ବିଧାନସଭା ଭିତରେ ଓ ବାହାରେ କଂଗ୍ରେସ କଲା ହାଇଡ୍ରାମା । କଂଗ୍ରେସ ସହ ମିଶିଗଲା ବିଜେଡ଼ି । ପ୍ରତିବାଦ ନାଁରେ ବିଧାନସଭା ଗେଟ୍ ର ବ୍ୟାରିକେଡ଼ ଭାଙ୍ଗିଲେ ବିଜେଡ଼ି ଓ କଂଗ୍ରେସ ବିଧାୟକ । ଥରେ ନଜର ପକାନ୍ତୁ, ଏ ହେଉଛି ଆଜି ସକାଳର ଭିଜୁଆଲ । ନିଲମ୍ବନ ପରେ ବିଧାନସଭା ଭିତରକୁ ଧସେଇ ପଶିବା ପାଇଁ ପୋଲିସ ସହ ଧସ୍ତାଧସ୍ତି କରୁଛନ୍ତି କଂଗ୍ରେସ ବିଧାୟକ ଓ ଦଳର କର୍ମୀ । ଆଉ ଠିକ୍ ଏତିକି ବେଳେ ହଠାତ୍ ହାତରେ ପ୍ଲାକାର୍ଡ ଧରି ଭିତରୁ ମାଡ଼ି ଆସିଥିଲେ ବିଜେଡିର ବିଧାୟକ ମାନେ । ଆଉ ଉଭୟ କଂଗ୍ରେସ ଓ ବିଜେଡି ବିଧାୟକ ମିଳିତ ଭାବେ ଠେଲା ପେଲା କରି ବ୍ୟାରିକେଡ଼କୁ ଭାଙ୍ଗିଦେଇଥିଲେ । ଏପରିକି ବାହାରକୁ ଆସି ଓବିସି ସଂରକ୍ଷଣ ପ୍ରସଙ୍ଗରେ ପ୍ରତିବାଦ ମଧ୍ୟ କରିଥିଲେ ବିଜେଡ଼ି ବିଧାୟକ । ତେବେ କେବଳ ଏତିକିରେ ବିଜେଡ଼ି ଚୁପ୍ ବସିଥିଲା । ଶୂନ୍ୟ କାଳରେ କଂଗ୍ରେସ ବିଧାୟକଙ୍କ ପାଇଁ ଓକିଲାତି କରିଥିଲେ ବିଜେଡ଼ି ବିଧାୟକ । କଂଗ୍ରେସ ବିଧାୟକଙ୍କ ଉପରୁ ନିଲମ୍ବନ ଉଠାଇବା ପାଇଁ ଗୃହରେ ବିଜେଡିର ଏକାଧିକ ବିଧାୟକ ଦାବି କରିଥିଲେ ।

ଅନ୍ୟପଟେ ଉଭୟ ବିଜେଡ଼ି ଓ କଂଗ୍ରେସ ଉପରେ ସାମ୍ବାଦିକ ସମ୍ମିଳନୀ କରି ଜୋରଦାର ବର୍ଷିଛନ୍ତି ଆଇନ ମନ୍ତ୍ରୀ । ବିରୋଧୀ ବିଧାନସଭା ୱାସଆଉଟ୍ କରିବାକୁ ଷଡ଼ଯନ୍ତ୍ର କରୁଛନ୍ତି । ବିଶୃଙ୍ଖଳା କରି ଗୃହର ସମୟ ନଷ୍ଟ କରୁଛନ୍ତି ବିରୋଧୀ । ବିଧାନସଭାରେ କଂଗ୍ରେସର ଆଚରଣ ଓ ଉଚ୍ଚାରଣ ନିନ୍ଦନୀୟ । ଘଣ୍ଟ ଘଣ୍ଟା ପିଟି ପବିତ୍ର ଗୃହକୁ ଅପମାନିତ କରିଛନ୍ତି । ବିଜେଡ଼ି ଆଇନଶୃଙ୍ଖଳା କଥା କହିବା ଲଙ୍କାରେ ହରି ଶବ୍ଦ ଭଳି । କଂଗ୍ରେସର ଗୃହ କମିଟି ଗଠନ ଦାବି ଅଯୌକ୍ତିକ ବୋଲି କହିଛନ୍ତି ଆଇନ ମନ୍ତ୍ରୀ ।

ଗଣତନ୍ତ୍ରରେ ପ୍ରତିବାଦ ଲାଗି ସମସ୍ତଙ୍କର ଅଧିକାର ଅଛି । କିନ୍ତୁ ପ୍ରତିବାଦ ନାଁରେ ବିଧାନସଭାର ଶୃଙ୍ଖଳା ଭାଙ୍ଗ କରିବା ଠିକ୍ କି ବୋଲି ଉଠିଛି ପ୍ରଶ୍ନ ? ୨୭ ତାରିଖ ଆନ୍ଦୋଳନ ପୂର୍ବରୁ ଲୋକଙ୍କ ଦୃଷ୍ଟି ଆକର୍ଷଣ ଲାଗି କଂଗ୍ରେସର ପ୍ରାଣମୂର୍ଚ୍ଛା ଉଦ୍ୟମ କରୁଛି କି । 25 ବର୍ଷରେ କଂଗ୍ରେସର ଭୋଟ୍ ପ୍ରତିଶତ ପହଞ୍ଚିଲା ୧୩ ପ୍ରତିଶତରେ । ଲୋକଙ୍କଠୁ କଟିବାର କଂଗ୍ରେସର ଲମ୍ବା ପ୍ରକ୍ରିୟା । ଗଣତନ୍ତ୍ରରେ ପ୍ରତିବାଦ କରିବା ଠିକ୍, ହେଲେ ଉତ୍‌ପଟାଙ୍ଗ କାମ କରି ଲୋକଙ୍କ ଧ୍ୟାନ ଆକର୍ଷଣ କରୁଛି ଦଳ । ୧୨ ପରେ ଆଜି ୨ ବିଧାୟକ ନିଲମ୍ବିତ । ବିଧାନସଭାରେ ଆଉ ନାହାନ୍ତି କଂଗ୍ରେସ ସଦସ୍ୟ । କଂଗ୍ରେସ ପ୍ରସଙ୍ଗ ଲାଗି ପ୍ରତିବାଦ କରୁଛି, ନା ବିଜେଡିର ମୋହରା ସାଜି ଗୃହକୁ ଅଚଳ କରୁଛି ତାକୁ ନେଇ ଉଠିଲା ପ୍ରଶ୍ନ ।