୨୪ ବର୍ଷ ଲଗାତର ଶାସନ କଲେ । ହେଲେ ଚାଷୀଙ୍କ ଦୁଃଖ ବୁଝିଲେନି । ସତେ ଯେମିତି ଓଡ଼ିଶାରେ ଚାଲିଥିଲା ଏକଛତ୍ରବାଦ ଶାସନ । ଯିଏ ଯେତେ ନେହୁରା ହେଲେ ବି ଆଖି-କାନ ବୁଜି ଦେଉଥିଲେ ସରକାର । କାହା କଥା କିଛି ଶୁଣୁନଥିଲେ । ସରକାରଙ୍କର ଯାହା ଇଚ୍ଛା ହେଉଥିଲା ତାହା କରୁଥିଲେ । ନିଜ ହକ୍‌ ପାଇଁ ଚାଷୀ ବାରମ୍ବାର ଆନ୍ଦୋଳନକୁ ଓହ୍ଲାଇଲେ । ହେଲେ ରାଜରାସ୍ତାରେ ମାଡ଼ ଖାଇ ଘରକୁ ଫେରିଲେ । ଚାଷୀଙ୍କ ବଡ଼ ଦାବି ଥିଲା ଶୀତଳ ଭଣ୍ଡାର । ହେଲେ ସବୁ ଦାବିକୁ ଏପଟ କାନରେ ପୁରାଇ ସେପଟ କାନରେ ବାହାର କରିଦେଉଥିଲେ ସରକାର।

୨୪ ବର୍ଷର ବିଜେଡି ଶାସନରେ ଓଡ଼ିଶାର ଭାତ ହାଣ୍ଡିକୁ ଅବହେଳା କରିଛନ୍ତି ପୂର୍ବ ନବୀନ ସରକାର । ଚାଷୀ ମାନଙ୍କର ସବୁଠାରୁ ବଡ ଦାବି ଥିଲା ଶୀତଳ ଭଣ୍ଡାର । ବାରମ୍ବାର ଦାବି ପରେ ମଧ୍ୟ ପୂର୍ବ ସରକାର ସମୟରେ ବରଗଡ଼ ଜିଲ୍ଲାରେ ପ୍ରତିଷ୍ଠା ହୋଇପାରିଲାନି ଗୋଟିଏ ବି ଶୀତଳ ଭଣ୍ଡାର। ଫୁଲ କୋବି, ଟମାଟୋ ପରେ ଏବେ ବରଗଡ଼ରେ ଦେଖା ଦେଇଛି ଆଳୁର ଅଭାବୀ ବିକ୍ରି ।

ନିଜ ଶ୍ରମର ପାଉଣା ମିଳିବା ତ ଦୂରର କଥା ଖର୍ଚ୍ଚ କରିଥିବା ଟଙ୍କା ମଧ୍ୟ ପାଇବାର ଆଶା ଛାଡ଼ି ଦେଇଛନ୍ତି ଚାଷୀ । ଚଳିତ ବର୍ଷ ବରଗଡ଼ ଜିଲ୍ଲାରେ ୬୦୦ ହେକ୍ଟର ଜମିରେ ଆଳୁ ଚାଷ କରାଯାଇଛି । ବର୍ତମାନ ବଜାରରେ ଆଳୁର ଦର କିଲୋ ପ୍ରତି ୨୦ ଟଙ୍କା ରହିଥିବା ବେଳେ ବେପାରୀମାନେ ଆସି ଚାଷୀଙ୍କଠାରୁ ୯ ରୁ ୧୦ ଟଙ୍କାରେ କିଣି ନେଉଛନ୍ତି ଆଳୁ । ଆଳୁ ରଖିବାକୁ ଶୀତଳ ଭଣ୍ଡାର ନଥିବାରୁ ବାଧ୍ୟ ହୋଇ ବେପାରୀଙ୍କୁ କମ୍ ଦରରେ ବିକ୍ରି କରୁଥିବା କହିଛନ୍ତି ଚାଷୀ ।

ଏକର ଏକର ଜମିରେ ଆଳୁ ଚାଷ କରନ୍ତି ଚାଷୀ । ତାପରେ ବିଲରେ ଶ୍ରମିକ ଓ ଚାଷୀ ମିଶି ଆଳୁ ତୋଳନ୍ତି, ତାକୁ ବସ୍ତାରେ ପ୍ୟାକିଂ କରନ୍ତି । ନିଜ ହାତରେ ପଚି ସଢ଼ି ଯାଇଥିବା ଆଳୁ ଧରି ନିଜ ଦୁଃଖ ବଖାଣନ୍ତି । ହେଲେ ତାଙ୍କ ଦୁଃଖ କିଏ ବା ଶୁଣୁଛି । ଆଳୁ ବିହନକୁ କେଜି ପିଛା ୪୦ ଟଙ୍କାରେ ଚାଷୀ କିଣି ଚାଷ କରିଥିବା ବେଳେ ତାର ଅଧା ଦାମରେ ବିକ୍ରି ହେଉନାହିଁ ଆଳୁ ।

ଯଦି ଶୀତଳ ଭଣ୍ଡାର ଥାଆନ୍ତା ତାହେଲେ ଆଳୁକୁ ଷ୍ଟୋର କରି ରଖିହୁଅନ୍ତା । ଆଉ ଆବଶ୍ୟକ ବେଳେ ବାହାର କରି ଚାଷୀ ତାକୁ ବିକ୍ରି କରି ଭଲ ଦୁଇ ପଇସା ରୋଜଗାର କରିପାରନ୍ତା। କିନ୍ତୁ ଏବେ ବାହାରେ ପଡ଼ି ପଡ଼ି ଆଳୁ ନଷ୍ଟ ହେଉଛି । ଅନ୍ୟପଟେ ବିଜେଡି ଶାସନ ସମୟରେ ଯାହା ହୋଇପାରିଲା ନାହିଁ ତାହା ବିଜେପି ସରକାର କରିବ ବୋଲି ଆଶା ବାନ୍ଧିଛନ୍ତି ଚାଷୀ ।

Argus News | argus news | Odisha Latest News, Breaking News, Trending News, Live TV