ବିରୋଧୀ ଦଳ ନେତା ନବୀନ ପଟ୍ଟନାୟକ ବର୍ଦ୍ଧିତ ଦରମା ନନେବା ଘୋଷଣା ପରେ ରାଜନୀତି ସରଗରମ । ଗୋଟିଏ ପଟେ ବିଜେଡି ନେତା ବର୍ଦ୍ଧିତ ଦରମାକୁ ପ୍ରଥମେ ସମର୍ଥନ କରୁଥିବା ବେଳେ ଏବେ ସେମାନଙ୍କ କଥାରୋେ ରହୁନି ତାଳମେଳ । କାରଣ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ବର୍ଦ୍ଧିତ ଦରମାକୁ ଗରିବଙ୍କୁ ବାଣ୍ଟିଦେବେ ବୋଲି ଘୋଷଣା କରିଛନ୍ତି । ତେଣୁ କୁହାଯାଉଛି, ନବୀନ ପଟ୍ଟନାୟକ ବିଧାୟକଙ୍କ ଏତେ ମାତ୍ରାରେ ବର୍ଦ୍ଧିତ ଦରମାକୁ ସମର୍ଥନ କରୁନାହାନ୍ତି । ହେଲେ ବିଜେଡି ନେତାମାନେ ଏହି ଦରମା ବୃଦ୍ଧି ସପକ୍ଷରେ ପୂର୍ବରୁ ଯୁକ୍ତି ବାଢ଼ୁଥିଲେ । ଏମିତିକି ଏସମ୍ପର୍କରେ ବିଧାନସଭାରେ ନୀରବ ସମର୍ଥନ ମଧ୍ୟ ଦେଇଥିଲେ । ହେଲେ ଏବେ ସେମାନେ ଦୋଛକିରେ ପଡ଼ିଯାଇଛନ୍ତି ।

ନବୀନଙ୍କ ଏହି ପଦକ୍ଷେପ ପରେ ବିଜେପି ନେତା ଜୟ ନାରାୟଣ ମିଶ୍ର ତାଙ୍କୁ ଟାର୍ଗେଟ କରିଛନ୍ତି । ନବୀନଙ୍କୁ ଆକ୍ଷେପ କରି ବିଜେପିର ବରିଷ୍ଠ ବିଧାୟକ ଜୟନାରାୟଣ ମିଶ୍ର କହିଛନ୍ତି, 'ନବୀନ ବାବୁ ବହୁତ ଧନୀ ଲୋକ, ଏସବୁ କେବଳ ସେ ଡ୍ରାମା କରୁଛନ୍ତି । ଖଣି ଖାଦାନରେ ଅନେକ ଦୁର୍ନୀତି ହୋଇଛି, ତଦନ୍ତ ହେବା ଦରକାର । ନବୀନ ବାବୁଙ୍କ ଡ୍ରାମାକୁ ଆଉ କେହି ଗ୍ରହଣ କରୁନାହାନ୍ତି । ପ୍ରମିଳା ମଲ୍ଲିକ ଦରମା ବୃଦ୍ଧି ପାଇଁ ବାରମ୍ବାର ବିଧାନସଭାରେ ଦାବି କରିଛନ୍ତି । ପ୍ରମିଳାଙ୍କ ଦାବିକୁ ନବୀନ ବାବୁଙ୍କର ସମର୍ଥନ ରହିଥିଲା । ନବୀନ ବାବୁଙ୍କ ବାପା ଏକ ଟଙ୍କା ଦରମା ନେଉଥିଲେ । ଦଳ ପାଇଁ ଏହା ଲାଗୁ କରିଥିଲେ ଭଲ ହୋଇଥାନ୍ତା' ।

'ଯେତେବେଳେ ଏହି ଦରମା ବୃଦ୍ଧି କରାଗଲା, ସେତେବେଳେ ବିଧାନସଭାରେ ନବୀନ ବାବୁ କାହିଁକି ରହିଲେ ନାହିଁ ବୋଲି ପାଲଟା ପ୍ରଶ୍ନ କରିଛନ୍ତି ଜୟ ନାରାୟଣ ମିଶ୍ର । ବିଧାନସଭା ଅଧିବେଶନ ଆଲୋଚନାରେ ସେ ଭାଗ ନେଇ ପାରିଥାନ୍ତେ । କିନ୍ତୁ ନେଲେନି । ସେତେବେଳେ ସେ ଏହି ବିଲ୍‌କୁ ବିରୋଧ କରିଥିଲେ, ସରକାର ବିଲ୍‌କୁ ପ୍ରତ୍ୟାହାର କରି ନେଇଥାନ୍ତେ' ।

ଅନ୍ୟପଟେ ସେହି ସମାନ କଥାକୁ ଦୋହରାଇଛନ୍ତି ଉପମୁଖ୍ୟମନ୍ତ୍ରୀ କେଭି ସିଂହ ଦେଓ । ସେ ମଧ୍ୟ କହିଛନ୍ତି, ବିରୋଧୀ ଦଳ ନେତା ଭାବେ ନବୀନ ପଟ୍ଟନାୟକ ଗୃହରେ ଉପସ୍ଥିତ ରହି ଏହାକୁ ବିରୋଧ କରିପାରିଥାନ୍ତେ । ସେ ଏନେଇ ନିଜର ମତ ମଧ୍ୟ ରଖିପାରିଥାନ୍ତେ । କିନ୍ତୁ ସେ ଗୃହରେ ରହିଲେନି । ଏବେ ଦରମା ବୃଦ୍ଧି ପ୍ରସଙ୍ଗରେ କହିଲେ କ'ଣ ଲାଭ । ଏହା କେବଳ ଆଉ କିଛି ନୁହେଁ, କେବଳ ରାଜନୀତି ବୋଲି କହିଛନ୍ତି କେଭି ସିଂହଦେଓ ।