ଅର୍ଗସ ବ୍ୟୁରୋ: ବିଜେଡିର ଇତିହାସ ଶେଷ ହୋଇଗଲାଣି । ବିଜେପି ସରକାର ଭଲ କାମ କରୁଛି । ଆଗାମୀ ୫୦ ବର୍ଷ ଯାଏଁ ଓଡିଶାରେ ଶାସନ କରିବ ବିଜେପି । ଚିନ୍ତା କରିବାର ଆବଶ୍ୟକତା ନାହିଁ । ଓଡିଶା ଗସ୍ତରେ ଥିବା ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ଵଶର୍ମାଙ୍କ ଏ ବୟାନ ପରେ ରାଜ୍ୟ ରାଜନୀତିରେ କମ୍ପନ । ସତରେ କଣ ଇତିହାସ ପାଲଟିବ ବିଜେଡି ? ୨୪ ବର୍ଷର ନିରଙ୍କୁଶ ଶାସନ ପରେ ୨୪ ନିର୍ବାଚନରେ ବିଦା ।

ଆଉ ପାୱାର ଯାଉ ଯାଉ ନେତୃତ୍ଵ ବିରୁଦ୍ଧରେ ବିଦ୍ରୋହର ବନ୍ୟା । ଖୋଲାଖୋଲି ନବୀନଙ୍କୁ ସମାଲୋଚନା କରୁଛନ୍ତି କର୍ମୀ ଓ ନେତା । ଜଣକ ପରେ ଜଣେ ରାଜ୍ୟସଭା ସାଂସଦ ଛାଡୁଛନ୍ତି ଦଳ । ପଞ୍ଚାୟତ ସ୍ତରର ନେତା, କର୍ମୀ ବି ଶଙ୍ଖ ଶିବର ଛାଡି ପଦ୍ମ କ୍ୟାମ୍ପ ମୁହାଁ । ଆଉ ଆଜି ପୁଣି ବିଜେପି ରାଜ୍ୟ ପ୍ରଭାରୀ ବି କହିଛନ୍ତି ଯେ, ବିଜେଡିର ଅନେକ ବିଧାୟକ, ସାଂସଦ ବିଜେପି ସହ ଯୋଗାଯୋଗରେ ଅଛନ୍ତି । ତେଣୁ ଏଭଳି ସ୍ଥିତିରେ ଆସାମ ମୁଖ୍ୟମନ୍ତ୍ରୀଙ୍କ ବିସ୍ଫୋରକ ବୟାନ ବିଜେଡିର ଭବିଷ୍ୟତ ଉପରେ ପ୍ରଶ୍ନ ଚିହ୍ନ ଛିଡା କରିଛି ।

ସେପଟେ ବରିଷ୍ଠ ବିଜେପି ବିଧାୟକ ଜୟନାରାୟଣ ମିଶ୍ର ମଧ୍ୟ ବିଜେଡିର ସ୍ଥିତି ଉପରେ ବୟାନ ଦେଇ ନିଆଁରେ ଘିଅ ଢାଳିଛନ୍ତି । କହିଛନ୍ତି, ବିଜେପି ଯେଉଁ ଦିନ ହୁଇସିଲ ଫୁଙ୍କିବ ସେଦିନ ବିଜେଡି ଗୁଣ୍ଡ ଗୁଣ୍ଡ ହୋଇଯିବ । କେବଳ ନବୀନ ଓ ପାଣ୍ଡିଆନ ଥିବେ । ହୁଏତ ନବୀନ ପଟ୍ଟନାୟକ ମଧ୍ୟ ପଳେଇ ଆସିପାରନ୍ତି ବୋଲି କହିଛନ୍ତି ଜୟନାରାୟଣ । ପାଲହଡା ବିଧାୟକ ଅଶୋକ ମହାନ୍ତି ମଧ୍ୟ କହିଛନ୍ତି, ବିଜେଡି ଭାଙ୍ଗିବାକୁ ଯାଉଛି । ବିଜେଡି ରାଜ୍ୟସଭାରେ ଶୂନ ହୋଇଯିବ । ଯାହାକୁ ନେଇ ଜବାବ ରଖିଛି ବିଜେଡି ।

ବିଜେଡିର ଭିତିରି ଅସନ୍ତୋଷ ଯେତେ ଲୁଚାଇଲେ ବି ଆଉ ଲୁଚି ପାନୁନି । ମମତା ଓ ସୁଜିତଙ୍କ ପରେ ଆହୁରି ଏକାଧିକ ରାଜ୍ୟସଭା ସାଂସଦ ବି ବିଜେପିରେ ମିଶିବେ ବୋଲି ଚର୍ଚ୍ଚା ହେଉଛି । ତେଣୁ ଆଗକୁ ବିଜେଡି ସୁପ୍ରିମୋ କେମିତି ନିଜ ଦଳର ନେତାଙ୍କୁ ରଖି ପାରୁଛନ୍ତି ତାହା ଉପରେ ରହିଛି ନଜର ।

Argus News | argus news | -Argusnews Home: Odisha Latest News, Breaking News, Trending News, Live TV and more