ଅର୍ଗସ ବ୍ୟୁରୋ: ମଞ୍ଚ ଉପରେ..ସଭାସମିତିରେ ତ ଯାହା ଅଭଦ୍ରାମୀ କରୁଥିଲେ ହେଲେ ଏବେ ଖୋଦ ବିଧାନସଭାରେ ଅଭଦ୍ରାମୀର ସବୁ ସୀମା ପାର କରିଦେଇଛନ୍ତି ଜୁନାଗଡର ବିଜେଡି ବିଧାୟକ ଦିବ୍ୟଶଙ୍କର ମିଶ୍ର । ସ୍ଥିତି ଏମିତି ହୋଇଥିଲା ଯେ ଶିଳ୍ପମନ୍ତ୍ରୀ ଚୁପ୍‌ ରହିବାକୁ ଦିବ୍ୟଙ୍କୁ ପରାମର୍ଶ ଦେଇଥିଲେ । ହେଲେ ବିଧାୟକ ଏହାକୁ ତିଳେ ମାତ୍ର ଖାତିର ନକରି ଗୃହ ଭିତରେ ଏମିତି ଆଚରଣ ଦେଖାଇଥିଲେ ଯାହାକୁ ନେଇ ପୁଣି ଥରେ ବିଜେଡି ସରକାରର ନେତା କେତେ ଭଦ୍ର ତାହାର ଗୁମର ଖୋଲିଛି ।

ଶୀତ ଅଧିବେଶନର ପ୍ରଶ୍ନକାଳ ଚାଲିଥିବା ବେଳେ ବିରୋଧୀ ଦଳର ମୁଖ୍ୟ ସଚେତକ ମୋହନ ମାଝୀ ଶିଳ୍ପ ବିକାଶ ସମ୍ପର୍କରେ ମନ୍ତ୍ରୀଙ୍କୁ ପ୍ରଶ୍ନ କରିଥିଲେ । ପରେ ଉତ୍ତର ଠିକ୍‌ ନୁହେଁ ବୋଲି କହିଥିଲେ ମୋହନ । ହେଲେ ଏତିକିରେ ମନ୍ତ୍ରୀଙ୍କ ବାମ ପାର୍ଶ୍ଵରେ ବସିଥିବା ଦିବ୍ୟଶଙ୍କରଙ୍କର ରାଗ ଏତେ ପଂଚମ ହୋଇଯାଇଥିଲା ଯେ Who Are You କହିବା ସହିତ ନିଜ ଚୌକିରୁ ଉଠିଯାଇ ଅତି ଜୋରରେ ପାଟିତୁଣ୍ଡ କରିଥିଲେ । ଆଉ ଏମିତି ବିଷମ ସ୍ଥିତିକୁ ଅଣାୟତ୍ତ କରିବାକୁ ମନ୍ତ୍ରୀ ବାରମ୍ବାର ଚୁପ୍‌ ହେବାକୁ ନିବେଦନ କରିଥିଲେ । ହେଲେ ମନ୍ତ୍ରୀଙ୍କ କଥାକୁ ଭ୍ରୁକ୍ଷେପ କରିନଥିଲେ ବିଧାୟକ । ବରଂ ଚିତ୍କାର କରି ପାଟି କରିଥିଲେ । ଯାହାକୁ ନେଇ ଏବେ ଚର୍ଚ୍ଚା ଚାଲିଛି ।

ତେବେ ଏଠାରେ ପ୍ରଶ୍ନ ଉଠୁଛି, ପବିତ୍ର ଗୃହରେ ଏମିତି ଅଭଦ୍ରାମୀ କାହିଁକି କଲେ ଦିବ୍ୟଶଙ୍କର ? ମମିତା ମେହେର ହତ୍ୟାକାଣ୍ଡରେ ଆକ୍ସନ ନହେବାରୁ ଇନ୍ଦ୍ରଚନ୍ଦ୍ର ମାନୁନାହାନ୍ତି କି ଦିବ୍ୟଶଙ୍କର ? ନା ପାୱାରଫୁଲ ବିଧାୟକ ହୋଇଥିବାରୁ କାହାକୁ ଖାତିର ନାହିଁ ? କେବଳ ଏବେ ନୁହେଁ ବରଂ ପୂର୍ବରୁ ବି ଦିବ୍ୟଶଙ୍କରଙ୍କ ନାଁରେ ହତ୍ୟାକାଣ୍ଡ ପରି ଅଭିଯୋଗ ଥିଲା । କିନ୍ତୁ ମମିତା ଘଟଣାରେ ତାଙ୍କ ବିରୋଧରେ ଆକ୍ସନ ହେଲାନାହିଁ । ବୋଧହୁଏ ଦଳକୁ ସୁହାଇବା ପରି ଏମିତି ପାଟିତୁଣ୍ଡ କଲେ ଟିକେଟ୍‌ ମିଳିବା ନେଇ ଆଶା ରଖିଛନ୍ତି ଦିବ୍ୟ । ତେବେ ଘଟଣାକୁ ନେଇ ବିଜେଡିର କୌଣସି ପ୍ରତିକ୍ରିୟା ଆମର ହସ୍ତଗତ ହୋଇନାହିଁ ।