ବିଗିଡ଼ୁଛି ବିଜେଡି ସ୍ଥିତି । ଦିନକୁ ଦିନ ବଢ଼ୁଛି ଦଳରେ କନ୍ଦଳ । ଦଳ ସୁପ୍ରିମୋଙ୍କୁ ଇଗ୍‌ନୋର କରିବା ଆରମ୍ଭ କଲେଣି ନେତା । ଆଉ ନବୀନଙ୍କ କଣ୍ଟ୍ରୋଲରେ ନାହାନ୍ତି ବିଜେଡି ନେତା । କୁହାଯାଉଛି ବିଜେଡି ଦଳରେ ମିସେସ୍‌ ପାଣ୍ଡିଆନଙ୍କ ଏଣ୍ଟ୍ରି ନେଇ ଯେବେଠୁ ସୁରାକ ମିଳିଛି, ସେବେଠି ଦଳରେ ବିଦ୍ରୋହ ଧିରେ ଧିରେ ବଢ଼ିବାରେ ଲାଗିଛି । ପୂର୍ବରୁ ହାତ ଗଣତି କିଛି ନେତା ଦଳରେ ବିଦ୍ରୋହ ଆରମ୍ଭ କରିଥିଲେ । କିନ୍ତୁ ପରେ ଧିରେ ଧିରେ ଅନ୍ୟ ନେତାମାନେ ତାଙ୍କ ସହ ଯୋଡ଼ି ହେଉଛନ୍ତି । ଆଉ ବିଦ୍ରୋହୀ ନେତାଙ୍କ କଥାକୁ ସମର୍ଥନ କରୁଛନ୍ତି । 

ମୋଟାମୋଟି କହିବାକୁ ଗଲେ ଏବେ ବଳ ଗୋଟାଉଛନ୍ତି ବିଜେଡିର ବିଦ୍ରୋହୀ ଗୋଷ୍ଠୀ । ୭ ଜଣ ପୂର୍ବତନ ବିଧାୟକଙ୍କ ମେଳି ଏବେ ୭ ଗୁଣା ବୃଦ୍ଧି ପାଇଲାଣି । ବିଦ୍ରୋହୀ ଗୋଷ୍ଠୀ ରେ ଏବେ ଯୋଡ଼ି ହେଲେଣି ପ୍ରାୟ ୬୦ ଜଣ ହେଭିୱେଟ ନେତା । ଗତ ବର୍ଷ ୨୦୨୪ ରେ ଠିକ ଏହି ଡିସେମ୍ବର ମାସ ରେ ଭୁବନେଶ୍ୱରର ଏକ ହୋଟେଲରେ ମେଳି ବାନ୍ଧି ଥିଲେ ବିଜେଡିର ୭ ଜଣ ଯୁବ ନେତା ତଥା ବିଜୁ ଲିଗାସୀ ନେତାଙ୍କ ପୁଅ । ଯେଉଁଥିରେ ସାମିଲ ଥିଲେ ସମ୍ବିତ ରାଉତରାୟ, ରୁଦ୍ର ମହାରଥୀ, ବିଷ୍ଣୁବ୍ରତ ରାଉତରାୟ, ଚନ୍ଦ୍ରସାରଥି ବେହେରା, ଅଂଶୁମାନ ମହାନ୍ତି, ପ୍ରଣବ ବଳବନ୍ତରାୟଙ୍କ ଭଳି ପ୍ରମୁଖ ନେତା ।

ହୋଟେଲ ରେ ଲୁଚି ଛପି ମେଳି ବାନ୍ଧି ଦଳର ପରିଚାଳନା ନେଇ ଉଠାଇ ଥିଲେ ପ୍ରଶ୍ନ । ପରେ କଟକ ରେ ମଧ୍ୟ ଦେବାଶିଷ ସାମନ୍ତରାୟଙ୍କ ଘରେ ମେଳି ବାନ୍ଧି ଅନ୍ୟ କିଛି ବିଜୁ ଲିଗାସୀ ନେତା ଙ୍କୁ ଯୋଡ଼ି ଥିଲେ । ତାହା ପରେ ନବୀନ ନିବାସ ଯାଇ ସଭାପତିଙ୍କୁ ମଧ୍ୟ ଜଣାଇଥିଲେ ସମସ୍ତ ଆପତ୍ତି ଅଭିଯୋଗ । ସେହି ୭ ଜଣିଆ ମେଳି ଏବେ କିନ୍ତୁ ମହାଦ୍ରୁମରେ ପରିଣତ ହୋଇଛି । ୨୦୨୫ ଶେଷ ଆଡ଼କୁ ଠିକ ସେହି ଡିସେମ୍ବର ରେ ବଣ ଭୋଜି ନାଁ ରେ ୬୦ ରୁ ଅଧିକ ନେତା ଭୁବନେଶ୍ୱର ଉପକଣ୍ଠ ରେ ଏକାଠି ହୋଇ ଦେଇଛନ୍ତି ଖୋଲାଖୋଲି ଚ୍ୟାଲେଞ୍ଜ ।

ନବୀନଙ୍କ ନେତୃତ୍ୱରେ ଆଗକୁ ବଢିବା ପାଇଁ ସ୍ଲୋଗାନ ଦେଇଥିବା ବେଳେ ପରୋକ୍ଷ ରେ ଅଲିଖିତ ବସ ଭୈରବ ପାଣ୍ଡିଆନଙ୍କ ବିରୁଦ୍ଧରେ ଦେଇଛନ୍ତି ଯୁଦ୍ଧଙ୍ଗ ଦେହୀ ଡାକରା । ଏପରିକି ଆଗକୁ ଜାନୁଆରୀ କିମ୍ବା ଫେବୃଆରୀ ରେ ପୁଣି ମେଳି କରି ଶକ୍ତି ପ୍ରଦର୍ଶନ କରିବାକୁ ଦେଇଛନ୍ତି ଖୋଲା ଖୋଲି ଆହ୍ୱାନ । ତେବେ ବିଦ୍ରୋହୀ ଗୋଷ୍ଠୀ ଙ୍କ ବଢୁଥିବା ଶକ୍ତି କୁ ନେଇ ରାଜନୈତିକ ମହଲରେ ୨୦୧୨ ଭଳି ଆଉ ଏକ ମିଡନାଇଟ ଅପରେସନର ଚର୍ଚ୍ଚା ହେଉଛି ।