ଅର୍ଗସ ବ୍ୟୁରୋ: ସରକାରରେ ଥିଲା ବେଳେ ତ ଯାହା ଅସାମ୍ବିଧାନିକ କାମ କରୁଥିଲା କରୁଥିଲା ଏବେ ବିରୋଧୀ ଦଳ ଆସନରେ ବି ବସିବା ପରେ ସମାନ କାମ କରୁଛି । ଅର୍ଥାତ୍‌ ଯାହା ନିୟମରେ ନାହିଁ ତାହା କରୁଛି ବିଜେଡି । କୁହାଯାଉଛି କି, ୨୪ ବର୍ଷର ଶାସନର ପତନ ପରେ ବିଜେଡିର ମତିଭ୍ରମ ବଢ଼ିବାରେ ଲାଗିଛି । ଦଳ ଏବେ ନିଜର ନେତାମାନଙ୍କୁ ସମ୍ବିଧାନିକ ସ୍ୱୀକୃତି ନଥିବା ପଦବୀର ‘ଲଲିପପ’ ଦେଇ ସନ୍ତୁଷ୍ଟ କରିବାକୁ ପ୍ରୟାସ କରୁଛି । ଏଇ ଯେମିତି ବିଜେଡିର ରେଢାଖୋଲର ବିଧାୟକ ତଥା ଦଳର ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ଓ ପ୍ରତାପ କେଶରୀ ଦେବଙ୍କୁ ଆଜି ବିଜେଡି ଏଭଳି ପଦବୀ ଦେଇଛି ଯାହାକି ବିଧାନସଭାରେ ଆଇନସମ୍ମତ କିମ୍ବା ସ୍ୱୀକୃତ ନୁହେଁ ବୋଲି ଜଣାପଡ଼ିଛି ।

ବିରୋଧୀ ଦଳର ନେତା ହେବ କିଏ ? ଏହାକୁ ନେଇ ଅନେକଦିନ ହେଲାଣି ମାନସମନ୍ଥନ ଚାଲିଥିଲା । ହେଲେ ଗତକାଲି ଶଙ୍ଖ ଭବନରେ ବସିଥିବା ବୈଠକରେ ସ୍ପଷ୍ଟ ହୋଇଥିଲା କି ନବୀନ ହିଁ ବିରୋଧୀ ଦଳର ନେତା ବୋଲି । ଏହାପରେ ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟଙ୍କୁ ବିଧାୟକ ଦଳ ଉପନେତା, ପ୍ରମିଳା ମଲ୍ଲିକଙ୍କୁ ବିରୋଧୀ ଦଳ ମୁଖ୍ୟ ସଚେତକ ଓ ପ୍ରତାପ କେଶରୀ ଦେବଙ୍କୁ ବିରୋଧୀ ଦଳ ଉପମୁଖ୍ୟ ସଚେତକ ଭାବେ ଚୟନ କରାଯାଇଛି । ତେବେ ବିଧାନସଭାର ରୁଲସ୍ ଅଫ ପ୍ରୋସିଜିଓରରେ ବିରୋଧୀ ଦଳର ‘ଉପନେତା’ କିମ୍ବା ‘ଉପମୁଖ୍ୟ ସଚେତକ’ ଭଳି ପଦବୀ ନଥିଲେ ବି ବିଜେଡି ଏହି ଅଣସାମ୍ବିଧାନିକ ପଦବୀରେ ଦଳର ଦୁଇଜଣ ନେତାଙ୍କୁ ଥଇଥାନ କରିବାକୁ ପଛାଇ ନାହିଁ । ପୂର୍ବରୁ ‘ଫାଇଭ-ଟି’ ଓ ଅନ୍ୟାନ୍ୟ ଅଣସାମ୍ବିଧାନିକ ପଦବୀ ସୃଷ୍ଟି ସହ କାର୍ଯ୍ୟ କରିଥିବା ଭି.କେ ପାଣ୍ଡିଆନଙ୍କ ଚାପରେ ଦୁଇ ଅଣସାମ୍ବିଧାନିକ ପଦବୀରେ ଦଳୀୟ ନେତାଙ୍କ ‌ଥଇଥାନକୁ ବିଜେଡି ବିଧାୟକମାନେ ବି ସହମତି ଦେଇଥିବା କୁହାଯାଉଛି ।

ମୋଟ୍‌ ଉପରେ ବିଜେଡିରେ ଏବେ କିଛି ଠିକ୍‌ଠାକ ନାହିଁ । କାରଣ ସାଧାରଣ ନିର୍ବାଚନର ଫଳ ବାହାରିବାର ପାଖାପାଖି ୧୫ ଦିନ ବିତିଲାଣି । କିନ୍ତୁ ପରାଜୟର କାରଣ ଖୋଜିପାରୁନି ବିଜେଡି । ପରାଜୟର ୧୫ ଦିନ ପରେ ବି ନା ସମୀକ୍ଷା ବୈଠକ ବସି ପାରିଲା ନା ଫାକ୍ଟ ଫାଇଣ୍ଡିଂ କମିଟି ଗଠନ ହୋଇପାରିଲା । ଏତେ ସବୁ ପରେ ବି ପାଣ୍ଡିଆନଙ୍କ କଥା ପଚାରିଲେ ଏଡାଇ ଯାଉଛନ୍ତି ବିଜେଡି ନେତା । କିନ୍ତୁ ସେମାନେ କାହିଁକି ମୁହଁ ଖୋଲୁନାହାନ୍ତି ତାହାକୁ ନେଇ ଚର୍ଚ୍ଚା ଆହୁରି ଜୋର ଧରିଛି । ହେଲେ ଏ ସବୁ ଭିତରେ ଯେଉଁପରି ଭାବରେ ଗତକାଲି ବିରୋଧୀ ଦଳ ନେତା ଚୟନ ହେବା ସହିତ ଅସାମ୍ବିଧାନିକ ପଦ ବଂଟାଗଲା ତାହାକୁ ନେଇ ଚର୍ଚ୍ଚା ଜୋର ।