କଂଗ୍ରେସର ଟ୍ରାପରେ ଫସିଲା ବିଜେଡି । ଏବେ ଦଳ କହୁଛି ଆମେ ଆନାସ୍ଥା ପାଇଁ ପ୍ରସ୍ତୁତ । ପ୍ରଥମେ ପିସିସି ସଭାପତି ରାଜ୍ୟ ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବା କଥା ଉଠାଇଥିଲେ । ପରେ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ଅନାସ୍ଥାରେ ଆମେ ଜିତିବୁ ବୋଲି ଦମ୍ଭ ଭରିବା ସହ ବିଜେଡି କୋର୍ଟକୁ ବଲ ଫିଙ୍ଗିଥିଲେ । ତାରା କହିଥିଲେ ଯଦି ବିଜେଡି ଅନାସ୍ଥାକୁ ସମର୍ଥନ ନକରେ ସେ ବିଜେପି ସହ ଅଛି ବୋଲି ଜଣାପଡିଯିବ । ଏହାପରେ ଅନାସ୍ଥା ସପକ୍ଷରେ କହିବା ଛଡ଼ା ବିଜେଡିର କିଛି ନଥିଲା ଚାରା। ବିଜେଡି ଅନାସ୍ଥା ପାଇଁ ପ୍ରସ୍ତୁତ ଥିବା ପରୋକ୍ଷରେ କହିଛନ୍ତି ବିଧାୟକ ଅରୁଣ ସାହୁ । ଏ ନେଇ ଶଙ୍ଖ ଭବନରେ ଏକ ବୈଠକ ହୋଇଥିଲା। ଏଥିରେ ଦେବୀ ମିଶ୍ର, ପ୍ରଣବ ପ୍ରକାଶ ଦାସ, ପ୍ରତାପ ଦେବ, ପ୍ରତାପ ଜେନା ଓ ଅରୁଣ ସାହୁ ପ୍ରମୁଖ ନେତା ଉପସ୍ଥିତ ଥିଲେ।

ବିରୋଧୀଙ୍କ ଅନାସ୍ଥା ପ୍ରସ୍ତାବ ଆଣିବା ପ୍ରସଙ୍ଗରେ ଜବାବ ରଖିଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ କହିଛନ୍ତି ଅନାସ୍ଥାକୁ ସାମ୍ନା କରିବା ପାଇଁ ଆମେ ସମ୍ପୂର୍ଣ୍ଣ ପ୍ରସ୍ତୁତ । ସଂଖ୍ୟା ଦୃଷ୍ଟିରୁ ଦେଖିଲେ ବିଧାନସଭାରେ ସରକାରୀ ଦଳ ପାଇଁ କିଛି ସମସ୍ୟା ନାହିଁ। ୧୪୭ ସଦସ୍ୟ ବିଶିଷ୍ଟ ବିଧାନସଭାରେ ମ୍ୟାଜିକ ନମ୍ୱର ୭୪ । ଆଉ ବିଜେପି ପାଖରେ ଏକାକୀ ୭୮ ସଦସ୍ୟ ଅଛନ୍ତି ।

ଏଥିସହ ବିଜେପିକୁ ସମର୍ଥନ କରୁଛନ୍ତି ୩ ସ୍ୱାଧୀନ ବିଧାୟକ। ଏହାକୁ ମିଶାଇଲେ ବିଜେପି ପାଖେର ୮୧ ବିଧାୟକଙ୍କ ସମର୍ଥନ ଅଛି । ସେପଟେ ବିଜେଡିର ୫୧, କଂଗ୍ରେସର ୧୪ ଓ ସିପିଆଇଏମର ଜଣେ ବିଧାୟକଙ୍କୁ ମିଶାଇଲେ ବିରୋଧୀଙ୍କ ପାଖରେ ଅଛନ୍ତି ୬୬ ବିଧାୟକ । ଅର୍ଥାତ ସଂଖ୍ୟା ଦୃଷ୍ଟିରୁ ଏହି ଅନାସ୍ଥା କାଟ୍ ଖାଇବା ଏକ ପ୍ରକାର ନିଶ୍ଚିତ ।

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | -Argusnews Home: Odisha Latest News, Breaking News, Trending News, Live TV and more