ଏଣିକି ପକ୍କାଘରରୁ ଆଉ କେହି ହେବେନାହିଁ ବଞ୍ଚିତ । ଅନ୍ତ୍ୟୋଦୟ ଗୃହ ଯୋଜନାରେ ଚଳିତ ବର୍ଷ ରାଜ୍ୟର ୧ ଲକ୍ଷ ୫୯ ହଜାର ଲୋକେ ଘର ପାଇବେ । ଏହି ସୂଚନା ଦେଇଛନ୍ତି ପଞ୍ଚାୟତିରାଜ ମନ୍ତ୍ରୀ ରବି ନାଏକ । ଅନ୍ତ୍ୟୋଦୟରେ ୫୯ ହଜାର ୯୩ ଜଣ ଦିବ୍ୟାଙ୍ଗ, ଅସହାୟ ଓ ବନ୍ୟା ବାତ୍ୟାରେ ଘର ଭାଙ୍ଗି ଥିବା ଲୋକଙ୍କୁ ବ୍ଲକ ସ୍ତରରେ ଘର ଦିଆଯାଇଛି । କିଛି ୱାର୍କ ଅଡର୍ ହୋଇଛି ଆଉ କିଛି ବାକି ଅଛି । ଆହୁରି ୧ ଲକ୍ଷ ହିତାଧିକାରୀଙ୍କ ତାଲିକା ଚଳିତ ମାସ ଭିତରେ ସଂଗ୍ରହ ପାଇଁ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯିବ । ଦୁଇ ମାସ ଭିତରେ ୱାର୍କ ଅଡର୍ ଇସ୍ୟୁ ହେବ । ଗତ ଥର ଯେଉଁ ନିୟମରେ ଘର ଦିଆଯାଇଥିଲା ସେହି ନିୟମରେ ଘର ଦିଆଯିବ ବୋଲି କହିଛନ୍ତି ପଞ୍ଚାୟତିରାଜ ମନ୍ତ୍ରୀ ।

ପୂର୍ବ ବିଜେଡି ସରକାରରେ ବିବାଦରେ ରହିଆସିଥିଲା ପକ୍କାଘର ଯୋଜନା । ପ୍ରଧାନମନ୍ତ୍ରୀ ଆବାସ ଯୋଜନାରେ ମିଳୁଥିବା ଘରରେ ବିଜୁପକ୍କା ଘର ଲୋଗୋ ଲଗାଇ ଚଞ୍ଚକତା କରିଥିଲେ ବିଜେଡି ସରକାର । ଏପରିକି ଆବାସ ଆବଣ୍ଟନରେ ବି ବଡ଼ ଧରଣର ଚଞ୍ଚଲତା ସାମ୍ନାକୁ ଆସିଥିଲା । ଦଳୀୟ ଭିତ୍ତିରେ ହିତାଧିକାରୀ ଚୟନ କରାଯାଉଥିଲା। ଯୋଗ୍ୟଙ୍କୁ ବାଦ ଦେଇ ଆଯୋଗ୍ୟଙ୍କୁ ବାଣ୍ଟି ଦିଆଯାଇଥିଲା ପିଏମ ଆବାସ । ତେଣୁ ଅନ୍ତ୍ୟୋଦୟ ଗୃହ ଯୋଜନା ସେହି ବଞ୍ଚିତଙ୍କୁ ପକ୍କାଘର ଦେବାରେ ସହାୟକ ହେବ । ଯାହାକୁ ନେଇ ଖୁସି ବ୍ୟକ୍ତ କରିଛନ୍ତି ହିତାଧିକାରୀ । ଆଗାମୀ 3 ବର୍ଷରେ 5 ଲକ୍ଷରୁ ଅଧିକ ପକ୍କାଘର ନିର୍ମାଣ ହେବ । ଏଥିପାଇଁ ସରକାର କରିବେ 7 ହଜାର 550 କୋଟି ଟଙ୍କା ବିନିଯୋଗ ।