ନବୀନଙ୍କୁ ଭୂପିନ୍ଦରଙ୍କ ତେରଛା ବାଣ । ଟ୍ରାନ୍ସପରେନସି ରଖନ୍ତୁ ସଭାପତି । ଅସନ୍ତୋଷ ଥିବା ନେତାଙ୍କୁ ଡାକି ଆଲୋଚନା କରନ୍ତୁ । ଯୁବନେତାଙ୍କୁ ଡାକି ସେମାନଙ୍କର ଦାବି ଶୁଣନ୍ତୁ । ଯୁବ ନେତା କାହିଁକି ମେଳି ବନ୍ଧୁଛନ୍ତି । ବଦ୍ରି ବାବୁ କାହିଁକି ବିଷୋଦଗାର କଲେ, ଚମ୍ପୁଆ ବିଧାୟକ କାହିଁକି ଗେରୁଆ ପୋଷ୍ଟର ମାରିଲେ । ଏସବୁ କଥା ନିଜେ ନବୀନ ପଟ୍ଟନାୟକ ସେମାନଙ୍କ ସହ ଆଲୋଚନା କରନ୍ତୁ ।

ସଭାପତି ବ୍ୟକ୍ତିଗତ ଭାବେ ଡାକି ତାଙ୍କ ସହ କଥା ହେବା ଉଚିତ୍ । ଜଣେ ଦୁଇ ଜଣ ଦଳକୁ ଚଳାଉ ନାହାନ୍ତି । ନବୀନ ବାବୁ ଥିବା ପର୍ଯ୍ୟନ୍ତ ଦଳ ଚାଲିବ । ସରକାରରେ ଥିବା ବେଳେ ଜଣେ ଦୁଇ ଜଣ ରାଜ୍ୟ ସାରା ବୁଲିଲେ ହେଲେ ତାହା ଫେଲ ମାରିଲା । ତେଣୁ ବୈଠକରେ ଦଳ ପରିଚାଳନା ପାଇଁ ସିନିଅର ଜୁନିଅରକୁ ନେଇ ଟିମ ତିଆରି କରିବା ପାଇଁ ନବୀନଙ୍କୁ ଆମେ ଅନୁରୋଧ କରିଥିଲୁ । ସଭାପତି ବି ଆମ କଥାରେ ହଁ କରିଥିଲେ । ଦଳକୁ କିଏ ଆସିବ ନ ଆସିବ ସଭାପତି ନିଷ୍ପତି ନେବେ । ହେଲେ ୪୦ ରୁ ଅଧିକ ଯୁବ ନେତା ସେମାନଙ୍କ ମେସେଜ ଦେଇ ସାରିଛନ୍ତି । ଏଭଳି କହି ବିଜେଡି ସଭାପତି ନବୀନ ପଟ୍ଟନାୟକଙ୍କୁ ବାର୍ତା ଦେଇଛନ୍ତି ଭୁପିନ୍ଦର ।

ଭୁପିନ୍ଦରଙ୍କ ଏଭଳି ବୟାନ ପରେ ପୁଣି ବିଜେଡି କଳି ଦାଣ୍ଡରେ ପଡ଼ି ହାଟରେ ଗଡ଼ୁଛି । ନେତାଙ୍କ ମଧ୍ୟରେ ସମନ୍ୱୟ ନଥିବା କଥା ସ୍ପଷ୍ଟ ବାରି ହୋଇପଡ଼ୁଛି । ଭୁପିନ୍ଦର ମଧ୍ୟ ନାଁ ନନେଇ ସେଇ କିଛି ନିର୍ଦ୍ଦିଷ୍ଟ ନେତାଙ୍କୁ ଟାର୍ଗେଟ କରିଛନ୍ତି । ଆଉ କଥା ଛଳରେ ଏହା ମଧ୍ୟ କହିଛନ୍ତି ଯେ, ନବୀନ ଥିଲା ଯାଏଁ ବିଜେଡି ଅଛି । ତାଙ୍କର ଏହି ପଦିଏ କଥାକୁ କିଏ କେମିତି ଗ୍ରହଣ କରିବେ ତାହା ତ ସମୟ କହିବ, କିନ୍ତୁ ଏହି ସମାନ କଥା ପୂର୍ବରୁ ମଧ୍ୟ ଅନେକ ରାଜନୈତିକ ସମୀକ୍ଷକମାନେ ମଧ୍ୟ କହିସାରିଛନ୍ତି ।

