ଅର୍ଗସ ବ୍ୟୁରୋ: ଓଡ଼ିଶାକୁ ନେଇ ଦିଲ୍ଲୀରେ ବସୁଛି ବଡ଼ ବୈଠକ । କାହାକୁ ପ୍ରାର୍ଥୀ କରାଯିବ ? କିଏ ପ୍ରାର୍ଥୀ ହେବ ସେନେଇ ଜୋରଦାର ଆଲୋଚନା ହେଉଛି । ହେଲେ ଏତିକି ବେଳେ ଗତକାଲି ଦିଲ୍ଲୀରେ ମନମୋହନ ଗଣମାଧ୍ୟମକୁ ଯେଉଁ ପ୍ରତିକ୍ରିୟା ଦେଲେ ତାହାକୁ ନେଇ ଜୋରଦାର ଚର୍ଚ୍ଚା ହେଉଛି । କାରଣ ମନମୋହନ କହିଛନ୍ତି, ଆମେ ସିରିୟସ ମିଟିଂ କରୁଛୁ । ଆଉ ମନମୋହନଙ୍କ ଏମିତି ବୟାନ ପରେ ରାଜ୍ୟ ରାଜନୀତିରେ ଚର୍ଚ୍ଚା ଜୋର ଧରିଛି ।  

ଓଡ଼ିଶାକୁ ନେଇ ନିଇତି ଦିଲ୍ଲୀରେ ବସୁଛି ବୈଠକ । କେମିତି ଓ କାହାକୁ ପ୍ରାର୍ଥୀ ହେବ ସେନେଇ ଚାଲିଛି ଆଲୋଚନା । ଗୋଟିଏ ସପ୍ତାହ ଭିତରେ ପାଖାପାଖି ଚାରିଚାରିଥର ମିଟିଂ ବି ହେଲାଣି । ସେଇଥି ଲାଗି ତ ବିଜେପିକୁ ନେଇ ଚର୍ଚ୍ଚା ଜୋର ଧରିଛି ।  ମିଳିଥିବା ସୂଚନା ଅନୁସାରେ, ରାଜ୍ୟରେ ବସିଥିବା ନିର୍ବାଚନ କମିଟି ବୈଠକରେ ପ୍ରସ୍ତୁତ ହୋଇଥିବା ସମ୍ଭାବ୍ୟ ବିଜେପି ବିଧାୟକ ଓ ସାଂସଦ ପ୍ରାର୍ଥୀଙ୍କ ତାଲିକା ଧରି ଦିଲ୍ଲୀ ଯାଇଛନ୍ତି ମନମୋହନ । ଏମିତିକି ଚୂଡ଼ାନ୍ତ ପ୍ରାର୍ଥୀ ତାଲିକା ନିଷ୍ପତ୍ତି ସଂସଦୀୟ ବୋର୍ଡ ନେଉଥିବାରୁ ମନମୋହନଙ୍କ ଦିଲ୍ଲୀ ଗସ୍ତ ବେଶ ଚର୍ଚ୍ଚାରେ ।

ଏପଟେ, ନିର୍ବାଚନ ତାରିଖ ଘୋଷଣା ହୋଇସାରିଛି, ବିଗୁଲ ବି ବାଜିସାରିଛି । ହେଲେ ରାଜ୍ୟରେ ବିଜେପି-ବିଜେଡି ଭିତରେ ମେଂଟ ହେବ କି ନାହିଁ ସେନେଇ ଚର୍ଚ୍ଚା ଥମୁନି । କାରଣ ଏବେ ବି ସୋସିଆଲ ମିଡିଆରୁ ଆରମ୍ଭ କରି ବିଭିନ୍ନ ଗଣମାଧ୍ୟମରେ ମେଂଟକୁ ନେଇ ଚର୍ଚ୍ଚା ଚାଲିଛି । ହେଲେ ମେଣ୍ଟ ଦ୍ୱନ୍ଦ୍ୱ ଭିତରେ ପ୍ରାର୍ଥୀ ଚୂଡାନ୍ତ କରିସାରିଛି ରାଜ୍ୟ ବିଜେପି । ୧୪୭ ବିଧାନସଭା ଏବଂ ୨୧ ଲୋକସଭା ଆସନ ପାଇଁ ଯୋଦ୍ଧା ତାଲିକା ପ୍ରସ୍ତୁତ କରି ଦଳ କେନ୍ଦ୍ରୀୟ କମିଟି ପାଖକୁ ନେଇକି ଯାଇଛି । କୋର୍ କମିଟି ବୈଠକ ଏବଂ ନିର୍ବାଚନ କମିଟି ବୈଠକରେ ମାନସ ମନ୍ଥନ ସହ ଭଲ ସଂଗଠନ ଏବଂ ବିଜୟ ସମ୍ଭାବନା ଥିବା ପ୍ରାର୍ଥୀଙ୍କ ନାଁ ସର୍ଟ ଲିଷ୍ଟ ହୋଇଥିବା ବିଶେଷ ସୂତ୍ରରୁ ଜଣାପଡିଛି ।