ରାୟଗଡ଼ା: ବିଜେଡି ଛାଡ଼ିଲେ, ନୂଆ ମଞ୍ଚ ଗଢ଼ିଲେ । ଏବେ ବଳ ଭାଙ୍ଗିବେ । ଆମେ କହୁଛୁ ରାୟଗଡ଼ାର ଟାଣୁଆ ନେତା ଏନ୍. ଭାସ୍କର ରାଓଙ୍କ ବିଷୟରେ । ମଙ୍ଗଳବାର ବିଜେଡି ଛାଡ଼ି 'ବିଜୁ ସ୍ଵାଭିମାନ ମଞ୍ଚ' ଗଢ଼ିଥିବା ଭାସ୍କର ରାଓ ଆରମ୍ଭ କରିଛନ୍ତି ଗୋଟି ଚାଳନା । ଆଉ ଭାସ୍କରଙ୍କ ପ୍ରଥମ ଗୋଟି ଚାଳନା ବିଜେଡିକୁ ବଡ଼ ଝଟ୍‌କା ଦେଇଛି ।

୨୦୨୩ ପୌର ନିର୍ବାଚନରେ ଦଳରେ ଥାଇ ଏନ୍. ଭାସ୍କର ରାଓଙ୍କୁ ଅଣଦେଖା କରିଥିଲା ବିଜେଡି । ସେତେବେଳେ ବିଜେଡି ରାୟଗଡ଼ା ପୌର ପରିଷଦ ହାତେଇ ଥିଲା । ଆଉ ଏବେ ସମୟ କ୍ରମେ ଭାସ୍କର ରାଓ ବିଜେଡି ଛାଡ଼ିବା ସହ ଦଳର ବଳ ଭାଙ୍ଗିବାକୁ ଅଣ୍ଟା ଭିଡ଼ିଛନ୍ତି ।

ରାୟଗଡ଼ା ପୌର ପରିଷଦର ଅଧ୍ୟକ୍ଷ ଓ ଉପାଧ୍ୟକ୍ଷା ଉଭୟ ବିଜେଡିର ହୋଇଥିବା ବେଳେ ଭାସ୍କର ଦଳ ଛାଡ଼ିବା ପରେ ଗଣିତ ବଦଳିଛି । ଏବେ ରାୟଗଡ଼ା ପୌର ଅଧ୍ୟକ୍ଷ ଭାସ୍କରଙ୍କ ଗୋଷ୍ଠୀର ହୋଇଥିବା ବେଳେ ଉପାଧ୍ୟକ୍ଷା ଶୁଭ୍ରା ପଣ୍ଡା, ପୂର୍ବତନ ଜିଲ୍ଲା ବିଜେଡି ସଭାପତି ସୁଧୀର ଦାସଙ୍କ ଘନିଷ୍ଠ । ତେଣୁ ବିଜେଡିର ଚେର କାଟିବା ଆରମ୍ଭ କରିଛନ୍ତି ଏନ୍. ଭାସ୍କର ରାଓ ।

ରାୟଗଡ଼ା ପୌର ପରିଷଦର ଉପାଧ୍ୟକ୍ଷା ଶୁଭ୍ରା ପଣ୍ଡାଙ୍କ ବିରୋଧରେ ଅନାସ୍ଥା ଆଣିଛନ୍ତି ୨୧ କାଉନସିଲରଙ୍କ ମଧ୍ୟରୁ ୧୯ ଜଣ । ବିଗତ ତିନି ବର୍ଷ ହେଲା ଉପାଧ୍ୟକ୍ଷା କାଇନସିଲରଙ୍କ ମତକୁ ସମ୍ମାନ ନ ଦେଇ କାମ କରୁଥିବା ଅଭିଯୋଗ କରିଛନ୍ତି । ଉପାଧ୍ୟକ୍ଷାଙ୍କ ବିରୋଧରେ ଅନାସ୍ଥା ଆଣି ଏନ୍. ଭାସ୍କର ରାଓ ବିଜେଡିର ଚେର କାଟିବା ସହ ଶକ୍ତି ପ୍ରଦର୍ଶନ କରିବାକୁ ପ୍ରୟାସ ଆରମ୍ଭ କରିଥିବା ଚର୍ଚ୍ଚା ହେଉଛି । ଏନେଇ ପୂର୍ବତନ ରାଜ୍ୟସଭା ସାଂସଦ ଏନ୍.ଭାସ୍କର ରାଓଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ ।