ଛାତ୍ର ସଂସଦ ନିର୍ବାଚନକୁ ନେଇ ଜୋର ଧରିଲା ରାଜନୀତି । ଚଳିତ ବର୍ଷ କଲେଜ ନିର୍ବାଚନ ହେବ କି ନାହିଁ । ତାକୁ ନେଇ ଚାଲିଛି ରାଜନୈତିକ ବୟାନବାଜି । ଆଉ ଏ ସବୁ ଭିତରେ କ୍ୟାମ୍ପସ ପଲିଟିକ୍ସରେ ନିଜକୁ ଆକ୍ଟିଭ କଲାଣି ବିଜେଡି ଯୁବ ଓ ଛାତ୍ର ୱିଙ୍ଗ । ଛାତ୍ରୀଙ୍କ ସୁରକ୍ଷାକୁ ପ୍ରସଙ୍ଗ କରି ଅଗଷ୍ଟ ୧ରୁ ଅଗଷ୍ଟ ୧୪ ଯାଏଁ ରାଜ୍ୟ ସାରା ବିଭିନ୍ନ କାର୍ଯ୍ୟକ୍ରମ କରିବ ଦଳ । ବିଜେଡି କହିଛି, କଲେଜ ନିର୍ବାଚନକୁ ଡରିଗଲାଣି ବିଜେପି ଓ ତାଙ୍କ ଛାତ୍ର ସଂଗଠନ । ସେପଟେ କଂଗ୍ରେସ ମଧ୍ୟ ବିଜେଡି ସହ ସ୍ଵର ମିଶାଇଛି ।

ତେବେ ଛାତ୍ର ସଂସଦ ନିର୍ବାଚନକୁ ନେଇ ବିରୋଧୀଙ୍କ ଅଭିଯୋଗ ଉପରେ କଡା କାଉଣ୍ଟର କରିଛି ବିଜେପି । ବରିଷ୍ଠ ବିଧାୟକ ଜୟନାରାୟଣ ମିଶ୍ର କହିଛନ୍ତି, ଛାତ୍ର ସଂସଦ ନିର୍ବାଚନ ବିଜେଡ଼ି ବନ୍ଦ କରିଥିଲା । ଆମ ହାତରୁ କେମିତି ଖସିଗଲା କଲେଜ । ଅନ୍ୟପଟେ ଛାତ୍ର ସଂସଦ ନିର୍ବାଚନକୁ ନେଇ କଲେଜ କ୍ୟାମ୍ପସରେ ମଧ୍ୟ ପ୍ରବଳ ତାତି ଦେଖିବାକୁ ମିଳିଛି । ଏବିଭିପି କହିଛି, ପୂର୍ବ ବିଜେଡି ସରକାର ନିର୍ବାଚନ ବନ୍ଦ କରିଥିବାରୁ କଲେଜ ସ୍ତରରେ ଛାତ୍ର ନେତୃତ୍ଵ ସୃଷ୍ଟି ହୋଇପାରୁନଥିଲେ । ଅନ୍ୟ ଛାତ୍ର ସଂଗଠନ ନିର୍ବାଚନ ସପକ୍ଷରେ ଦାବି କରି ସରକାର କାହିଁକି ଡରୁଛନ୍ତି ବୋଲି ପ୍ରଶ୍ନ କରିଛନ୍ତି ।

2017 ରେ ଶେଷ ଥର ପାଇଁ ହୋଇଥିଲା ଛାତ୍ର ସଂସଦ ନିର୍ବାଚନ, ୨୦୧୮ରେ ବାତ୍ୟା ତିତଲି, ୨୦୧୯ରେ କ୍ୟାମ୍ପସ ଅଶାନ୍ତି, ୨୦୨୦ରେ କୋଭିଡ ଆଳ ଦେଖାଇ ଛାତ୍ର ସଂସଦ ନିର୍ବାଚନ ଟାଳିଥିଲେ ସରକାର... ତା ପରଠୁ ବାହାନା ନ ଥିଲେ ବି ବିନା କାରଣରେ କଲେଜରେ ହେଉନି ନିର୍ବାଚନ.. ଏବେ ବିଜେପି ସରକାର ଆସିବା ପରେ ନିର୍ବାଚନ କରିବା ପାଇଁ ଅଣ୍ଟା ଭିଡିଛନ୍ତି । ତେଣୁ ଆଗକୁ ନିର୍ବାଚନ ବିଜ୍ଞପ୍ତି କେବେ ବାହାରୁଛି ତାହା ଉପରେ ରହିଛି ନଜର ।