ଅର୍ଗସ ବ୍ୟୁରୋ: ଯେଉଁଠି ତ ରାଜନୀତି କରୁଥିଲା କରୁଥିଲା...ଶେଷରେ ଶ୍ରୀମନ୍ଦିରରେ ବି ରାଜନୀତି କଲାଣି ବିଜେଡି । ଆସନ୍ତା ୧୭ ତାରିଖରେ ପୁରୀ ପରିକ୍ରମା ପ୍ରକଳ୍ପର ଉଦଘାଟନ ହେବ । ହେଲେ ଏବେଠୁ ଜୋର ଧରିଲାଣି ରାଜନୀତି । କାରଣ ମନ୍ଦିରର ପ୍ରସାର-ପ୍ରଚାର ଲାଗି ରାଜ୍ୟ କ୍ୟାବିନେଟ୍‌ ଯେମିତି ନିଷ୍ପତ୍ତି ନେଲା ତାହାକୁ ନେଇ ବିରୋଧୀ ବାରିଲେଣି ରାଜନୈତିକ ଗନ୍ଧ । କାରଣ ଏହି ପ୍ରୋଜେକ୍ଟ ଆମ ଓଡ଼ିଶା ନବୀନ ଓଡ଼ିଶା ଅଧୀନରେ ହେବ । ଏଥିପାଇଁ ସ୍କିମକୁ ୨୧୪ କୋଟି ବ୍ୟୟବରାଦ ବି ହୋଇଛି । ହେଲେ ଆମ ଓଡ଼ିଶା ନବୀନ ଓଡ଼ିଶା ଅଧିନରେ କାହିଁକି ଏ ପ୍ରକଳ୍ପ ହେବ ତାହାକୁ ନେଇ ଉଠିଲାଣି ପ୍ରଶ୍ନ ।

ଶ୍ରୀମନ୍ଦିର ନାଁରେ ଫୁଲ ରାଜନୀତି କରୁଛି ବିଜେଡି
ରାମ ମନ୍ଦିର ଉଦଘାଟନ ପୂର୍ବରୁ ତରତର ହୋଇ ହେଲା କି ପରିକ୍ରମା ପ୍ରକଳ୍ପର ଉଦଘାଟନ ?
ବିଜେଡି ଖେଳୁଛି କି ଧର୍ମ ରାଜନୀତି ?

ନିର୍ବାଚନ ପାଖେଇ ଆସୁଥିବାରୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଉଦଘାଟନ ହେବ ବୋଲି ସମସ୍ତେ ଜାଣିଥିଲେ । ହେଲେ ଶ୍ରୀରାମ ମନ୍ଦିର ପ୍ରାଣପ୍ରତିଷ୍ଠା ଉତ୍ସବ ତାରିଖ ଘୋଷଣା ହେବା ପରେ ତରତର ହୋଇ ଯେମିତି ମନ୍ଦିର ପରିକ୍ରମା ପ୍ରକଳ୍ପକୁ ଘୋଷଣା କଲେ ରାଜ୍ୟ ସରକାର ତାହାକୁ ନେଇ ଏବେ ଜଳଜଳ ଦିଶୁଛି ରାଜନୀତି । କୁହାଯାଉଛି, ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପ୍ରଚାର ପ୍ରସାର ନାଁରେ ବିଜେଡି କରୁଛି ଭୋଟ୍ ରାଜନୀତି ? ରାମ ମନ୍ଦିର ମୁଦ୍ଦାକୁ କାଉଣ୍ଟର ପାଇଁ ତିଆରି କରିଛି ଷ୍ଟ୍ରାଟେଜି ? ରାଜ୍ୟରେ ବିଜେଡି ଖେଳୁନି ତ ସଫ୍ଟ ହିନ୍ଦୁତ୍ୱ କାର୍ଡ ?
ପରିକ୍ରମା ପ୍ରକଳ୍ପ ପ୍ରଚାର-ପ୍ରସାର ଲାଗି ଖର୍ଚ୍ଚ ହେବ ୧୩୫ କୋଟି ୮୮ ଲକ୍ଷ ଟଙ୍କା । ପ୍ରତି ଗାଁକୁ ଗାଁ ବୁଲିବ ଶ୍ରୀଜଗନ୍ନାଥ ପ୍ରଚାର ରଥ । ୨୦ କୋଟି ଟଙ୍କା ଖର୍ଚ୍ଚରେ ପ୍ରତି ପଞ୍ଚାୟତରୁ ପୁରୀକୁ ବୁହା ହେବେ ଲୋକେ । ପ୍ରତି ଘରୁ ସଂଗ୍ରହ ହେବ ଗୁଆ, ଚାଉଳ । ଶ୍ରୀମନ୍ଦିର ପରିକ୍ରମା ପ୍ରକଳ୍ପର ପ୍ରଚାର ପ୍ରସାର ଖର୍ଚ୍ଚକୁ ମିଶାଇ ୪ ହଜାର କୋଟି ଟଙ୍କାର ‘ଆମ ଓଡ଼ିଶା ନବୀନ ଓଡ଼ିଶା' ବଜେଟର କଳେବର ବଢ଼ାଇ ଆହୁରି ୨୧୪ କୋଟି ଯୋଡ଼ିଛନ୍ତି ରାଜ୍ୟ ସରକାର ।

କାମିଆ ଜାନି ପ୍ରସଙ୍ଗରେ ମୁହଁ ଖୋଲିଲେନି
ପ୍ରକଳ୍ପର ପ୍ରଚାର କରି ରାଜନୀତି କଲେ
ଖପ୍ପା ହେଲେ ବିରୋଧୀ

ଶ୍ରୀମନ୍ଦିରକୁ ପାଣ୍ଡିଆନ ହିନ୍ଦୀ ବ୍ଲଗର କାମିଆ ଜାନିଙ୍କୁ ପ୍ରବେଶ କରାଇବା ପରେ ବଢିଛି ରାଜନୀତି । ଗୋଟିଏ ପଟେ ଭକ୍ତଙ୍କ ମନକୁ ଶକ୍ତ ଧକ୍କା ଲାଗିଥିବାବେଳେ ଏବେ ଭକ୍ତଙ୍କୁ ନେଇ ପୁଣି ଥରେ ବିଜେଡି ଆରମ୍ଭ କରିଦେଇଛି ରାଜନୀତି । କେବଳ ଏତିକି ନୁହେଁ ବରଂ ରତ୍ନଭଣ୍ଡାରଠୁ ଆରମ୍ଭ କରି ନୀତି ବିଭ୍ରାଟ ପରି ଘଟଣାରେ ସରକାର କୌଣସି ପଦକ୍ଷେପ ନେଇନଥିବା ବେଳେ ନିର୍ବାଚନ ପାଖେଇ ଆସୁଥିବାରୁ ଧର୍ମୀୟ ରାଜନୀତି କରୁଥିବା ବିରୋଧୀ ଅଭିଯୋଗ କଲେଣି । ତେବେ ସମୟ କହିବ ଏହି ରାଜନୀତି କେତେ ବଢାଉଛି ଭୋଟ୍‌ ବ୍ୟାଙ୍କ୍ ।

Argus News | argus news | -Argusnews Home: Odisha Latest News, Breaking News, Trending News, Live TV and more