ନାୟକ ଓ ଜ୍ୟୋତିପ୍ରକାଶ ବିଶ୍ବାଳ । ଗିରଫ ପରେ ଉଭୟଙ୍କୁ କୋର୍ଟ ଚାଲାଣ କରାଯାଇଛି । ଗିରଫ ଦୁଇ ଜଣ ଛାତ୍ର, ଛାତ୍ରୀଙ୍କୁ ଆତ୍ମାହୁତି ଉଦ୍ୟମରେ ସହଯୋଗ କରିଥିବା ଅଭିଯୋଗରେ କ୍ରାଇମବ୍ରାଞ୍ଚ ଗିରଫ କରିଛି ।

ସେପଟେ ଏହାକୁ ନେଇ ଉଦବେଗ ପ୍ରକାଶ କରିଛି ABVP । ପୋଲିସର ବିଫଳତାକୁ ଘଣ୍ଟା ଘୋଡ଼ାଇବାକୁ ଯାଇ ଛାତ୍ରୀଙ୍କୁ ବଞ୍ଚାଇବାକୁ ଉଦ୍ୟମ କରିଥିବା ଛାତ୍ରଙ୍କୁ ଗିରଫ କରାଯାଇଥିବା ନେଇ ଅଭିଯୋଗ ହୋଇଛି । ଏହା ଏକ ରାଜନୈତିକ ଷଡ଼ଯନ୍ତ୍ର ବୋଲି ସଂଗଠନ ପକ୍ଷରୁ ଅଭିଯୋଗ କରାଯାଇଛି ।

ଏଠି ପ୍ରଶ୍ନ ଉଠୁଛି, ଛାତ୍ରୀ ଆତ୍ମାହୁତି ପୂର୍ବରୁ ଯେଉଁମାନେ ସିଗ୍ନେଚର୍ କ୍ୟାମ୍ପେନ୍ କରିଥିଲେ ସେମାନେ ତଦନ୍ତ ପରିସରକୁ ଆସିଛନ୍ତି କି ? HOD ସମୀର ସାହୁଙ୍କ ବିରୋଧରେ ପୀଡ଼ିତା ଅଭିଯୋଗ ଆଣିବା ପରେ ତାଙ୍କ ବିରୋଧରେ କିଛି ଛାତ୍ର ଗୋଷ୍ଠୀ ପ୍ରିନ୍ସିପାଲଙ୍କ ପାଖରେ ଅଭିଯୋଗ କରିଥିଲେ । ସେମାନେ ଅଭିଯୁକ୍ତ HOD ସମୀର ସାହୁକୁ ସମର୍ଥନ କରି ପୀଡ଼ିତାଙ୍କ ନାଁରେ ଟିପ୍ପଣୀ ଦେଇଥିଲେ । ସୋସିଆଲ୍ ମିଡିଆରେ ବି ପୀଡ଼ିତାଙ୍କ ଚରିତ୍ର ସଂହାର କରିଥିଲେ । ଏହାକୁ ନେଇ ପୀଡ଼ିତା ମାନସିକ ଅବସାଦରେ ଥିଲେ । ଏହି ଛାତ୍ର ଗୋଷ୍ଠୀ କିଏ ? ଏମାନଙ୍କ ପଛରେ କାହାର ହାତ ? ଏନେଇ ମୃତ ଛାତ୍ରୀଙ୍କ ସହଯୋଗୀ ବି ଅଭିଯୋଗ କରିଥିଲେ ।

ସେପଟେ ଘଟଣାରେ ସାମ୍ନାକୁ ଆସିଛି ଛାତ୍ରୀ ଆତ୍ମାହୁତି ପୂର୍ବର ସିସିଟିଭି ଫୁଟେଜ । ପୀଡ଼ିତା ସାଇକେଲରେ କଲେଜ ଯାଉଥିବାର ଭିଡିଓ ସେଥିରେ ରହିଛି । ପୀଡ଼ିତା ସାଇକେଲ୍‌ରେ ପେଟ୍ରୋଲ ପମ୍ପ୍ ଆଡ଼କୁ ଯାଉଥିବା କୁହାଯାଉଛି । FM କଲେଜରୁ ଚାନ୍ଦିପୁର ଆଡ଼କୁ ଯାଉଥିବା ରାସ୍ତାର ସିସିଟିଭି ଫୁଟେଜ୍‌ ଭାଇରାଲ ହୋଇଛି । ଜୁଲାଇ ୧୨ ତାରିଖର ଦିନ ୧୦ଟା ୪୪ ମିନିଟ୍‌ର ସେହି ସିସିଟିଭି ଫୁଟେଜ୍‌ ।

Argus News | argus news | -Argusnews Home: Odisha Latest News, Breaking News, Trending News, Live TV and more