ଏବେ ଭୁପିନ୍ଦରଙ୍କ ବୟାନ ପରେ ବିଜେଡିର ଅନ୍ୟ ନେତାମାନେ କ'ଣ ପ୍ରତିକ୍ରିୟା ରଖୁଛନ୍ତି, ତାଉପରେ ସମସ୍ତଙ୍କ ନଜର ରହିଛି । ଏହାସହ ନବୀନ ପଟ୍ଟନାୟକ ସମସ୍ତ ଅସନ୍ତୁଷ୍ଟ ନେତାଙ୍କୁ ଡାକି ଆଲୋଚନା କରୁଛନ୍ତି କି ନାହିଁ ତାକୁ ଅପେକ୍ଷା ।

ନକଟରେ ଯାଜପୁର ବିଜେଡିରେ ଥିବା କଳି ମଧ୍ୟ ସାମ୍ନାକୁ ଆସିଥିଲା । ଚର୍ଚ୍ଚା ହେଉଛି କୋରେଇ ସଭା ମଞ୍ଚରେ ବବିଙ୍କ ବୟାନ, ବିବାଦକୁ ଅଧିକ ବଢାଇଥିଲା । ଆଉ ଏହାରି ଭିତରେ ଭୁବନେଶ୍ୱର ସ୍ଥିତ ବାସଭବନରେ ବୈଠକ ଡାକି ସମାଧାନର ବାଟ କାଢିବାକୁ ପ୍ରମିଳାଙ୍କ ଉଦ୍ୟମ ବି ଚର୍ଚ୍ଚାକୁ ବେଶ୍‌ ଖୋରାକ୍ ଯୋଗାଇଛି । ବୈଠକ ପରେ ବବି ବଡ଼ ନେତା ନୁହଁନ୍ତି କହି ସବୁ ବିଗାଡ଼ି ଦେଇଥିଲେ ସୁଜାତା । ଯାଜପୁର ବିଧାୟିକାଙ୍କ ଏଭଳି ବିସ୍ଫୋରକ ବୟାନକୁ ନେଇ ବିଜେଡିରେ କମ୍ପନ ସୃଷ୍ଟି ହୋଇଛି ।

ଏହି ଘଟଣା ପରେ କୁହାଗଲା ବର୍ଷ ଆରମ୍ବରୁ ବିଜେଡିରେ ଘନେଇଲା ବିବାଦ । ସାମ୍ନାକୁ ଆସିଲା ଯାଜପୁର ବିଜେଡି କଳି । ଶଙ୍ଖ ଭବନ ଛାଡ଼ି ପ୍ରମିଳାଙ୍କ ଘରେ ବସିଲା ବୈଠକ । ଏକାଠି ହେଲେ ଯାଜପୁରିଆ ବିଜେଡି ନେତା । ସଂଗଠନ ସଜାଡ଼ିବା ଆଳରେ ମନ ମାଳିନ୍ୟ ଦୂର କରିବାକୁ ବୈଠକ ଡାକି ପ୍ରଚେଷ୍ଟା କଲେ ପ୍ରମିଳା । କୋରେଇରେ କାଲି କହୁ କହୁ ଯାଜପୁର ବିଜେଡିର ଭିତିରି କଥା କହିଦେଇଥିଲେ ବବି । କହିଥିଲେ ଆମ ବିଜେଡି ନେତାଙ୍କ ଭିତରେ ପରସ୍ପର ପ୍ରତି ରହିଛି ବିଦ୍ଵେଷ ଭାବ । ଆମ ବିଜେଡି ନେତାଙ୍କ ଭିତରେ ସୃଷ୍ଟି ହୋଇଛି ଅବିଶ୍ଵାସର ବାତାବରଣ । ତେବେ ବୈଠକରୁ ବାହାରିବା ପରେ ବର୍ଷିଛନ୍ତି ସୁଜାତା ।