ପୁଣି ଜଣେ ବିଜେଡି ନେତା ତଥା ପୂର୍ବତନ ବିଧାୟକ ହୃଷିକେଶ ନାଏକ ଦେଇଛନ୍ତି ବିସ୍ଫୋରକ ବୟାନ । ଶଙ୍ଖ ଭବନ ବାହାରେ ବରିଷ୍ଠ ନେତାଙ୍କ ମେଳିକୁ ନେଇ ବିବାଦ ଥମୁନଥିବା ବେଳେ ପୂର୍ବତନ ବିଜେଡି ବିଧାୟକ ହୃଷିକେଶ ନାଏକ କହିଛନ୍ତି, ମୋ ବିଶ୍ୱାସରେ ବିଷ ଦେଇଥ‌ିବା ବିଜୁ ଜନତା ଦଳ ଧ୍ବଂ ସ ହୋଇଯିବ ।

୨୦୧୯ରେ ଦଳ ଲୋକସଭାକୁ ପଠାଇବା ପାଇଁ ପ୍ରତିଶ୍ରୁତି ଦେଇଥିଲା ହେଲେ ପଠାଇଲେ ନାହିଁ । ସେ ଲୋକସଭା ଟିକେଟ୍ ଲୋଭରେ ମୁହଁ ଖୋଲିନଥିଲେ, ହେଲେ ଦଳ ତାଙ୍କୁ ଲୋକସଭା ଟିକେଟ୍ ନଦେଇ ସନାତନ ମହାକୁଡ଼ଙ୍କ କଥାରେ ଚନ୍ଦ୍ରାଣୀ ମୁର୍ମୁଙ୍କୁ ଲୋକସଭା ପ୍ରାର୍ଥୀ କରିଥିଲା। ଏହି ସମୟରେ ଦଳ ତାଙ୍କୁ ରାଜ୍ୟସଭାକୁ ପଠାଇବ ବୋଲି ମଧ୍ୟ ପ୍ରତିଶ୍ରୁତି ଦେଇଥିଲା । ହେଲେ ଦଳ, କଥା ରଖିଲା ନାହିଁ । ଦଳ ଯେଉଁଭଳି ନିରାଶ କରିଛି ନିଶ୍ଚୟ ନିଶ୍ଵାସ ପଡ଼ିବ ଓ ଦଳ ଧ୍ବଂସ ହୋଇଯିବ । ପାଣ୍ଡିଆନଙ୍କୁ ବିଦା କର କହିଛନ୍ତି ହୃଷିକେଶ ।

ଅନ୍ୟପଟେ ନବୀନଙ୍କୁ ରାଜାଙ୍କ ଚିିଠ ନେଇ ମଧ୍ୟ ଝଡ଼ ସୃଷ୍ଟି ହୋଇଛି । ସାଂଗଠନିକ ନିର୍ବାଚନ ଭିତରେ ନବୀନଙ୍କୁ ରାଜାଙ୍କ ଚିଠି ଲେଖିଛନ୍ତି ବରିଷ୍ଠ ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ । ଯେଉଁ ଚିଠି ଦଳୀୟ ମହଲରେ ଆଲୋଡ଼ନ ସୃଷ୍ଟି କରିଛି । ତାଙ୍କ ଚିଠି ପରୋକ୍ଷରେ କହିଦେଉଛି, ଦଳକୁ କେହି ଜଣେ ହାଇଜାକ୍‌ କରିବାକୁ ଚେଷ୍ଟା କରୁଛି । ଚିଠିରେ ରାଜା ଲେଖିଛନ୍ତି ଦଳକୁ କେହି ହାଇଜାକ୍‌ ନକରନ୍ତୁ । ସଂଗଠନରେ ସଂରକ୍ଷଣ କରିବାକୁ ସେ ସଭାପତିଙ୍କୁ ପ୍ରସ୍ତାବ ଦେଇଛନ୍ତି ରାଜା ।

