ସାର ସମସ୍ୟାକୁ ପ୍ରସଙ୍ଗ କରି ବିଧାନସଭାରେ ବିଜେଡିର ହାଇ ଡ୍ରାମା । ସମାନ ପ୍ରସଙ୍ଗରେ କଂଗ୍ରେସ ଦେଇଥିବା ମୁଲତବୀ ଆଲୋଚନା କରାଇ ଦେଲାନି ବିଜେଡି । ଗୃହ କାର୍ଯ୍ୟ ଆରମ୍ଭ ହେଉ ହେଉ ସାର ଅଭାବ କଥା ଉଠାଇ ବିଜେଡି ଜୋରଦାର ହଟ୍ଟଗୋଳ କଲା । କଂଗ୍ରେସ ବିଧାୟକ ମାନେ ବି ନିଜ ଆସନରେ ଛିଡ଼ା ହୋଇ କଲେ ପ୍ରତିବାଦ । ବିଜେଡି ଓ କଂଗ୍ରେସ ମଧ୍ୟରେ ଲାଗିଲା ପଲିଟିକାଲ ମାଇଲେଜ୍ ଲାଗି ପ୍ରତିଯୋଗିତା । ପ୍ରଶ୍ନକାଳ ବାତିଲ କରି ସାର ପ୍ରସଙ୍ଗରେ ଆଲୋଚନା ପାଇଁ ବିଜେଡି ଦାବି କରିଥିବା ବେଳେ କଂଗ୍ରେସ କଲା କଡ଼ା ସମାଲୋଚନା । ଦିନ ତମାମ ହଟ୍ଟଗୋଳ ଜାରି ରହିବାରୁ ବାରମ୍ବାର ବିଧାନସଭା ମୁଲତବୀ କଲେ ବାଚସ୍ପତି ।

ଉଭୟ ବିଜେଡି ଓ କଂଗ୍ରେସକୁ ଟାର୍ଗେଟ କରିଛି ବିଜେପି । କହିଛି, ଦୁଇ ବିରୋଧୀ ଦଳ ଗଣତନ୍ତ୍ରରେ ବିଶ୍ୱାସ କରୁ ନାହାନ୍ତି । ଗୁରୁତ୍ବପୂର୍ଣ୍ଣ ପ୍ରଶ୍ନକାଳ ବନ୍ଦ କରିବାର କିଛି ଯଥାର୍ଥତା ନଥିଲା । ସାର ନେଇ କଂଗ୍ରେସର ମୁଲତବୀ ପ୍ରସ୍ତାବ ବି ଗ୍ରହଣ ହୋଇଥିଲା, ସରକାର ବି ଆଲୋଚନା ପାଇଁ ପ୍ରସ୍ତୁତ ଥିଲେ । କିନ୍ତୁ ଜାଣିଶୁଣି ବିରୋଧୀ ଦଳ ଗୃହ ଅଚଳ କଲେ।

ସେପଟେ ବିଧାନସଭାରେ ଅନାସ୍ଥା ପ୍ରସ୍ତାବ ଉପସ୍ଥାପନ ପୂର୍ବରୁ ଗଣମାଧ୍ୟମରେ ବିବୃତି ଦେଇଥିବାରୁ କଂଗ୍ରେସ ଦଳ ବିରୋଧରେ ସ୍ବାଧୀକାର ଭଙ୍ଗ ନୋଟିସ୍ ଆଣିଛନ୍ତି ବିଜେପି ବିଧାୟକ ପଦ୍ମଲୋଚନ ପଣ୍ଡା । ସେପଟେ ଅନାସ୍ଥା ନେଇ ନୋଟିସ୍ ପାଇଛନ୍ତି, କିନ୍ତୁ ଗୃହ ଅର୍ଡରରେ ନ ଥିବାରୁ ବିଚାର ପାଇଁ ଗ୍ରହଣ କରାଯାଇ ପାରିବ ନାହିଁ କହିଛନ୍ତି ବାଚସ୍ପତି ।