ଭୁବନେଶ୍ଵର: ଯେଉଁ ପ୍ରବାଦ ପୁରୁଷଙ୍କ ନାଁରେ ଦଳ ଗଢ଼ିଲେ, ବାପାଙ୍କ ନାଁରେ ରାଜନୀତି କରି ୨୪ ବର୍ଷ ଧରି ମୁଖ୍ୟମନ୍ତ୍ରୀ ରହିଲେ ନବୀନ ପଟ୍ଟନାୟକ । ତାଙ୍କ ପ୍ରତି ଥିଲା କି ପ୍ରକୃତ ନିଷ୍ଠା ? ଏ ପ୍ରସଙ୍ଗରେ ନବୀନଙ୍କ ପୋଲ୍ ଖୋଲିଛନ୍ତି ବିଜେପି ବିଧାୟକ ବାବୁ ସିଂ । ଶେଷ ସମୟରେ ବିଜୁ ବାବୁ ଦୁଇ ପୁଅ ନବୀନ କିମ୍ବା ପ୍ରେମ ପଟ୍ଟନାୟକଙ୍କ ପାଖରେ ନଥିଲେ । ପୁଣି ବିଜୁ ବାବୁଙ୍କ ଅନ୍ତିମ ସଂସ୍କାର କରିବା ପରେ ହୋଟେଲରେ ଆମିଷ ଖାଇଥିଲେ ଦୁଇ ପୁଅ । ପୁଣି ବିଜୁଙ୍କ ଖାସ ଅନୁଗତମାନଙ୍କୁ ବିଜୁ ଜନତା ଦଳରୁ ନବୀନ ଗୋଟି ଗୋଟି କରି ବିଦା କରି ଦେଇଥିଲେ ।

ବିଜୁ ଜୟନ୍ତୀକୁ ପଞ୍ଚାୟତିରାଜ ଦିବସ ଭାବେ ପାଳନ ନ କରାଯିବା କୁ ନେଇ ବିଧାନସଭାରେ ସରଗରମ ଆଲୋଚନା । ବିଜେଡି ମୂଲତବି ଆଲୋଚନା ପାଇଁ ପ୍ରସ୍ତାବ ଦେଇଥିଲା ବିଜେଡି । ହେଲେ ଆଲୋଚନା ବେଳେ ନ ଥିଲେ ନବୀନ । ତେବେ ଆଲୋଚନା ବେଳେ ବିଜୁଙ୍କ ପ୍ରତି ନବୀନଙ୍କ ନିଷ୍ଠାର ପୋଲ ଖୋଲ ଥିଲେ ବିଜେପି ବିଧାୟକ ବାବୁ ସିଂ ।

ବାବୁ ସିଂ କହିଛନ୍ତି, ବିଜୁଙ୍କ ଜୁଇ ଜଳୁଥିବା ବେଳେ ହୋଟଲରେ ଆମିଷ ଖାଉଥିଲେ ନବୀନ ଓ ପ୍ରେମ ପଟ୍ଟନାୟକ । ବିଜୁ ବାବୁଙ୍କ ମୃତ୍ୟୁ ପରେ ଯିଏ ନବୀନଙ୍କୁ ରାଜନୀତି କୁ ଆଣିଲେ ନବୀନ ଆଗ ସେମାନଙ୍କ ରାଜନୈତିକ ହତ୍ୟା କଲେ । ଏପରିକି ଯେଉଁ ୪ କର୍ମଚାରୀ ବିଜୁ ବାବୁଙ୍କ ସହ ଶେଷ ସମୟରେ ନବୀନ ନିବାସରେ ରହୁଥିଲେ ନବୀନ ଆସୁ ଆସୁ ସେମାଙ୍କୁ ଆଗ ବିଦା କଲେ ବୋଲି କହିଥିଲେ ବାବୁ ସିଂ ।

ସେପଟେ ନବୀନଙ୍କ ଅନୁପସ୍ଥିତିରେ ଆଲୋଚନା ଆରମ୍ଭ କରି ବିଜେଡି ପକ୍ଷରୁ ବିରୋଧୀ ଦଳ ଉପ ନେତା ରାଜ୍ୟ ସରକାରଙ୍କ ଉପରେ ବର୍ଷିଥିଲେ । ସେହିପରି ରଣେନ୍ଦ୍ର ପ୍ରତାପ ସ୍ୱାଇଁ ବି ରାଜ୍ୟ ସରକାରଙ୍କ ନିଷ୍ପତ୍ତିକୁ ସମାଲୋଚନା କରି ଭୁଲ ସଂଶୋଧନ କରାଯିବ ବୋଲି ଆଶା କରୁଛୁ ବୋଲି କହିଥିଲେ । ବିଜେଡି ନେତାଙ୍କୁ ଜବାବ ଦେଇଥିଲେ ପଞ୍ଚାୟତିରାଜ ମନ୍ତ୍ରୀ ରବି ନାଏକ... କହିଥିଲେ, ବିଜୁ ପ୍ରେମୀ କିଏ ଖୋଜିବାକୁ ପଡ଼ିବ । ଯେଉଁ ମାନେ ବିଜୁଙ୍କ ଦାୟାଦ ନୁହନ୍ତି ବାଘ ଛାଲ ପିନ୍ଧି ବାଘ ଭଳି ଦେଖେଇ ହେଉଛନ୍ତି । ବିରୋଧୀ ଦଳର ଆବେଗ ଅଛି, ହେଲେ ସ୍ପଷ୍ଟତା ନାହିଁ । ଶଙ୍ଖ ଭବନରେ ବିଜୁଙ୍କ ପ୍ରତିମୂର୍ତ୍ତିଟେ ବି ନାହିଁ ।

ପୂର୍ବରୁ ବି ବିଜୁଙ୍କ ପ୍ରତିମୂର୍ତ୍ତି ତଳେ ବିଜେଡି କରୁଥିବା ପ୍ରତିବାଦରେ ସାମିଲ ହୋଇ ନଥିଲେ ନବୀନ । ଶୁକ୍ରବାର ଦିନ ବିଧାନସଭାକୁ ଆସି ବି ବିଜେଡିର ପ୍ରତିବାଦରେ ସାମିଲ୍ ହୋଇ ନଥିଲେ ନବୀନ । ସେ ଦିନ ବିଜୁଙ୍କୁ ନେଇ ଗୃହ ଭିତରେ ଗୃହ ବାହାରେ ତୋଡ଼ ଦେଖାଇଥିଲେ ବିଜେଡି ବିଧାୟକ । କିନ୍ତୁ ନିରବ ରହି କଡ଼େଇ ହୋଇ ଚାଲି ଯାଇଥିଲେ ନବୀନ, ଏ ଆଭିମୁଖ୍ୟ ସମସ୍ତଙ୍କୁ ସେଦିନ ଚକିତ କରିଥିଲା ।

Argus News | argus news | Odisha Latest News, Breaking News, Trending News, Live TV