ଭୁବନେଶ୍ଵର: ମୁଁ ବର୍ତ୍ତମାନ ବିଜୁ ଜନତା ଦଳ (BJD)ର କାର୍ଯ୍ୟକ୍ରମ ସହିତ ସମ୍ପୃକ୍ତ ହେଉ ନାହିଁ, ମୁଁ ଏଥିରୁ ନିବୃତ ରହିଛି । ମୋତେ ଲାଗିଲା ମୁଁ ସାମାଜିକ କାର୍ଯ୍ୟ କରିବି, କାହିଁକି ଦଳରେ କରିବି । ମୋର ସଦସ୍ୟତା ଅଛି, ସକ୍ରିୟତା ନାହିଁ । ଦଳ ସଠିକ୍ ଭାବରେ ନ ଚାଲିଲେ, ବିଜେଡିରୁ ଦୂରେଇ ଯିବି । ଗୁରୁବାର ବରିଷ୍ଠ ବିଜେଡି ନେତା ଏହି ମନ୍ତବ୍ୟ ଦେବାର କେଇ ଘଣ୍ଟା ମଧ୍ୟରେ ବିଜେଡି କାର୍ଯ୍ୟାନୁଷ୍ଠାନ ଗ୍ରହଣ କରିଛି ।

ଦଳ ବିରୋଧୀ କାର୍ଯ୍ୟ ଅଭିଯୋଗରେ ବିଜେଡି ପ୍ରଫୁଲ୍ଲ ମଲ୍ଲିକଙ୍କୁ ନିଲମ୍ବିତ କରିଛି । ପ୍ରଫୁଲ୍ଲ ମଲ୍ଲିକଙ୍କୁ ବିଜେଡିରୁ ନିଲମ୍ବିତ ନେଇ ପ୍ରେସ୍ ନୋଟ୍‌ରେ ସୂଚନା ଦେଇଛନ୍ତି ଦଳର ଉପସଭାପତି ପ୍ରତାପ ଜେନା । ପ୍ରଫୁଲ୍ଲ ମଲ୍ଲିକଙ୍କୁ ନିଲମ୍ବିତ କରି ବିଜେଡି ଅନ୍ୟ ନେତାମାନଙ୍କୁ କାର୍ଯ୍ୟାନୁଷ୍ଠାନ ଭୟର ବାର୍ତ୍ତା ଦେଉଥିବା ଚର୍ଚ୍ଚା ହେଉଛି ।

କେବଳ ପ୍ରଫୁଲ୍ଲ ମଲ୍ଲିକ ନୁହଁନ୍ତି ବିଜେଡିର ଅନେକ ତୁଙ୍ଗ ନେତା ଦଳକୁ ସଂଗଠିତ କରିବା ଲାଗି ମତ ଦେଉଛନ୍ତି । ଦେବାଶିଷ ସାମନ୍ତରାୟ, ଅରୁଣ ସାହୁ, ରାଜା ସ୍ଵାଇଁ, ବଦ୍ରି ପାତ୍ର, ଅଶୋକ ପଣ୍ଡା, ଭୂପିନ୍ଦର ସିଂଙ୍କ ଭଳି ନେତା ନିର୍ଦ୍ଦିଷ୍ଟ ଗୋଷ୍ଠୀର କାର୍ଯ୍ୟକଳାପକୁ ନେଇ ମୁହଁ ଖୋଲିଥିବା ବେଳେ ବିଜେଡି ପ୍ରଫୁଲ୍ଲଙ୍କୁ ଅସ୍ତ୍ର କରି ଅନ୍ୟମାନଙ୍କୁ ନିଲମ୍ବନ କରିବାର ଭୟ ଦେଖାଇଛି ।

୨୦୨୪ ସାଧାରଣ ନିର୍ବାଚନରେ ବିଜେଡି କ୍ଷମତାରୁ ଯିବା ପରେ ଦଳର ଅନେକ ତୁଙ୍ଗ ନେତା ନବୀନଙ୍କ ବିଶ୍ଵସ୍ତ ପାଣ୍ଡିଆନଙ୍କ ବିରୋଧରେ ସ୍ଵର ଉଠାଇଛନ୍ତି । ଆଉ ପାଣ୍ଡିଆନ୍‌ଙ୍କ ବିରୋଧରେ ପରୋକ୍ଷରେ କହିବା ଏବେ ପ୍ରଫୁଲ୍ଲ ସାମଲଙ୍କୁ ଏକ ପ୍ରକାର ଭାରି ପଡ଼ିଛି । ପ୍ରଫୁଲ୍ଲଙ୍କ ମନ୍ତବ୍ୟର କେଇ ଘଣ୍ଟାରେ ବିଜେଡି ତାଙ୍କୁ ଦଳରୁ ନିଲମ୍ବିତ କରିଛି ।