ମୟୂରଭଞ୍ଜ ଜିଲ୍ଲା ବଡ଼ସାହି ତହସିଲ ଅଧିନରେ ଥିବା ଖୁଣ୍ଟାପାଳ, ମେଣ୍ଢାମୁଣ୍ଡିଆ ଏବଂ କୁଳିଅଣା ଦେଇ ବହି ଯାଇଥିବା ବୁଢ଼ାବଳଙ୍ଗ ନଦୀର । ଦୀର୍ଘ ବର୍ଷ ଧରି ଏହି ତିନୋଟି ଗାଁର ଲୋକମାନେ ବୁଢ଼ାବଳଙ୍ଗ ନଦୀ କୂଳରେ ବସବାସ କରିଆସୁଥିବା ବେଳେ ଫାଇଲିନ୍ ,ଫନି, ତିତିଲି, ହୁଡୁହୁଡ୍ ଭଳି ବାତ୍ୟା ପରେ ପାଖାପାଖି ୨ କିଲୋମିଟର ନଦୀର କୂଳ ଖାଇ ଯାଇଛି । ଯାହାକୁ ନେଇ ବର୍ତ୍ତମାନ ଏହି ତିନୋଟି ଗାଁର ଗ୍ରାମବାସୀ ସମ୍ପୂର୍ଣ୍ଣ ଭୟଭୀତ ଅବସ୍ଥାରେ ।

ଖାଲି ଏତିକି ନୁହେଁ, ଟିକିଏ ନଜର ପକାନ୍ତୁ ଏହି ଖୁଣ୍ଟାପାଳ ମେଣ୍ଢାମୁଣ୍ଡିଆ ଦେଇ କୁଳିଅଣା ଯାଇଥିବା ପ୍ରଧାନମନ୍ତ୍ରୀ ଗ୍ରାମ୍ୟ ସଡକକୁ । ନଦୀର କୂଳ ଖାଇ ଖାଇ କେତେବେଳେ ଯେ ରାସ୍ତା ଭୁଶୁଡିଯିବ କିଏ ବା କହିବ । ଯଦି ଏହି ବୁଢ଼ାବଳଙ୍ଗ ନଦୀର ଆଡ଼ିବନ୍ଧକୁ ଖୁବଶୀଘ୍ର କାର୍ଯ୍ୟକାରୀ କରାନଯାଏ, ତେବେ ଆଗାମୀ ଦିନରେ ଯୋଗାଯୋଗ ବି ବିଛିନ୍ନ ହୋଇଯାଇପାରେ ।

ଏଠାକାର ଗ୍ରାମବାସୀ ବାରମ୍ବାର ବିଭାଗୀୟ ଅଧିକାରୀ, ଲୋକ ପ୍ରତିନିଧିଙ୍କୁ ଅଭିଯୋଗ କରିଆସୁଥିଲେ ମଧ୍ୟ ଆଜି ପର୍ଯ୍ୟନ୍ତ ଏହି ନଦୀର ଆଡ଼ିବନ୍ଧ ଉପରେ କାହାର ନଜର ପଡିନାହିଁ । ତେବେ ଦୀର୍ଘ ୨୪ ବର୍ଷର ନବୀନ ସରକାରଙ୍କ ବୈମାତୃକ ମନୋଭାବ ଏବଂ ପ୍ରଶାସନିକ କ୍ଷେତ୍ରରେ ଅଫିସରରାଜ୍ ପାଇଁ ଅଭିଯୋଗ ପରେ ମଧ୍ୟ ସମସ୍ୟାର ସମାଧାନ ହୋଇ ପାରୁନାହିଁ । ଡବଲ୍ ଇଞ୍ଜିନ୍ ସରକାରଙ୍କ ନିକଟରେ ଖୁଣ୍ଟାପାଳ, ମେଣ୍ଢାମୁଣ୍ଡିଆ ଏବଂ କୁଳିଅଣା ଗାଁର ସୁରକ୍ଷା ପାଇଁ ବୁଢ଼ାବଳଙ୍ଗ ନଦୀର କୂଳରେ ପଥର ପ୍ୟାକିଂ କରିବାକୁ ଦାବି କରିଛନ୍ତି ଏହି ୩ ଗାଁର ଗ୍ରାମବାସୀ ।