ଭୁବନେଶ୍ଵର: ବୁଲୁଛି ବୁଲଡୋଜର, ଭାଙ୍ଗୁଛି ଆଶ୍ରମ । ସରକାରୀ ଜମିରେ ଥିବା ବିବାଦୀୟ ବୈକୁଣ୍ଠ ଧାମ ଆଶ୍ରମକୁ ବୁଲଡୋଜର ଲଗାଇ ଭାଙ୍ଗୁଛି ପ୍ରଶାସନ । ବୈକୁଣ୍ଠ ଧାମ ଆଶ୍ରମ ସରକାରୀ ଜମିରେ ଜବରଦଖଲରେ ଥିବାରୁ ଉଚ୍ଛେଦ କରୁଛି ବିଡିଏ । ଉଚ୍ଛେଦ ପୂର୍ବରୁ ଆଶ୍ରମକୁ ଖାଲି କରାଯାଇଥିଲା ।

ପ୍ରଶାସନ ପକ୍ଷରୁ ୨ଟି ବୁଲଡୋଜର ଲଗାଇ ଆଶ୍ରମକୁ ଉଚ୍ଛେଦ କରାଯାଉଛି । ସନ୍ଧ୍ୟା ୫ଟା ପର୍ଯ୍ୟନ୍ତ ଉଚ୍ଛେଦ ଚାଲିବ । କିଛି ବାକି ରହିଲେ ଆସନ୍ତାକାଲି ମଧ୍ୟ ଉଚ୍ଛେଦ କରାଯିବ । ଉଚ୍ଛେଦ ଲାଗି ସୁରକ୍ଷା ଦୃଷ୍ଟିରୁ ପୋଲିସ ମୁତୟନ ହୋଇଛନ୍ତି ।

ବୈକୁଣ୍ଠ ଧାମ ଆଶ୍ରମ ଭଙ୍ଗାଯିବାକୁ ସ୍ଥାନୀୟ ଲୋକ ସ୍ଵାଗତ କରିଛନ୍ତି । କହିଛନ୍ତି, ସରକାରୀ ଜମିରେ ଆଶ୍ରମ କରି ପୁଅକୁ କଳକୀ ଅବତାର କହି ଲୋକଙ୍କୁ ଭଣ୍ଡାଇ ଚାଲିଥିଲେ । ଆଶ୍ରମ ଭାଙ୍ଗିବା ଠିକ୍ ଅଟେ । ପୁଅକୁ ଠାକୁର କହି ତୁଳସୀ ପାଦ ତଳେ ରଖୁଥିଲେ, ଭାଣ୍ଡାମୀ ଚଳାଇ ଥିଲେ ବୋଲି କହିଛନ୍ତି ଲୋକେ ।

ବେଆଇନ ଭାବେ ସରକାରୀ ଜମି ଉପରେ ଗଢି ଉଠିଥିଲା ସାମ୍ରାଜ୍ୟ । ଭୁବନେଶ୍ଵର ଘାଟିକିଆ ଅଞ୍ଚଳରେ ବହୁ ବର୍ଷ ଧରି ସରକାରୀ ଜମିକୁ ହଡ଼ପ କରି ବୈକୁଣ୍ଠ ଧାମ ଆଶ୍ରମ କରିଥିଲେ ବାବା କାଶୀନାଥ। ପୁଅକୁ କଳକୀ ଅବତାର ସଜେଇ ଲୋକଙ୍କୁ ଭଣ୍ଡାଇ ଚାଲିଥିଲେ ।

ଯେତେବେଳେ ବାବାଙ୍କ ମିଛ ଧରା ପଡ଼ିଗଲା ତ ହାଇକୋର୍ଟରେ ମିଛ ତଥ୍ୟ ଦେଇ ଜବରଦଖଲ ଉଚ୍ଛେଦ ଉପରେ ରହିତାଦେଶ ଆଣିଥିଲେ ଆଶ୍ରମ କର୍ତ୍ତୃପକ୍ଷ । ଭକ୍ତଙ୍କୁ ଭଣ୍ଡାଉଥିବା ବାବା ହାଇକୋର୍ଟରେ ବି ମିଛ ତଥ୍ୟ ଦେଇଥିଲେ । ଆଶ୍ରମ ଉଚ୍ଛେଦ ଚାଲିଥିବା ବେଳେ ଏବେ ବି ଫେରାର ଅଛନ୍ତି ବାବା କାଶୀନାଥ ।

Argus News | argus news | Odisha Latest News, Breaking News, Trending News, Live TV