ୱାକଫ୍ ଘମାସାନ୍ ଭିତରେ ବିଜେଡିରେ ଆରମ୍ଭ ହୋଇଯାଇଛି ଗୃହ ଯୁଦ୍ଧ । ପାଣ୍ଡିଆନଙ୍କୁ ନେଇ ଦୁଇ ଭାଗରେ ବିଭକ୍ତ ହୋଇଛି ବିଜେଡି । ପାଣ୍ଡିଆନ ସପକ୍ଷବାଦୀ ଓ ବିପକ୍ଷବାଦୀଙ୍କ ଭିତରେ ଚାଲିଛି ଜୋରଦାର ଲଢେଇ । ରାଜ୍ୟସଭା ଘଟଣାରେ ଜବାବ ମାଗି ୫ ଦିନ ହେବ ମେଳି ବାନ୍ଧି ଶକ୍ତି ପ୍ରଦର୍ଶନ କରୁଥିବା ଆଣ୍ଟି ପାଣ୍ଡିଆନ ଗୋଷ୍ଠୀଙ୍କୁ ସମାନ ଶୈଳିରେ ଆଜି କାଉଣ୍ଟର କରିଛନ୍ତି ପ୍ରୋ-ପାଣ୍ଡିଆନ ନେତା । ପ୍ରଥମେ ପଟିଆ ସ୍ଥିତ ଏକ ହୋଟେଲରେ ଆଜି ଏକାଠି ହୋଇଥିଲେ ପାଣ୍ଡିଆନ ବିପକ୍ଷବାଦୀ କୁହାଯାଉଥିବା ଦଳର କିଛି ହେଭିୱେଟ ନେତା । ବୈଠକରେ ପାଣ୍ଡିଆନ ଓ ପାଣ୍ଡିଆନ ସପକ୍ଷବାଦୀ ଗୋଷ୍ଠୀଙ୍କ ବିରୁଦ୍ଧରେ ଦିଆଯାଇଥିଲା ଯୁଦ୍ଧଂ ଦେହି ଡାକରା । ପାଣ୍ଡିଆନଙ୍କ ନାଁ ନ ନେଇ, ବାହ୍ୟ ଶକ୍ତି ଓ ଦଳକୁ କ୍ଷତି ପହଞ୍ଚାଉଥିବା ଲୋକଙ୍କୁ ଆଉ ବରଦାସ୍ତ କରାଯିବନି ବୋଲି କହିଛନ୍ତି ବୈଠକରେ ସାମିଲ ହୋଇଥିବା ନେତା । ଆହୁରି କୁହାଯାଇଛି ବିଜେଡିରେ ବର୍ତ୍ତମାନ ମନ୍ଥନ ଚାଲିଛି । ବିଷ ବି ବାହାରିବ, ଅମୃତ ବି ବାହାରିବ। ଯିଏ କ୍ଷତି କରିଛି ତାକୁ ବିଷ ଦିଆଯିବ ଆଉ ଆମେ ଅମୃତ ପାନ କରିବୁ।

ସେପଟେ ସାଂଗଠନିକ ବୈଠକ ଆଳରେ ପ୍ରତାପ ଦେବଙ୍କ କ୍ୱାଟରରେ ଏକାଠି ହେଲେ ପ୍ରୋ-ପାଣ୍ଡିଆନ ନେତା। କିଛି ଦିନ ତଳେ ପାଣ୍ଡିଆନଙ୍କ ପତ୍ନୀ ସୁଜାତା କାର୍ତ୍ତିକେୟନ ଙ୍କୁ ଭୁୟଶୀ ପ୍ରଶଂସା କରିଥିବା ଅତନୁ ସବ୍ୟସାଚୀ ନାୟକ ଙ୍କ ସମେତ ପ୍ରଣବ ପ୍ରକାଶ ଦାସ, ସଂଜୟ ଦାସବର୍ମା ଓ ଅରୁଣ ସାହୁ, ଦେବୀ ମିଶ୍ର ପ୍ରମୁଖ ଏକାଠି ମେଳି ବାନ୍ଧି ଥିଲେ । ବୈଠକରେ ସାଂଗଠନିକ ପ୍ରସଙ୍ଗ ଆଲୋଚନା ହୋଇଥିବା କହି ପାଣ୍ଡିଆନ ବିପକ୍ଷବାଦୀଙ୍କୁ ବି କରିଥିଲେ କାଉଣ୍ଟର । ବାହ୍ୟ ଶକ୍ତି କିଏ ବୋଲି କହି ବିପକ୍ଷବାଦୀଙ୍କୁ ସପକ୍ଷବାଦୀଙ୍କ ପକ୍ଷରୁ ଜବାବ ମଗାଯାଇଛି ।

ସେପଟେ ୱାକଫ ଭୋଟ ନବୀନ ନିବାସର ନିର୍ଦ୍ଦେଶରେ ଆସିଥିଲା କହି ପୁରା ମାମଲାରେ ନବୀନଙ୍କ ଭୂମିକାକୁ ନେଇ ପ୍ରଶ୍ନ ଉଠାଇଛନ୍ତି ବରିଷ୍ଠ ସାମ୍ବାଦିକ ରୁବେନ ବାନାର୍ଜି  ବିବେକ ଭୋଟ । ଅସ୍ବିକାର କରିବା ଚେଷ୍ଟା ବୃଥା ବୋଲି କହିଛନ୍ତି ରୁବେନ । ଆଜି ସଂନ୍ଧ୍ୟାରେ ନବୀନ ନିବାସ ଆଗରେ ଛାତ୍ର ବିଜେଡିର କିଛି ନେତା ଓ ସଦସ୍ୟ ପାଣ୍ଡିଆନ ଗୋ ବ୍ୟାକ ନାରା ଦେଇଥିଲେ । ୱାକଫକୁ ନେଇ ବିଜେଡିର ଘମାସାନ ପାଇଁ କିଛି ପାଣ୍ଡିଆନକୁ ଦାୟି କରୁଥିବା ବେଳେ ନବୀନ କିନ୍ତୁ ନିରବ ଦ୍ରଷ୍ଚା ।ଏସବୁ ଭିତରେ ଆଣ୍ଟି ପାଣ୍ଡିଆନ ଗୋଷ୍ଠୀ ବିଜୁ ବ୍ୟାନରରେ ନୂଆ ଦଳ ଗଠନ କରିବା ଚର୍ଚ୍ଚା । ଯଦି ଏମିତି ହୁଏ ତେବେ ବିଜେଡି ଗୃହ ଯୁଦ୍ଦ ଆଗକୁ ଆହୁରି ରୋଚକ ମୋଡ ନେଇପାରେ ।