ବାଲେଶ୍ଵର: ପୁଣି ବାଲେଶ୍ଵର, ପୁଣି ପ୍ରଚଣ୍ଡ ଶବ୍ଦ । ଅପରାହ୍ଣରେ ହଠାତ୍ ପ୍ରଚଣ୍ଡ ଶବ୍ଦରେ ଥରି ଉଠିଛି ବାଲେଶ୍ଵର । ସମୟ ପାଖାପାଖି ଦିନ ୩ଟା ୩୩, ଯିଏ ଯାହାକ କାମରେ ବ୍ୟସ୍ତ ଥାଆନ୍ତି । ଠିକ୍ ସେତିକି ବେଳେ ଆକାଶରୁ ଶୁଭିଥିଲା ରହସ୍ୟମୟ ପ୍ରଚଣ୍ଡ ଶବ୍ଦ । ଆଉ ଏହି ଶବ୍ଦ ଶୁଣି ଯିଏ ଯେଉଁଠି ଥିଲେ ସ୍ତବ୍ଧ ହୋଇଗଲେ ।

ହଠାତ୍ ପ୍ରଚଣ୍ଡ ଶବ୍ଦ ଶୁଣିବା ପରେ ଲୋକେ ଭୟରେ ଘରୁ ବାହାରକୁ ବି ଚାଲି ଆସିଛନ୍ତି । ପାଖାପାଖି ଗୋଟାଏ ମିନିଟ୍ ଧରି ବାଲେଶ୍ଵର ଆକାଶରେ ପ୍ରଚଣ୍ଡ ଶବ୍ଦ ଶୁଣିବାକୁ ମିଳିଥିବା ସ୍ଥାନୀୟ ଲୋକେ କହିଛନ୍ତି । ବାଲେଶ୍ଵର ସହର ସହ ଆଖପାଖ ଅଞ୍ଚଳରେ ମଧ୍ୟ ପ୍ରଚଣ୍ଡ ଶବ୍ଦ ଶୁଣିବାକୁ ମିଳିଛି । ପ୍ରଚଣ୍ଡ ଶବ୍ଦରେ ଘରଦ୍ଵାର ସହ ଦୋକାନ ବଜାର ମଧ୍ୟ ଥରି ଉଠିଥିଲା ।

ଏଥିସହ ପଢ଼ନ୍ତୁ: ସୋର ଅଞ୍ଚଳରେ ଦୁଇ ଥର ପ୍ରଚଣ୍ଡ ଶବ୍ଦ

ଏହା ପ୍ରଥମଥର ନୁହେଁ ଆଗରୁ ବି ବାଲେଶ୍ଵରରେ ଏଭଳି ଶବ୍ଦ ଶୁଣିବାକୁ ମିଳିଛି । ତେବେ ଚାନ୍ଦିପୁର ଡିଆରଡିଓରୁ କୌଣସି ମିସାଇଲର ପରୀକ୍ଷଣ ଯୋଗୁଁ ଏଭଳି ଶବ୍ଦ ହୋଇ ଥାଇପାରେ ବୋଲି ଆଶଙ୍କା କରାଯାଉଥିଲେ ହେଁ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ ।

ଏହା ପୂର୍ବରୁ ୨୦୨୪ ଜୁନ୍ ୭ ତାରିଖରେ ବାଲେଶ୍ଵରର ସୋର ସହ ଭଦ୍ରକ ଜିଲ୍ଲାର ବାସୁଦେବପୁର ଅଞ୍ଚଳ ଏଭଳି ପ୍ରଚଣ୍ଡ ଶବ୍ଦରେ କେଇ ସେକେଣ୍ଡ ପାଇଁ ଥରି ଉଠିଥିଲା । ସେତେବେଳେ ସକାଳ ୯ଟା ୫୦ରୁ ଦିନ ୧୦ଟା ମଧ୍ୟରେ ପ୍ରଚଣ୍ଡ ଶବ୍ଦ ଶୁଣିଥିଲେ ଲୋକେ । କିନ୍ତୁ ଆକାଶକୁ ଦେଖିଲା ବେଳକୁ କିଛି ନଥିଲା ।

ଏଥିସହ ପଢ଼ନ୍ତୁ: ଏଥରକ ହଜିଯିବ ଜାଡ଼ ! ସ୍ଵାଭାବିକ ଠାରୁ ଅଧିକ ରହିବ ରାତି ତାପମାତ୍ରା, ଡିସେମ୍ବରରେ ବି ବର୍ଷା ଆକଳନ

ଜୁନ୍ ୬ ଅପରାହ୍ଣ ୨ଟା ୫୫ରୁ ୩ଟା ମଧ୍ୟରେ ମଧ୍ୟ ସମାନ ଘଟଣା ଘଟିଥିଲା ବାଲେଶ୍ଵରରେ । ପ୍ରଚଣ୍ଡ ଶବ୍ଦରେ ଲୋକଙ୍କ ଘରଦ୍ଵାର ଥରି ଉଠିଥିଲା । ପୁଣି ଏବେ ବାଲେଶ୍ଵରରେ ସେଭଳି ରହସ୍ୟମୟ ପ୍ରଚଣ୍ଡ ଶବ୍ଦ ଶୁଣିବାକୁ ମିଳିଛି । ଯାହାକୁ ନେଇ ଲୋକେ ଆତଙ୍କିତ ହୋଇ ପଡ଼ିଥିବା ବେଳେ ଶବ୍ଦ କେଉଁଠାରୁ ହେଲା, କାହିଁକି ହେଲା ସେନେଇ କିଛି ସ୍ପଷ୍ଟ ହୋଇ ନାହିଁ ।