ବାଲେଶ୍ଵର: ବାପାଙ୍କୁ ମେଡିକାଲ୍‌ରୁ ଆଣି ଘରେ ଛାଡ଼ିଲେ, ପୁଣି କାମ ଅଛି କହି ପଳାଇଲେ । ଆଉ କେଇ ଘଣ୍ଟା ପରେ ସେହି ମେଡିକାଲ୍‌ରେ ମିଳିଲା ପୁଅର ମୃତଦେହ । ଏଭଳି ଘଟଣା ଘଟିଛି ବାଲେଶ୍ଵରରେ । ବାଲେଶ୍ଵର ମେଡିକାଲର ସର୍ଜରୀ ୱାର୍ଡ ଡ୍ରେସିଂ ରୁମ୍‌ରେ ଆତ୍ମହତ୍ୟା କରିଛନ୍ତି ଯୁବକ । ମୃତକ ହେଉଛନ୍ତି ହସ୍ପିଟାଲ୍ ଆଟେଣ୍ଡାଣ୍ଟ ମୃତ୍ୟୁଞ୍ଜୟ ସାମଲଙ୍କ ପୁଅ ରୌମ୍ୟରଞ୍ଜନ ।

ସୂଚନା ଅନୁସାରେ, ଅନଲାଇନ୍ ଗେମ୍ ଖେଳି ଟଙ୍କା ହାରିଯିବାରୁ ଯୁବକ ଜଣଙ୍କ ଜୀବନ ହାରିଥିବା ସନ୍ଦେହ କରାଯାଉଛି । ବାପା ମୃତ୍ୟୁଞ୍ଜୟଙ୍କ ନାଇଟ୍ ସିଫ୍ଟ ଥିବା ବେଳେ ପ୍ରଥମେ ତାଙ୍କୁ ହସ୍ପିଟାଲରେ ନେଇ ଘରେ ଛାଡ଼ିଥିଲେ ରୌମ୍ୟ । ତା'ପରେ ରୌମ୍ୟ କାମ ଥିବା କହି ପୁଣି ମେଡିକାଲ ଆସିଥିଲେ । ରୌମ୍ୟ ଆଟେଣ୍ଡାଣ୍ଟଙ୍କ ପୁଅ ହୋଇଥିବାରୁ ପ୍ରାୟତଃ ମେଡିକାଲ୍ ଆସିଥାନ୍ତି । ତେଣୁ କେହି ସନ୍ଦେହ କରି ନଥିଲେ ।

ହେଲେ ଦୀର୍ଘ ସମୟ ଧରି ରୌମ୍ୟ ଘରକୁ ନ ଫେରିବାରୁ ସନ୍ଦେହ କରିଥିଲେ ପରିବାର ଲୋକ । ମେଡିକାଲରେ ପରିବାର ଲୋକ ପହଞ୍ଚି ଖୋଜାଖୋଜି କରିଥିଲେ । ଦୀର୍ଘ ସମୟ ଖୋଜାଖୋଜି ପରେ ସର୍ଜରୀ ୱାର୍ଡ ଡ୍ରେସିଂ ରୁମ୍‌ରୁ ମିଳିଥିଲା ରୌମ୍ୟଙ୍କ ଝୁଲନ୍ତା ଶରୀର । ସଙ୍ଗେ ସଙ୍ଗେ ଡାକ୍ତର ଦେଖିବା ସହ ମୃତ ଘୋଷଣା କରିଛନ୍ତି । ପୋଲିସ ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି ।