ଅର୍ଗସ ବ୍ୟୁରୋ: ପଛୁଆ ବର୍ଗ ମଙ୍ଗଳ ପାଇଁ ଗଠିତ ସଂସଦୀୟ କମିଟିକୁ ଭେଟିଲା ବିଜେପି ଓବିସି ମୋର୍ଚ୍ଚା ପ୍ରତିନିଧି ଦଳ । ମୋର୍ଚ୍ଚାର ଅଭିଯୋଗ, 24 ବର୍ଷ ବିଜେଡ଼ି ସରକାରରେ ଓବିସି ବର୍ଗ ସବୁଠୁ ଅଧିକ ପ୍ରତାରିତ । ମଣ୍ଡଳ କମିଶନ ସୁପାରିଶର ଦୀର୍ଘ ବର୍ଷ ପରେ ବି ପଛୁଆ ବର୍ଗ ସେମାନଙ୍କ ସାମ୍ବିଧାନିକ ଅଧିକାରରୁ ବଞ୍ଚିତ ଅଛନ୍ତି । ଚାକିରି ଓ ଶିକ୍ଷା କ୍ଷେତ୍ରରେ ଓବିସିଙ୍କ ପାଇଁ ଥିବା ସଂରକ୍ଷଣ ବ୍ୟବସ୍ଥାକୁ ଲାଗୁ କରିନାହାଁନ୍ତି ପୂର୍ବ ସରକାର । ଏହାସହ ପଞ୍ଚାୟତ ଓ ପୌର ନିର୍ବାଚନରେ ମଧ୍ୟ ସଂରକ୍ଷଣକୁ ବିଜେଡ଼ି ସରକାର ଉଠାଇ ଦେଲେ ।

ଓବିସି ବର୍ଗଙ୍କ ସ୍ବାର୍ଥ ରକ୍ଷା ପାଇଁ କୋର୍ଟରେ ଓକିଲ ଦେଲେନି ପୂର୍ବ ସରକାର । ମିଛ ସର୍ଭେ କରି ଲୋକଙ୍କୁ କେବଳ ଭୁଆଁ ବୁଲାଇବା ରାଜନୀତି କରିଥିଲା ବିଜେଡ଼ି । ପିଏମ୍ ବିଶ୍ଵକର୍ମା ଯୋଜନାରେ ସରପଞ୍ଚ ମାନଙ୍କର ଭୂମିକା ରହୁଥିବାରୁ ଅନେକ ହିତାଧିକାରୀ ସୁବିଧା ପାଇବାରୁ ବଞ୍ଚିତ ହେଉଛନ୍ତି । ଏ ନେଇ କମିଟି ସହ ଆଲୋଚନା କରିଛି ବିଜେପି ଓବିସି ମୋର୍ଚ୍ଚାର ପ୍ରତିନିଧି ।

ସେପଟେ ବିଜେଡି ମଧ୍ୟ ଓବିସି ସଂସଦୀୟ କମିଟିକୁ ଭେଟି ଜାତି ଭିତ୍ତିକ ଜନଗଣନା କରିବାକୁ ଦାବି ଉଠାଇଛନ୍ତି । କେବଳ 27 ପ୍ରତିଶତ ସଂରକ୍ଷଣ ଓବିସିଙ୍କୁ ନ୍ୟାୟ ଦେବା ପାଇଁ ଯଥେଷ୍ଟ ନୁହେଁ ବରଂ ରାଜ୍ୟରେ ଜାତିଭିତ୍ତିକ ଜନଗଣନା ଆବଶ୍ୟକ ବୋଲି ବିଜେଡି କହିଛି । 24 ବର୍ଷ ଶାସନରେ ରହି ଯାହା କରି ନ ଥିଲେ ଏବେ କ୍ଷମତାରୁ ଯିବା ପରେ ଦାବି କରି ବିଜେଡି କୁମ୍ଭୀର କାନ୍ଦଣା କାନ୍ଦୁଛି ବୋଲି କହିଛି ବିଜେପି ।

୨୪ ନିର୍ବାଚନ ପୂର୍ବରୁ ଗତ ବର୍ଷ ମେରୁ ଜୁଲାଇ ମାସ ମଧ୍ୟରେ ଓବିସି କମିଶନଙ୍କ ଦ୍ବାରା ଏକ ଜାତି ଜନଗଣନା ସର୍ଭେ କରାଇଥିଲେ ବିଜେଡି ସରକାର। ହେଲେ ରିପୋର୍ଟ ପ୍ରକାଶ କଲେ ନାହିଁ । ସଂସଦୀୟ ଓବିସି କମିଟିକୁ ଭେଟି ଏକଥା ଜଣାଇବା ସହ ଓବିସିଙ୍କ ହକ ପାଇଁ ବିଭିନ୍ନ ଦାବି କରିଛି ରାଜ୍ୟ ଓବିସି ଫୋରମ୍ ।

ରାଜ୍ୟ ଜନସଂଖ୍ୟାର 54 ପ୍ରତିଶତ ପଛୁଆ ବର୍ଗ । ସମ୍ବିଧାନ ଅନୁସାରେ ସରକାରୀ ଚାକିରି ଓ ଉଚ୍ଚ ଶିକ୍ଷା କ୍ଷେତ୍ରରେ ଓବିସିଙ୍କ ପାଇଁ 27 ପ୍ରତିଶତ ସଂରକ୍ଷଣ ବ୍ୟବସ୍ଥା ରହିବା କଥା । ହେଲେ ହାଇକୋର୍ଟ ମୋଟ୍ 50 ପ୍ରତିଶତରୁ ଅଧିକ ସଂରକ୍ଷଣ ହୋଇପାରିବ ନାହିଁ ବୋଲି ନିର୍ଦ୍ଦେଶ ଦେଇଥିଲେ। ତେବେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ବିଶେଷ କ୍ଷେତ୍ରରେ 50 ପ୍ରତିଶତରୁ ଅଧିକ ସଂରକ୍ଷଣ ବ୍ୟବସ୍ଥା କରାଯାଇପାରିବ । ତେବେ 2017ରେ ଏନେଇ ସୁପ୍ରିମକୋର୍ଟରେ ଏକ ଲିଭ୍ ପିଟିସନ୍ ଦାଖଲ କରି ଚୁପ୍ ବସିଯାଇଥିଲେ ନବୀନ ସରକାର । ଏମିତି କି ମାମଲା ଲଢିବାକୁ ଓକିଲ ବି ଦେଲେନାହିଁ । ଆଉ ଏବେ ଜାତିଭିତ୍ତିକ ଜନଗଣନା ଦାବି କରି ଇଣ୍ଡି ମେଣ୍ଟର ସ୍ବରରେ ସ୍ବର ମିଳାଇଛି ବିଜେଡି ।

Argus News | argus news | Odisha Latest News, Breaking News, Trending News, Live TV