କୋଷ୍ଟାଲ ହାଇୱେକୁ ନେଇ ପୁଣି ତେଜିଲା ରାଜନୀତି । ଟେଣ୍ଡର ବାତିଲ ନେଇ ବିଜେଡି ଆଣିଛି ସଙ୍ଗୀନ ଅଭିଯୋଗ । ୪ ଦିନ ତଳେ ଉପକୂଳ ରାଜପଥର ଟେଣ୍ଡର ବାତିଲ ହୋଇଛି ବୋଲି ସମ୍ବାଦିକ ସମ୍ମିଳନୀ କରି କହିଛି ବିଜେଡି । ୧୭୬ କିଲୋମିଟର ପ୍ରଥମ ଫେଜ ପାଇଁ ଆହ୍ଵାନ ହୋଇଥିବା ଟେଣ୍ଡର ବାତିଲ କରାଯାଇଛି ବୋଲି ବିଜେଡି ଅଭିଯୋଗ କରିଛି । ଏପରିକି ଉପକୂଳ ରାଜପଥକୁ ଫୋର ଲେନ ବିଶିଷ୍ଟ ନକରି ଦୁଇ ଲେନ ବିଶିଷ୍ଟ କରିବାକୁ ଯୋଜନା କରାଯାଉଥିବା ଅଭିଯୋଗ କରିଛି ବିଜେଡି ।

ଅନ୍ୟପଟେ ବିଜେଡିର ଅଭିଯୋଗ ଉପରେ କଡା ଜବାବ ରଖିଛି ବିଜେପି । ବିଜେଡ଼ି ସରକାରରେ ଥିଲା ବେଳେ କୋଷ୍ଟାଲ ହାଇୱେ ପ୍ରକଳ୍ପ ଲାଗି ଆଦୌ ସହଯୋଗ କରିନଥିଲା । ବିଭିନ୍ନ ସମୟରେ ବିଭ୍ରାନ୍ତ କରିବାକୁ ବକ୍ତବ୍ୟ ଦେଉଥିଲେ ବିଜେଡି ନେତା । କିନ୍ତୁ ବିଜେପି ସରକାର ଆସିଲା ପରେ କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ସମୀକ୍ଷା କାମ ସରିଛି । ଉପକୂଳ ରାଜପଥର କୌଣସି ଟେଣ୍ଡର ବାତିଲ ହୋଇନାହିଁ , କେବଳ କିଛିଟା ଟେକ୍ନିକାଲ ପରିବର୍ତ୍ତନ କରାଯାଇଛି ଏବଂ ପୁନର୍ବାର ଟେଣ୍ଡର ହେବ । ତେଣୁ ବିଜେଡ଼ି ଅପପ୍ରଚାର କରୁଛି ବୋଲି କହିଛି ବିଜେପି ।

୨୦୧୫ ଏପ୍ରିଲ ୧୫ରେ ଭାରତମାଳା ପରିଯୋଜନା ଅନ୍ତର୍ଗତ ଓଡ଼ିଶାରେ ଉପକୂଳ ରାଜପଥ ନିର୍ମାଣ ନେଇ ଘୋଷଣା କରିଥିଲେ କେନ୍ଦ୍ରମନ୍ତ୍ରୀ ଗଡ଼କରୀ । ତେବେ ତତ୍କାଳୀନ ନବୀନ ସରକାରର ନ୍ୟସ୍ତ ସ୍ବାର୍ଥ ପାଇଁ ବାରମ୍ବାର ପରିବର୍ତ୍ତନ କରାଯାଇଥିଲା ପ୍ରକଳ୍ପର ଡିଜାଇନ୍ । ପ୍ରାୟ ୩ଥର ଡିଜାଇନ୍ ବଦଳିବା ପରେ ୨୦୨୧ ମସିହାରେ ଚୂଡ଼ାନ୍ତ ନକ୍ସା ପ୍ରସ୍ତୁତ ହୋଇଥିଲା ।