କଲେଜ ପାଠାଗାରରେ ଉଇ ଖାଉଛନ୍ତି ବହି । ଆଠଗଡ଼ ଗୋପବନ୍ଧୁ ବିଜ୍ଞାନ ମହାବିଦ୍ୟାଳୟର ପାଠଗାରରେ ଥିବା ୧୫ ହଜାରରୁ ଅଧିକ ବହି ନଷ୍ଟ ହୋଇଯାଇଛି । କିଛି ବହି ଉଇ ଖାଇଥିବାବେଳେ ଛାତରୁ ପାଣି ପଡ଼ି ନଷ୍ଟ ହୋଇ ଯାଇଛି ଅବଶିଷ୍ଟ ବହି । ଆଠଗଡ଼ ରେ ୧୯୬୩ ମସିହାରେ ସ୍ଥାପିତ ମହାବିଦ୍ୟାଳୟରେ ୨୫୦୦ ଛାତ୍ରଛାତ୍ରୀ ପାଠପଢୁଥିଲେ ବି ଛାତ୍ରଛାତ୍ରୀଙ୍କୁ ପାଠାଗାର ଯିବାକୁ ଅନୁମତି ମିଳୁନଥିବା ଅଭିଯୋଗ ହୋଇଛି । ଶେଷରେ ଏପରି ଅବସ୍ଥା ହୋଇଛି- ଉଇ ଖାଇଛନ୍ତି ବହି ।

ବର୍ଜ୍ୟ ବସ୍ତୁ ପରି ପାଠାଗାରରେ ତଳେ ଗଦା ହୋଇ ରହିଛି ବହି । ପାଠାଗାରର ୪ଟି କୋଠରୀ ଜରାଜୀର୍ଣ୍ଣ ଅବସ୍ଥାରେ ଥିଲେ ବି କଲେଜ କର୍ତ୍ତୃପକ୍ଷ କେବେ ଦୃଷ୍ଟି ଦେଇ ନାହାନ୍ତି । ଛାତରୁ ପାଣି ଗଳୁଛି ତ କବାଟ ଝରକା ଉଇ ଖାଇ ଗଲାଣି । ୫୫ ହଜାର ବହିରୁ ବର୍ତ୍ତମାନ ୧୫ ହଜାର ବହି ଉଇ ଖାଇ ନଷ୍ଟ ହୋଇଯାଇଥିବା କହିଛନ୍ତି ଲାଇବ୍ରେରୀ ଦାୟିତ୍ଵରେ ଥିବା ଅଧିକାରିଣୀ ।

ଗୋଟିଏ କଲେଜରେ ୪ ବର୍ଷ ଭିତରେ ୧୫ ହଜାର ବହି ଉଇ ଖାଇଯିବା କଲେଜ ପରିଚାଳନା ଉପରେ ବଡ଼ ପ୍ରଶ୍ନ ଉଠାଇଛି । ପାଠାଗାର କୋଠାର ପୁନରୁଦ୍ଧାର ସହ ଛାତ୍ରଛାତ୍ରୀଙ୍କୁ ପାଠଗାରର ବହି ପଢ଼ିବାକୁ ସୁଯୋଗ ଦେବାକୁ ଦାବି କରିଛନ୍ତି ସ୍ଥାନୀୟ ବାସିନ୍ଦା ।