ଆହୁରି ଲେଖିଛନ୍ତି, ବିଜେଡି ସାମାଜିକ ନ୍ୟାୟ, ଧର୍ମନିରପେକ୍ଷତା ଓ ଆଞ୍ଚଳିକ ସନ୍ତୁଳନକୁ ନେଇ ଆଗକୁ ବଢ଼ିବା ଉଚିତ। ଏସ୍‌ସି, ଏସ୍‌ଟି, ଓବିସି, ସଂଖ୍ୟାଲଘୁ ଓ ମହିଳାଙ୍କୁ ସେମାନଙ୍କ ସଂଖ୍ୟା ଅନୁପାତରେ ବିଜେଡିର ରାଜ୍ୟ, ଜିଲ୍ଲା ଓ ବ୍ଳକ୍ କମିଟିରେ ସ୍ଥାନ ମିଳୁ । କିଛି ଲୋକଙ୍କୁ ଦଳର ସଂଗଠନକୁ ହାଇଜ୍ୟାକ୍ କରିବାକୁ ଦିଆନଯାଉ । ସେ ଏହା ବି ସତର୍କ କରାଇ ଦେଇଛନ୍ତି, ୱାକଫ୍ ବିଲ୍‌ ବିବାଦ ଆମର ଧର୍ମନିରପେକ୍ଷତାରେ ପ୍ରଶ୍ନ ଚିହ୍ନ ଲଗାଇ ଦେଇଛି । ତେଣୁ ଧର୍ମନିରପେକ୍ଷ ଓ ସାମାଜିକ ନ୍ୟାୟ ଆଦର୍ଶକୁ ଉଜ୍ଜୀବିତ ରଖିବାକୁ ଉଚିତ ପଦକ୍ଷେପ ନିଆଯାଉ ।

ସେପଟେ ରାଜାଙ୍କ ଚିଠିକୁ ନେଇ ପ୍ରତିକ୍ରିୟା ରଖିଛନ୍ତି ସମନ୍ୱୟ କମିଟିର ଅଧ୍ୟକ୍ଷ ଦେବୀ ପ୍ରସାଦ ମିଶ୍ର । ସଂଗଠନରେ ସମସ୍ତଙ୍କୁ ଗୁରୁତ୍ୱ ଦିଆଯାଉଛି । ଆଞ୍ଚଳିକ ଦଳ ଭାବେ, ସବୁ ସମ୍ପ୍ରଦାୟର ପ୍ରତିନିଧିମାନେ ସଂଗଠନରେ ରହୁଛନ୍ତି । ରାଜାଙ୍କ ହାଇଜ୍ୟାକ ଅଭିଯୋଗ ଉପରେ ପ୍ରତିକ୍ରିୟା ରଖି କହିଛନ୍ତି ହାଇଜ୍ୟାକ କଥା ସେ ଜାଣିଥିବେ । ହାଇଜ୍ୟାକ କଥା ସେ ବୁଝେଇ ପାରିବେ । ସେ ହାଇଜ୍ୟାକ କଥାଟା ବେଶି ଜାଣିଥିବେ।

ରାଜାଙ୍କର ସେ ବିଷୟରେ ଅଭିଜ୍ଞତା ଥିବ । ଆଗରୁ କିଏ ହାଇଜ୍ୟାକ କରି ଦେଇଛି କି ? ଆମେ ନଈ ନ ଦେଖୁଣୁ ଲଙ୍ଗଳା କାହିଁକି ହେବା । ରାଜା ସ୍ୱାଇଁ ଜଣେ ବରିଷ୍ଠ ନେତା ତାଙ୍କର ବହୁତ ଅଭିଜ୍ଞତା ରହିଛି । ହାଇଜ୍ୟାକ କଥା ଯଦି କଣ ସେ ଜାଣି ଥିବେ କି ସୂଚନା ପାଇଥିବେ ସେ ସେଇଟା କହି ପାରିବେ । ଆମେ ସଙ୍ଗଠନରେ ସମସ୍ତଙ୍କୁ ନେଇ ଚାଲୁଛୁ । ସଂଗଠନରେ ସମସ୍ତଙ୍କୁ ଗୁରୁତ୍ୱ ଦିଆଯାଉଛି ।

Argus News | argus news | Odisha Latest News, Breaking News, Trending News, Live TV